Meng harei 15/5 anak tal, yaok urang brei hu ma angka so harak gal bac megru piah pasang duah hoc ba, harak tamat bac, harak mbaoh tangin di angaok VNeID, salih ka harak bi-ar. Ma so harak gal di menuac urang hu pandar ngak ma khoa tame piah pandar du lieu harak gal bac megru luac rai di urang bac megru khik piah dalam co so du lieu pakat negar ka gah pato megru. Dom khau tin meng hoc ba, harak mbaoh tangin ka ilamo, bruk bac megru hu di angaok he thong du lieu ini daok hu ngak lek taka, pataom tame pandar VneID, khik piah miat miat.

Tui Kapol njam patam baoh karaoh Viet Nam, dalam 3 bilan akok thun ini, gah njam patam baoh karaoh Viet Nam hu mboh bruk patagok glong, jiej mek tame meng bruk pablei baoh kayau tabiak negar langiu labaih 1,48 ti dola My, tagok 27% dut saong thun dahlau. Dalam nan, baoh durian hu pablei tabiak negar langiu ralo abih dut saong dom janih baoh karei. Tapa 2 bilan akaok thun, baoh durian pablei tabiak negar langiu mek jien tame hu 146 trieu dola My, tagok 177% dut saong tukvak ini thun dahlau. Trung Quoc lac negar blei ralo abih baoh yau di Viet Nam, patui nan lac Mỹ, Hàn Quoc saong Nhat Ban.

Tal abih harei 30/3/2026, Ban raya Ho Chi Minh hu 9.100 mbang ruak tangin takai pabah, tagok jaik dua mbang dut saong tukvak ini thun 2025. Amuk Lê Hồng Nga, Phaok Yam ndok Pasak Pasang iek Ruak hakik Ban raya Ho Chi Minh brei thau, njauk caik hatai lac, bruk pasang iek hu mboh bruk tamuh veik di virus Enterovirus 71 (EV71), ini lac makna ngak tamuh rilo mbang jit ruak praong. EV71 hu janih mek jhak tachauk glaong, pambak samar saong mbuan tamuh ruak trak karei. Anak bruk ini, gah y te Ban raya Ho Chi Minh hu patagok bruk pasang iek saong kak kajap dom bruk caga ruak.

Uan raok Tet Chol Chnam Thmay di urang bangsa Khmer,  urang ngak praong di Tinh uy Vinh Long padang kapol urang mai rivang, tadhau ayuh Tet dom labik, dom baha dalam tinh. Di dom labik hu mai rivang, Bi thu Tinh uy Vĩnh Long ong Trần Văn Lâu payua panuac tathau ayuh thun birau tal taong abih acar sư sãi, Mban khik iek baha saong bol bhap Khmer. Urak ini tinh Vĩnh Long hu labaih 353.000 bhap bini Khmer diukrai, meblah labaih 10% bhap bini. Bruk khik ramik saong patagok ilamo meng kan, abih di nyu nan lac dalam dom tuk rija roya, Tet tuk halei jeng hu karja bhum palei  sangka ba mbuan lagaih piah ngak.

Kong an Ban raya Ho Chi Minh bahrau taong tayah jalan talei khik piah, pablei salih suan hukum jru phil pambuak tinh meng Campuchia, kaoh duas 26 urang, pataom mek rilo jru phil, phao ndao. Jalan talei kol duas jru phil mek “halau kaya” meng Campuchia ka bruk ngak pambuak tinh Ban raya Ho Chi Minh, Can Tho, An Giang, Tay Ninh, Dong Nai ngan haong dom jalan ngak biak sanak jak, bruk “pambuak gauk” di nyu biak srau kadau, sanak jak saong khin srap gap ngak kan kandah tal urang. Dom kol duas pan akaok hu rilo bruk ngak suan hukum ka dom duas: pablei salih suan hukum jru phil, blah mek drap ar; pandar urang dalam sang piah padauk, pajeng ba saong pablei jru phil.

Karja Tong thong My Donald Trump brei atah klak hukum taong phat Tổng thống urak ini di negar Venezuela, bruk ini yau brei mboh salih siam di dua gah. Bruk atah klak nan brei adat ka dom doanh nghiep Mỹ pambuak haong karja Caracas, njauk ndem tal gah nang luong saong bruk buh jien tame ngak mbang. Mỹ jeng brei cadu trun meneing dom jalan taong phạt ngan haong  gah nang luong di Venezuela, brei adat ka dom kong ty  kuac mek saong pablei salih xang menyek.

Dom negar hu rilo urang Islam dalam nan hu Pakistan, Thổ Nhĩ Kỳ, Ai Cập, Indonesia, Jordan, Qatar, Ả Rập Xê Út saong Dom negar sit Ả Rập Thống Nhất gam gam ndom catang ka bruk di Israel tuk brei tapa adat pametai meng bruk tual takuai ngan haong urang Palestine njauk kaoh duas di toa an bol lin kayua dom mbang taong tame ngak metai menuac. Dom negar ini ndom lac, hukum ini lac sa bruk ngak kan kandah saong ndom catang ka bruk njauk hu samar chip piah brei ein ka dom bruk mbuan ngak tagok bruk srau kadau di labik.

Meng akaok thun mbiah tal ini, Indonesia taduan hu 16.355 urang njom ruak soi, dalam nan hu 10 urang metai. Njauk caik hatai, hu dom bac si di Tây Java metai. Rajaei Indonesia peih ngak rilo bruk klauk jru caga ruak di dom labik gaok kan kandah saong mbuan njom ruak. Tui nan pakhang dom jalan pacang caga, pasang iek dom ruak mbuan njom mbak ralo di dom labik y te, khik brei ginup tukvak padeih padei ka urang jru dom janih ruak njom mbak./.