Ngak tui Hukum Ngak bol lin, meng page ini 13/2 tal harei 15/2/2025 peih bruk jao saong taduan urang ngak bol lin di grauk negar, dam dara di grauk labik dalam Negar hu tagok jalan nao ngak bol lin thun 2025. Piah srap gap siam ka bruk pilih ruah bol lin, tal tuk ini dom bhum palei jao bol lin saong gah taduan bol lin hu bhian sua tangi javap calei pambuak gauk, njauk hatai saong ngak catang dom gah dalam bruk pilih ruah bol lin khik kajap hu ginup, prein yava siam saong karo salamat.

Melam 12/2 lac melam ia bulan Pomi, di tapen Ninh Kiều, Ban Cần Thơ peih ngak Harei Ariya Viet Nam mbang ka 23 ngan haong kadha “Pahadar Ndang hadah hadai - Uan Bilan pataih Thun Ula Naih 2025”. Ini lac tukvak piah ka dom nghe si brei mboh hatai anit ranam bhum palei, taneh ia, pabak prein khang ka ariya panuac daoh Cần Thơ dak harei dak khang kajap cakrok patagok, ban yam tame thun 2025 ndung bak makna - janam birau, jaman uak drei patagok; tui nan, salam uan raok dom bruk  pataom iek veik dalam 50 thun Akayat Nghe thuat Viet Nam hadei taneh ia yasa baoh negar.  

Jeng dalam harei kabroi 12/2 – Harei Po Rami bilan Sa tui saka ia bulan, yaok ribau rahra mai tal sang baha labik Quan 5, Ban raya Ho Chi Minh piah likau phol, likau siam mekre salamat akaok thun bingun Tet Nguyen tieu. Harei Tet Nguyen tieu thun ini, rahra daok pataom di dom jalan piah iek kapul urang dieu hanh angaok jalan di 1.000 urang dien vien dalam dom kadai kuan pataom gauk di urang bangsa Lo, dom kapul Lân – Sư – Rồng di dom quan 5, 6 saong 11. Ini lac bruk naih gheih yaok thun hu rahra saong tuai damuai cang maong.

Urak ini, dalam tinh Cà Mau hu 4.400 baoh sang khin hu daong, kuhria abih tih phun jien jaik 235 ti dong. Piah jhul pasamar bruk ngak brei abih baoh sang oh daok taik tahak, UB bhap bini tỉnh hu tacei pato dom gah, dom bhum palei peih ngak catang saong sumu gauk. Tui nan, pachreih dom bhum palei, jak ba manuac sia rik jien padai tame piah daong ngak siam sang daok, tui jalan sahaneng “ thei hu hagiat daong nan, hu prein daong pein, hu pandap daong pandap, hu rilo daong rilo hu takik brei takik”.

So Ngak nong saong Patagok palei pala tinh Tay Ninh patabiak sarak kakei dahlau bruk apui mbang glai di pakat 5 – pakat biak kan kandah, kayua rilo harei oh hu hajan, langik pandiak thu lagu, kuhria meda hu dui atah dalam rilo harei anak tal. Tay Ninh urak ini hu jaik 66.500 ha glai daok hu pacang khik. Dahlau nan, piah pacang cakak bruk apui mbang khuah glai, Chi cuc Pasang iek glai tinh Tay Ninh hu pandar dom gah po glai patui veik ngak siam bruk pasang iek, ramik hacih sa-at dom hareik harom; peih bruk pasang iek luac harei 24/24 mon dalam harei saong srap gap urang menuac, radaih di labik mbuan rah tabiak apui mbang glai, piah samu daong tuk rah tabiak apui mbang glai…

Mentri Yasa  Hàn Quốc khan lac, Triều Tiên hu khan ka Gah Kapal haok pajeng rahra Dunya ka bruk cakak klaok oh pambuak pasang iek jalan par angaok langik thong Han Quoc. Yau nan min, Rajaei Han Quoc brei mboh bruk sahaneng lac jalan pambuak nan njauk brei khik veik saong urak ini daok ngak bruk. Urak ini, jalan pambuak nan oh hu pandar kayua oh hu  kapar haok par pambuak tal Trieu Tien. Yau nan min, daok mboh hu rilo mbang iew phone bhian rah tabiak mon 7 tuk yaok harei piah pasang iek jalan pambuak.

Thai Lan meda brei kaoh klaoh sarak pakauk pablei alak dui atah 53 thun dalam biar harei saong dom harei roya Agama Bhat piah jhul pachreih gah yulit. Thu tuong taneh ia ini brei thau dom roh duah hu pataom tame dom bruk kanjah jhak di sarak pakauk ngan haong gah yulit, gam haong nan brei mboh Thai Lan jeng meda khik kajap dom urang umo dam dara oh menyum alak mbie tuk peih cadu dom adat hukum, parilo jien mek tame ka dom urang ngak mbang pablei salih saong jhul tagok gah yulit.

Dalam tuk jit ruak kum manuk ada pambak praong, rilo kuan pablei pandap dalam negar Mỹ mboh lac bruk kurang baoh manuk ada dalam tuk tagok yaom, rilo urang caong khin blei saong bruk ngak tabiak daok kurang. Urak ini, yaom baoh manuk ada  labaih 0,4 cent, sumu 10 ribau dong Viet Nam sa baoh, glong abih kuhria meng thun 2015. Tui Mentri Ngak nong Mỹ, labaih 150 trieu manuk ada  ba nao am cuh klak piah pacang caga jit kum manuk ada kuhria meng thun 2022. Kuhria dalam 30 harei tapa,  150 taphon manuk ada di Mỹ dut mboh njom virut H5N1./.