Anak bruk suh sah hatai di urang Quoc hoi huac ngak oh medil sumu ba tame pandar sa mejam tapuk dalam thun bac birau 2026, Akok Mentri Pato megru Nguyễn Kim Sơn khan lac “sumu”. Mentri Pato megru daok padang ngak danak dak, dalam danak dak nan hu jalan ba ngak. Kham ngak samar tal bilan 11 meda brei hu jalan ngak piah pok tagok dom pakat angaok mbaoh tangin. Urang lambaok vakil lac ong Nguyễn Anh Trí caong khin meyah hu jalan langah dom mejam tapuk dalam dom tapuk daok pandar njauk brei caik hatai, kayua daok rilo kadha oh lagaih saong dalam Quoc hoi mbang XIV, dom urang Quoc hoi jeng hu rilo panuac ndem ka bruk ini.

Lien doan Lao dong tinh Dong Nai birau peih ngak dom bruk kuhria ka urang doan, urang ngak apah uan raok Tet Nguyen dan thun Athaik Wao – Bính Ngọ 2026. Tui nan, Kong doan dom pakat peih ngak dom bruk raok Tet pataom mbaok baoh sang urang ngak kong; me-in sambai, suak sam njauk kaya kan di dom labik ngak kong nghiep. Nao rivang, alin ndap nda ka urang ndoan, urang ngak apah, njauk ndem tal urang baoh sang kan kandah, jien mek tame takik, kurang bruk ngak, lahik bruk ngak, tavak jien bilan, jien alin ka urang ngak…Gam haong nan, brei radaih taduan raok oh abih jien atau harak ve radaih pui, radaih, ahaok ka urang nao palei mbang Tet.

Meng akaok thun tal ini, kuhria khat lahik kayua glut jaleih taneh tapen kraong di tinh Dong Nai labaih 38 ti dong kayua 115 labik glut jaleih; dalam nan hu 15 labik glut jaleih praong tapen kraong Tiền atah labaih 2,8 km. Glut jaleih ngak khut 43 baoh sang, 49 bè raong ikan di doanh nghiep, bhap bini…Njauk sangka lac bruk glut jaleih ar kraong di xã Tân Long ngak khat lahik jaik 400 tấn ikan pra dalam danao raong, jaleih sa baoh sang, sa gilang khik kaya kan kuhria lahik labaih 12 ti dong. 

Dom harei tapa, ia ndik tagok glong ba tal rilo labik di tinh Vĩnh Long dauk dalam ia. Tui yaok kuhria, ia ndik di bilan 8 ia bulan Pumi meng blaoh, dalam tinh Vĩnh Long hu 18 jalan ar kraong ribaong glut jaleih atah labaih 570 met. Langiu di nan, hu labaih 12.000 met ar pacang, ngak khat lahik labaih 220 trieu dong. Gah chuc nang  kakei dom bhum palei brei kuhria caga dahlau “ samar – sumu – lagaih” piah khik brei ka manuac sia hu salamat, drap ar di bhap bini, tani tanat bruk ngak mbang pala drak, samar pasiam veik bruk ngak yaok harei di bhap bini di labik ia dauk.

Dalam harei 22/10, ia ndik kuhria mboh di Balai  Can Tho angaok kraong Hau labaih 2,29 met, glong abih kuhria meng lavik mai thun 2022 lac 0,02 met. Yau nan, kuhria tal meng harei 17/10 mbiah tal ini ia ndik di Balai  Can Tho angaok kraong Hau tagok tal pakat III, ngak ka rilo labik dhong biar, jalan mbak nao mai tapen kraong, ralo labik di Ban Can Tho dauk ralo labik ba tal raidiuk saong bruk taduan raok anek bik nao bac gaok kan kandah.

Mentri Ngoai giao Indonesia khan lac, ba mai veik negar 97 bhap bini chap hu hadei dauk tabiak di sa pasak pachot pagat online di Campuchia di adit dahlau. Indonesia hu labaih 10.000 mbang kuhria meng thun 2020, dom kapol pachot pagat  hu peih pambak praong  di Nam Phi saong Dom Tiểu vương quốc Ả Rập Thống nhất. Hu labaih 1.500 urang gaok pagat pablei manuac, dalam nan  hu rilo urang likau tame ngak bruk ini. Rilo urang hu bruk ngak tui harak pambuak bruk di negar langiu min gilac tame ngak haong kapol pachot pagat kayua kol ini palua ngak bruk mbuan mbiah jien bilan glong.

Tong thong urak ini lac Peru Jose Jeri  brei panuac khan samar dui atah dalam 30 harei di ban ine Lima saong ban tapen tathik Callao, anak bruk kol kanjiak jhak saong dom bruk pagat jien parilo. Brei panuac angaok riyak pakat negar, Tong thong Jeri kakei lac gah bol lin mai ngak bruk khik brei salamat ka bhap bini, dom urang ngak bruk  tui jalan “ pacang caga salih tapa taong tame”. Anak bruk nan, dom mbang trun jalan cagar veik kol duis saong bruk taong paoh ba tal 1 urang metai saong labaih 100 njauk rambuis.

Klau harei hadei rah tabiak bruk co klaik dom kaya angui cuh di patao kuhria tui jien labaih 88 trieu euro, sumu 102 trieu dola My labik, Gilang khik piah Louvre di ban ine Paris, Pháp brei peih pabah mbang taduan raok tuai. Dalam tuk nan, dom jalan pacang khik salamat  jeng hu peih ngak khang. Bruk co klaik oh lac yaom dom kaya nan bo daok brei mboh rilo labik huan njauk kuhria iek veik di sa dalam dom gilang hu angan je di dunya./.