Yaom lac ruak asau maruai kaik meda hu pacang caga siam lagaih meng vaccine, min yaok thun Viet Nam kuhria rah tapa hu labaih 75 urang metai. Daok meng akaok thun tal ini, dalam negar hu 59 urang metai, dalam nan gah barak negar hu tal 42%. 100% dom urang metai kayua ruak asau maruai kaik jeng oh ka klauk vaccine caga atau pandar huyet thanh caga ruak hadei njauk asau kaik, rilo meng lac mai meng bruk klak tapa oh maong tal. Dong Nam A hu maong lac bruk rah tabiak rilo ruak asau meruai kaik kayua  palao asau di langiu rilo saong jeng daok bruk pablei salih, mbang ralaow asau mayao.

Patui danak dak taom gaok cu tri dahlau mbang nyaom ka 10, Quoc hoi  mbang XV peih tabiak, dom kapol urang Quoc hoi tinh Dong Nai taom gaok cu tri di 6 xã, phuong di tinh. Di xã Thống Nhất, cử tri khan lac urak ini yaom jru taong ruak ung thu daok glong, ngak kan kandah biak ralo ka urang ruak sang kathaot. Yaom lac hu dom sarak daong yaom min oh ginup piah trun naong trak jien padai ka urang ruak ung thu. Langiu di nan, cu tri jeng caong khin Mentri Y te brei hu jalan ngak cambaic laic  piah Sang iek ruak Chợ Rẫy 2 samar tame ngak bruk, pabak tui hatai caong khin jru ruak ka bhap bini di bhum gah Meraong negar piah trun prein ngak bruk ka Sang iek ruak Chợ Rẫy urak ini.

UB Bhap bini tinh An Giang daok pasang iek kadung jien tal puac thun 2025 saong dui pachreih gah buh jien tame ngan haong danak dak di langiu kadung jien. Akaok UB Bhap bini tinh An Giang Hồ Văn Mừng pandar pataom tame ngan haong harak angan 19 danak dak hu ginup kein lagaih, meda hu ngak tui jalan buh jien tame dalam thun ini; rabha bruk cambaih laih, ngak tui 6 njauk (njauk bruk, njauk urang, njauk tukvak, njauk kaya, njauk thau ka gah daong, njauk thau ka bruk di drei). Ngan haong 40 danak dak daok veik, samar chip salah blaong huklum, pilih ruah gah buh jien tame…

Adat ngak yang Nghinh Ong Can Gio 2025 meda peih ngak meng harei 5 tal harei 7 bilan 10 anak tal. Ngan haong bruk ngak ilamo, daoh tamia, ma-in sambai, padhih the thao, adat ngak yang ini oh lac pok meyaom dom ilamo siam gheih di bhap bini bhum tathik, bo daok brei mboh bruk iek praong ka tuai damuai, anit ranam, ilamo daong tame patagok gah ngak yulit di TPHCM. Dalam nan, bruk praong di adat ngak yang Nghinh Ong di tathik page harei 7 bilan 10, rivang Kubo Liet si Rừng Sác, adat kakuh Thuong dai…Adat ngak yang Nghinh Ong Can Gio thun 2025, oh ngak 6 kadha kayua gaok kan kandah di danak dak lih tame tathik Can Gio.

Tinh Lam Dong daok pataom tame patagok rilo ndap nda rah rivang bahrau, siam glaong, dalam nan hu rah rivang danak dak, ilamo - raya adat. Bhum palei jeng pachreih gah buh jien tame dom labik me-in, bein bangu ka asal kadha praong. Jalan ngak ba tabiak lac dui pachreih labaih 23 trieu mbang tuai damuai. Piah mek hu jalan ngak ini, tinh brei patui veik patagok kinh te malam, jhul khang salih lek taka so rah rivang, gam haong nan pachreih rahra meng dom paok hu kein laba, pambuak haong gah ahaok par, jalan pasei saong gah ngak mbang pablei salih rah rivang piah ngak jeng ndap nda dui pachreih.

Akaok negar Trung Quoc Tập Cận Bình hu kadha bac tapa video di nyaom biai langik tathik di LHQ, khan brei thau ka dom bruk pamong tal piah cakak trun thak nerak ngak jhak tal hieu ung sang camin. Urang ngak praong Trung Quoc iew bhap bini dunya khik kajap jalan ngak njauk, gam ndem puac ka dom taneh ia cagar veik bruk ngak khik siam alam langik, yau ndem bau tal Mỹ. Tui nan khan lac, tal thun 2035, Trung Quoc brei trun tathuakthak nerak meng 7 tal 10% dut saong tuk tagok glong.  

Lien minh chau Au daok kakei brei ka sa thun umo sit abih ka urang pandar mang xa hoi, piah patagok bruk pacang khik uranaih anak dom kanjah jhak meng labik online. Urang brei panuac ndom meyai di Uy mban chau Au Thomas Regnier tacei tabiak dom duh hatai, yau di Duc, labik hu meteh uranaih umo meng 6 tal 13 thun hu pandar TikTok. Javap calei ka khau tin ini, urang lambaok ka TikTok di chau Au brei thau, yaok mbang ung dung ini tayah klak labaih 6 trieu tai khoan oh hu ginup thun umo dalam dunya.

          Dom kong ndoan Pháp khan brei thau bruk ndok padeih ngak saong trun jalan birau di taneh ia ini harei 2 bilan 10 anak tal. Panuac iew da-a brei padeih ngak saong trun jalan veik hadei dom mbang ginum biai oh padeih ngan haong Thu tuong birau di Phap Sebastien Lecornu. Adit dahlau, dom mbang trun jalan pambak praong piah caga veik ka dom jalan ngak “ ien jien cai pandar” birau saong sarak salih birau jien bilan padeih hưu.