Tui Mentri Lao dong – Thuong binh saong Xa hoi, kuhria tal abih harei 7/2 bahrau blaoh, 58 bhum palei hu padang Mban pato tacei pakat tinh ka bruk brei oh daok baoh sang taik tahak. 5 tinh, ban karei lac Ha Noi, hai Phong, Quang Ninh, Vinh Phuc, Ba Ria – Vung Tau oh daok baoh sang taik tahak. Tal ini, grauk taneh ia hu daong brei oh daok baoh sang taik tahak hu ka 100.000 baoh sang. Dom bhum palei padang jalan ba tabiak ngak salah blaoh bruk ini samar drah jang bruk kuhria dahlau. Min, tal tuk ini, jeng daok labaih 315.000 baoh sang hu kan kandah ka sang daok.

UB bhap bini tinh Dong Nai mbaoh harak Danak dak pato pakai saong patagok urang ngak bruk di labik duh ka Mblang kapal haok dunya Long Thành  vaktu 2024 -2026, pamong tal thun 2030. Tui nan, tinh Dong Nai buh tabiak 121 ti dong piah daong  ka 4.800 rahra daok dalam tinh ngak bruk dalam saong langiu mblang kapal haok. Bruk pato pakai urang ngak bruk dalam saong langiu mblang kapal haok Long Thành  hu urang daong ka bhap bini njauk mek veik taneh piah duh ka danak dak. 

Hu tuk janih phun pala ngak kaya meda ka rilo baoh sang urang ngak nong, min dom thun tapa, phun amraik kalu di tinh Binh Phuoc bhian gaok jit ruak. Piah daong ka urang pala amraik kalu hu kein lagaih pala bahrau, pasiam veik bein phun amraik kalu, kuhria tal tuk ini tinh Binh Phuoc hu brei mesre abih tih labaih 1.412 ty ndong. Tapa phun jien ini rilo baoh sang hu pala phun gilac phun amraik kalu bahrau atau salih bruk ngaki nong karei. Tui darak pasar bilan pala 2024, yaom amraik kalu hu tagok, gaok tuk mai tagok tal 150 ribau ndong/kg hu daong urang ngak nong hu rilo jien mek tame.

Meng langik tasik hu lagaih, yaok ribau bhap bini ngak mbang di tasik Bạc Liêu, Cà Mau gilac veik mai sang dalam bui sambai mek hu ikan hadang bak gilai. Abih di nyu nan lac, gam haong dom gilai nao tasik mek hu rilo ikan hadang, yaom ikan hadang  jneg glong, urak ini mực jantak hu yaom meng 140-150 ribau đồng sa kilo, mực praong pablei dalam melam hu yaom labaih 300 ribau dong sa kilo. Bruk ngak hu siam yau nan mai meng karja palei  pataom tame patagok gah jitvu daong bruk nao ngak mbang di tasik, hu rilo kapal gilai ngak mbang pablei salih  kaya ikan di urang nao tasik, khik hu kaya ikan that bingi, yau nan ye yaom glong.

Dong Xuan lac lac harei bilan ngak padai yuak kuak hu rilo abih di rahra bhum taneran kraong Cuu Long, kayua nan, mikva biak caong takre tame mbang padai ini piah tani tanat raidiuk di baoh sang. Min yaom padai thun ini trun khang, dalam tuk nan, jien buh tame ka pandap kaya duh bruk pala drak, jien pah urang ngak bruk di mbang padai ini jeng tagok. Di tinh Tien Giang, yaok kaom jaik abih dom janih padai jeng trun khang meng 2.000-2.500 ndong/kg dut haong tukvak ini thun dahlau. Ini lac tanut yaom biar abih dalam dom thun jaik ini.

Urang ngak praong Indonesia paglong abih bruk kakei brei caga dahlau ka tabung ceik apui Lewotobi Laki Laki di gah Pur taneh ia ini, gam peih praong labik pakauk saong brei panduan ba urang nao tasik di 6 palei piah hu salamat. Bilan 11 thun dahlau, tabung ceik apui nan pruh rilo mbang, ba tal 9 urang metai, rilo mbang kapal haok dunya par nao Bali brei padeih saong yaok ribau  urang panduan ba nao labik karei.

Rajaei Slovenia brei oh mek jien je abih di nyu nan lac jien ndien ka dom baoh sang tal puac bilan 6 piah jhul tagok dom nang luong tai tao saong takik jang naong trak ka jien ndien glaong ka urang pandar. Meng thun 2022, Slovenia hu patakik yaom jien ndien baoh sang meng bruk trun jien je saong salih tapa tanut yaom biar abih. Min, meng bilan 11 thun blaoh rajaei salih tapa tanut yaom karo kajap lac 77 euro ka yaok megawatt mon saong abih tukvak nan dalam puac bilan 2 ini.

Tui Gah Y te Dunya, labaih 99% bhap bini di dunya daok dalam yawa langik njom nerak tachrauk. Dalam nan hu labaih 500 trieu uranaih di dom taneh ia Đông Á saong Thái Bình Dương daok harit  yawa langik oh siam saong bruk njom nerak hu pambuak tal bruk metai di 100  uranaih umo ala 5 thun yaok harei. Yawa langik njom nerak, hu jru mek atau dom asar dhur mur klik meda tame rup manuac, ba tal 7 trieu urang metai tuk umo daok ranaih yaok thun./.