Malam kabroi 30/10, Ban Thuong truc Uy mban Trung uong Mat tran negar Viet Nam peih Harei brei Yai bao chi dalam negar pacang caga, palai pajua, kanjah jhak mbang ka V. Ndom meyai di harei raya Thu tuong Phạm Minh Chính ndom lac: Patagok khang bruk hu makna di bao chi, padang kapul dom urang ngak mbao “karo kajap, oh kadhun anak dom kan kandah; khang hatai anak dom bruk pachot pagat; tapak hatai, kham merat ka ilamo chinh tri; kham merat, jak sarak ka bruk ngak di drei; siam mekre dalam ngak bruk;  khang hatai meraik”, nao dahlau, naih gheih, meraik oh ein palao ka kol duas tham nhung, ngak palai pajua, kanjah jhak ngan haong hatai “thep dalam mbut – apui dalam hatai”.

Tinh Dac Lac birau peih Nyaom biai pathau khan bruk ba khaw tin pambuak, pathau khan ka bruk ngak po palei negar. Nyaom biai lac mbang pasram akaok meti dalam dom bruk  hu peih nhgak di 4 xa bhum taphia negar nan lac Ia Lốp, Ia Rvê, Ea Bung saong Buôn Đôn, piah paglong  bruk pathau khan pambuak dom gah, dak padang bruk khik iek palei negar di taong abih bhap bini hu khang kajap, ba mbuan lagaih dalam bruk cakrok patagok  kinh te -xa hoi saong pakhang pakajap bruk jum pataom bangsa di bhum jiak taphia negar.

Sang iek ruak Từ Dũ Ban raya Ho Chi Minh bahrau salah blaoh Pasak MRI 3.0 saong labik pasiam prein – pasiam prein daong chip. Pasak hu caga majam MRI 3.0 Tesla ngan haong ilamo kong nghe AI naih gheih, daong sang iek ruak pasang iek njauk saong samar chip taong dil samu rilo ruak hakik srau kadau, meng nan ba tabiak jalan taong ruak siam lagaih, dil samu. Bruk pandar ilamo kong nghe ini daong paglaong bruk duah mboh samar dom ruak hakik kan kandah yau ung thu, dot quy, dom asal kadha ka than kinh, hatai baoh, ralo talang atuk…

Urak ini, tinh Gia Lai daok 424 gilai ikan oh ginup harak gal nao ngak mbang di tathik, kayua mbuan ngak suan hukum IUU. Yau nan min, bruk padeih nao tabiak tathik  di dom kapal gilai  nan ba tal rilo po gilai saong urang ngak lahik bruk, raidiuk gaok rilo kan kandah, manuac sia  xa hoi oh lagaih. Mboh yau nan, HĐND tinh Gia Lai kham merat daong ka dom urang nao tathik saong  po gilai daong hu kuhria tui jien sumu 30 kilo brah sa urang dalam sa bilan. Langiu di nan, yaok po gilai hu daong 3 trieu dong sa bilan dalam bilan 9 thun 2025 tal abih thun 2025.

Malam kabroi, di Labik Do thi 5A, phuong Phú Lợi hu rah tabiak harei peih pakak Kapul peih bruk pablei salih ndap nda OCOP Ban Can Tho saong kaya karei di bhum taneh thun 2025. Kapul darak pasar dui pachreih di labaih 400 kadai kuan mai meng labaih 15 tinh, ban dalam negar. Kapul darak piah yaih khan ndap nda., pamaong tal pambuak urang blei saong urang pablei, peih praong darak pasar pablei ndap nda OCOP, ndap nda karei di bhum taneh, kaya Viet Nam siam glaong saong ndap nda kong nghiep palei pala naih gheih. Ini jeng lac bingun piah dom doanh nghiep, hop tac xa saong bhum palei taom gaok, ndom meyai, duah kein lagaih pambuak bruk.

Gilang pariak negar Nhat Ban khan lac brei khik tamo kein laba ala 0,5 %, njauk yau bruk langyah di urang ilamo. Yau nan min, anak tal hu sa mbang tagok jien laba di bilan 12, pambak tame patagok jien bilan thun anak tal. Dalam harak kinh te birau khan, Gilang pariak negar Nhat Ban mboh lac, bruk ngak kinh te Nhat Ban daok patagok gap mbiah, min khan brei thau ka bruk mbon khat lahik di gah langiu, yau sarak jien je di Tổng thống Mỹ, gaok kan kandah kayua  bruk pandar trí tuệ nhân tạo (AI) di dunya.

Dalam tuk bruk peih praong EU daok dui pachreih chinh tri bahrau, sa mbang pasang duah iek bahrau brei mboh labaih meteh rahra chau Au njauk hatai ka bruk ini. Dom negar dalam EU njauk hatai peih praong kapul ka sa dalam nan hu Thuy Dien, Dan Mach saong Litva. Cagar veik, Ao, Cong hoa Czech saong Prang lac dom negar takik taduan bruk peih praong EU. Maong yaom, mbang pasang duah brei mboh labaih 2/3 urang rahra chau Au njauk hatai peih praong kapul ini.

Australia daok kuhria ka bruk duis tui kapol nyaom daok daK harei dak rilo di taneh ia ini. Dom kapol nan lac dam dra radaih umo, mai meng negar Tay. Kadha njauk ndem meyai lac dom kapol nan mong tal dom ranaih kumei jaik jeng dara. Tuk palua pagat hu uranaih, dom kol duis pagat atau pasang iek saong padrah dom adei  ngak dom bruk mbuan gaok bala. Bruk nan piah ngak bui ka urang atau piah hu angan je di mang xa hoi.