Harei ini (1/12), Peih ngak “chien dich samar padang ngak, ramik pasiam sang daok ka bhap bini rahra bhum ia sua” hu peih ngak sumu gauk harei ini di tinh Dak Lak, Gia Lai, Khánh Hòa ngan haong phun jien 170 trieu dong sa baoh sang. UBND tinh Đắk Lắk peih ngak tui klau baoh sang plaik njiak ribuk. Kuhria ngak pabak tui dom baoh sang jaleih brei padang veik, Mentri Quoc phong hu jao bruk padang ngak 215 baoh sang dalam abih tih 684 baoh sang. Dom baoh sang daok veik kayua  dom don vi UBND tinh Dak Lak  padang ngak.

Tinh Gia Lai daok sami samar padang labik daok ka bhap bini di 16 bhum taneh mbuan gaok bala glong. Kuhria abih tih jien labaih 1.840 ti dong, piah padang hatang, daong tapak ka  bhap bini saong mek taneh padang ngak. Akok UBND tinh Gia Lai khan lac, piah padang veik labik daok hu samar saong lagaih, dom bhum palei brei ngak katut veik, pasang iek,  ba tabiak jalan kuhria labik daok pablak tame. Dalam nan, brei panduan ba dahlau bhap bini daok tapen tathik hu sang jaleih. Langik rah tabiak gam gam khat lahik biak trak ka Gia Lai, hu labaih 11.636 ti dong saong labaih 71.000 baoh sang gaok kan kandah.

Urak ini, kuhria abih tih urang y te palei, puk paga dalam tinh Ca Mau lac 2.085 urang. Piah ngak hu sumu gauk tui hukum, UBND tinh  poh tagok HĐND tinh likau jalan ngak, khik tamo jien daong ka urang jakar y te palei, puk paga meng 0,5 saong 0,3 mbang dut sang  jien bilan co so sa urang sa bilan. Jien daong nan lagaih haong bruk ngak kinh te xa hoi di bhum palei, kuhria ginup bruk iek glang prein yawa camereip ka bhap bini bhum palei. Kuhria abih tih  bruk peih ngak sarak daong angaok nan dalam sa thun labaih 18 ti dong.

Bhap bini TPHCM di dac khu Côn Đảo sang xã kaoh pulao Thạnh An, gam haong 16 don vi xã phuong an toàn khu lac: An Nhơn Tây, Bình Chánh, Bình Hưng, Bình Lợi, Cần Giờ, Hiệp Phước, Hưng Long, Nhà Bè, Nhuận Đức, Phú Hòa Đông, Tân Nhựt, Tân Vĩnh Lộc, Vĩnh Lộc, An Phú Đông, Phú Thọ Hòa, Thới An meda hu daong the BHYT. Ndem ka sarak daong tui bruk ba tabiak, njauk ndem tal lac sarak  daong 100% jien blei BHYT ka bhap bhap bini di dom xa ini. Bhap bini brei hu labik daok saong du lieu hu ba tame  he thong bhap bini hu brei the BHYT.

Bruk ia dauk rah tabiak di xã Mỹ Tú, ban Cần Thơ kayua gaok ribuk saong ia ndik ba tal khat lahik biak trak ka mikva. Dalam nan khat lahik labaih 10 ha padai birau tam drak birau, labaih 15 ha padai yuak hu saong labaih 11 ha phun mbang baoh, njam patam. Oh lac phun pala, bruk raong ikan đăng quầng, ba bruk ngak mbang hu makna biak praong ka bhap bini bhum ia dauk. Tui UBND xã Mỹ Tú, thun ini langik rah tabiak oh lagaih, ba tal khat lahik biak ralo ka gah ngak nong di bhum palei.

Cuc So huu tri tue Pakat negar Trung Quoc khan brei thau dom bruk praong piah patagok so huu tri tue di taneh ia ini dalam 5 thun tapa. Cambaic laic, dom harak bằng roh duah ngak tabiak di Trung Quoc ngak hu tal 5 trieu, hu jeng taneh ia akaok meti ngak hu bruk nan di dunya. Dom harak likau taduan bruk roh duah birau pakat dunya  dang kaok dunya  dalam thun ka 6 gam gam. Taka so roh duah dunya thun 2025 mbang akaok meti hu dak angan dang dalam 10 taneh ia, ngan haong nyaom roh duah  "Thâm Quyến - Hong Kong - Quảng Châu" dang akaok di dunya.

Mexico taduan hu labaih 15.000 mbang urang njom HIV birau dalam 9 bilan, kuhria abih tih urang ruak tagok tal labaih 370.000 urang hadei labaih 4 pluh thun jit ruak HIV/AIDS tamuh tabiak. Di ban ine Mexico City, yaok 10 urang dut iek hu ye hu 2 urang njom ruak HIV. Bruk ba tal hu rilo urang njom ruak lac kayua jalan sahaneng di bhap bini ka ruak kan kandah daok biar, ilamo sahaneng kuhria caga dalam nyaom dom urang daok biar saong kurang tacei pato dom jalan pacang caga ruak dahlau.

Hu labaih sa trieu gom Noel saong labaih 250 bruk padang ngak, baoh sang Gollnhuber di Áo ngak baoh sang saong mblang sang di drei jeng labik bilan la-ar biak mekre, pachreih yaok ribau tuai damuai yaok thun. Bruk ngak mekre baoh sang praong laneng lanoi 1,3 mẫu Anh di baoh sang labaih 4 bilan kuhria caga saong hu 4 bilan piah yak klaak tuk abih Noel di harei 6 bilan 1. Baoh sang Noel di sang  Gollnhuber oh lac labik mai Noel bo daok lac sa thaok binguk di bruk klak rabha./.