Meng harei ini 1/4, klau jabat bao chi praong lac Rayo papar binguk Viet Nam (VTV), Rayo Sap ndem Viet Nam (VOV) saong Thong tan xa Viet Nam (TTXVN) lac don vi su nghiep di BCH Trung uong Dang. Tapa dom jaman, Rayo sap ndem Viet Nam (VOV) hu dom bruk rik tame biak praong saong hu dom bruk cakrok patagok. Tame vaktu birau, VOV patui veik bruk ngak di jabat pathau khan praong, rilo gah brei nao dahlau di Viet Nam, njauk ndem tal gah papar sap saong bao chi; khik ramik, peih pambak praong asar kadha saong bruk hu bhap bini pambuak tame tapa dom nen tang so.

Tui bruk ba tabiak hu TP.HCM ba tabiak, mbiah tal puac bilan 4 ini, TPHCM brei pagam 60 balai sạc, 3.000 tu salih pin labaih di ban raya; piah tal puac thun ini hu 100 balai sạc, 20.000 tu salih pin. Urak ini, So Padang ngak TPHCM brei pandar 300 labik, 850 tu. Yau nan ye, mbiah tal ini, dom doanh nghiep  hu pagam 173 labik ngan haong 411 tu. Dom tu, labaik salih pin brei ginup tui bruk ba tabiak di Ban raya.

Tinh Ca Mau birau palao labaih 2 trieu drei hadang pajaih di bhum tathik Gành Hào piah ngak brei parilo kaya ia. Urang ngak praong di Sở Ngak nong saong Alam moi truong  tinh Ca Mau khan lac, bruk paglong jalan sahaneng bruk ngak di kapol nyaom, urang abih di nyu lac bhap bini urang nao ngak di tathik, pasiam veik saong parilo kaya dalam ia; rik tame  ngak brei patagok gah kaya ia hu kajap. Bruk  palao pajaih  njauk tui ilamo, palih ruah hu lagaih yaok labik ia mbak atau taba.

Pasak pasang iek ruak kik Ban Can Tho ( CDC Can Tho) khaw tin, urang ruak tangin takai ca mbuai parilo dut saong tukvak ini thun dahlau. Dalam 3 bilan akaok thun  ban ini hu 954 mbang. Dalam nan, phuong Ninh Kiều, phuong Cái Răng  lac labik hu rilo urang ruak ralo. Anak bruk nan, CDC Cần Thơ kakei, bhap bini juai huac kanda, brei ngak tui jalan pacang caga. Meyah lagaih, brei nao klauk jru caga ruak.

Tui Pasak Kuhria iek langik tathik pakat negar, meng harei 1 -2/4, di bhum ĐNB langik pandiak catang  meng 35 -36 do C, hu labik 36 do C, thu lagu, meng 40-50%. Piah caga langik pandiak, dom urang y te kakei, bhap bini brei takik tabika gah langiu meng mon 10 tuk tal 16 tuk, meyah tabiak gah langiu brei cuh khan ao pacang rup, me-om tamo, cuah camin pacang meta…

Quoc hoi Campuchia brei khan tapa hukum birau piah chap mek hu abih dom labik pachot pagat dunya, sanya ngak brei hacih angaok mang dahlau bilan 4 thun ini. Meng thun 2025 mbiah tal ini,  Campuchia taong tayak 236 labik pachot pagat online, langyah jaik 700 urang ba kaok saong kol tui nyu mai meng rilo taneh ia karei di gauk.

Rajaei Indonesia birau ba tabiak dom jalan ngak brei patak pataom nang luong, dalam nan sarak ngak bruk di sang 1 harei sa adit. Tui nan, dom urang jakar ngak bruk harei suk yaok adit di sang. Langiu di nan, dom bruk brei patak pataom nang luong karei   jeng hu ba tame pandar brei takik pandar radaih karja ala 50%, pacheih nao meng radaih duh ka bhap bini. Urang hu radaih karei brei pandar takik jang 50 lit xang menyek  yaok harei.

Harak pathau khan harei in di Danak dak Patagok LHQ kuhria bhum Trung Dong  meda kuhria khat lahik jien padai tagok tal 194 ti USD kayua mesruh metak  rah tabiak. Danak dak Patagok LHQ kakei Rajaei  dom taneh ia  di bhum  taong yaom iek veik saong brei ramik veik dom sarak jien padai, kinh te- xa hoi, pika kuhria caga  hu siam anak bruk kan kandah kayua mesruh metak./.