Harei ini, harei ngak bruk ka 2, Mbang nyaom ka Sa, Quoc hoi Mbang XVI, Quoc hoi  ginum biai ka urang jakar, palih ruah Po negar, Thu tuong Rajaei, Phaok akaok negar, Chanh an Toa an bhap bini pakat glong, Akok Vien kiem sat bhap bini pakat glong. Dom urang lambaok vakil khan brei thau kham merat saong caong khin bruk palih urang jakar tame ngak bruk jeng yau ngak salah harak gal saong pamong tal bruk patagok kinh te - xa hoi vaktu meng thun 2026 -2031. Tui dom urang lambaok vakil, ini lac mbang peih akok bruk ginum biai, hu makna biak praong, ba tabiak rilo bruk praong, meng bruk urang jakar pakat glong tal ba jalan ngak brei cak rok patagok kinh te- xa hoi, khik kajap an ninh, quoc phong dalam vaktu birau.  

Jalan peih drah samar CT.33 gah akaok pambuak haong jalan peih drah samar Ben Luc - Long Thanh, gah daok veik  pambuak  Châu Đốc - Cần Thơ - Sóc Trăng, atah labaih 150 km jaik si padang ngak. Kuhria jien buh tame  ngak 90.000 ti dong, tui jalan karja saong urang padang ngak (PPP). Jalan pambuak bhum tapen tathik Bhum taneran kraong Cuu Long saong TPHCM. Mentri Padang ngak caong khin, po buh jien tame  roh duah brei ramik jalan ngak hu siam lagaih abih, pabak ka bruk nao mai di bhap bini, duh ka bruk cak rok patagok kinh te-xa hoi. Tui nan, roh duah jalan peih drah samar gah angaok glong, rik tame langyah dom bruk kan kandah ka kaya kan ndap nda piah ngak.

Kapol Chu thap do tinh Vinh Long pambuak haong Sang bac Dai hoc Su pham Ky thuat Vĩnh Long peih ngak Harei alin brei darah halan hatian, pachreih tui “Harei taong abih bhap bini alin brei darah halan hatian 7/4”. Dom thun tapa, bruk jak ba gauk halan hatian brei darah di Vinh Long hu jeng bruk anit ranam, rik tame  biak praong brei darah daong urang ruak saong jru ruak ka urang. Bingun ini, Mban tacei ba urang halan hatian brei darah hu meyaom 24 baoh sang saong 206 urang naih gheih dalam bruk halan hatain.

Dalam 3 bilan akaok thun, tinh Gia Lai taduan raok labaih 4,2 trieu mbang tuai damuai mai rivang ma-in yulit, tagok 14% dut saong tukvak ini thun dahlau. Dalam Quy II, tinh patui bruk jhul pakhang pachreih gah yulit saong rilo taneh ia yau: Harei Ilamo dom bangsa  tinh mbang V; Kapol pakacah the thao dom bangsa takik; Roya Yulit he “Gia Lai – Labik rivang ma-in biak mekre”; gam hu dom danak dak yaih khan di negar langiu saong kaya kan biak karei krih. Khan tapa dom bruk nan, tinh Gia Lai caong khin padang sa labik mai rivang ma-in biak gheih pachreih tuai damuai dalam saong langiu negar.

Ban raya Ho Chi Minh saong dom tinh, ban Nam Bo daok dang anak bilan thu gam langik pandiak catang. Tukvak langik pandiak catang meng mon tuk 12 tal tuk 15 yaok harei. Dalam dom harei anak tal, langik pandiak di gah Meraong negar meda tagok glong jang, meng  35 tal 37 do C, hu labik labaih 37 do C. Dalam bilan 4, langik pandiak catang abih di bhum Ia harei trun meda meng 36 tal 39 do C, glong jang dom thun dahlau, langik oh lagaih.

Mỹ saong Iran taduan hu sa harak padeih cuh dui atah meng 45 harei, gam peih pabah jalan eo tathik Hormuz, piah ba mbuan lagaih ka dom bruk ginum biai padeih mesruh metak. Yau nan min, dua gah oh ka khan brei thau hagait. Dom jabat khan brei thau tukvak 45 harei caong khin hu ginup bruk ginum biai pambak praong piah ba siam veik haong gauk brei padeih mesruh metak.

Jabat Khik iek pacang Bala Pakat negar Afghanistan khan brei thau hu takik abih 110 urang metai, 160 urang njauk rambuac saong 7 urang lahik hadei hajan praong dui atah rah tabiak di ralo labik dalam 11 harei tapa. Bala meng langik ngak palai tayak 958 baoh sang, ba theik labaih 356 km jalan mbak, ngak glut jaleih labaih 15 ribau 500 hecta taneh pala drak, tui nan ngak talah ribaong kraong.

Sa urang ndik ceik di bang Arizona (Mỹ) daok ruak trak hadei danko duis labaih 100 labik angaok rup di puac adit blaoh. Gah daong hu ba kapal ahaok mai labik ini, ba urang tagok tui jalan cap daong bala dahlau tuk ba tame sang iek ruak. Urang jru ruak  brei thau urang ini ruak trak. Adit dahlau, 5 urang jeng danko dius kaik di mblang pakacah padhih the thao, dalam nan hu sa urang brei ba tame sang iek ruak./.