Tui Mentri Lao dong - Thuong binh saong Xa hoi, dalam tuk Tet Nguyen dan Ula Naih 2025, hu labaih 1,48 trieu baoh sang kathaot, jaik kathaot hu daong, alin hadiah Tet haong abih tih yaom jien labaih 786 ty ndong. Dom bhum palei jeng chreih chrai ngak tui danak dak pakacah “Ba gauk ngak brei oh daok baoh sang taik tahak dalam taneh ia di thun 2025”, mek hu siam lagaih glaong. Rilo rahra hu daong piah raok Tet dalam dom baoh sang bahrau haong labaih 22 ribau baoh sang hu ngak salah blaoh saong jaik 20.500 baoh sang daok padang ngak.

Tui Uy mban Bangsa, bol bhap dom bangsa dalam negar uan raok Tet Nguyen ndan Ula Naih dalam bui sambai jum pataom, chreih chrai, siam mekre, salamat saong patak pataom. Chinh tri sron mbon, raidiuk rahra salamat, dom bruk di agama hu peih ngak tui njauk hukum karja…Hadei Tet, Uy mban Bangsa pakhang bruk duah thau raidiuk, bruk ngak mbang kinh te - xa hoi bhum urang bangsa takik. Tui nan tacei pato, peih ngak siam dom sarak bangsa, abih di nyu lac dom bruk praong di Danak dak pakat negar  bangsa takik saong bhum ceik gam haong dom danak dak, sarak bangsa daok peih ngak.

Tinh Hau Giang bahrau peih bruk Jak ba Tet pala phun bal pataih Ula Naih 2025. Ini lac bruk ngak tui panuac pato di Va Ho: “Bal pataih lac Tet pala phun, ngak ka taneh ia dak harei dak gheih siam”, gam haong nan pathau khan ka kein lagaih di bruk pala phun, tapa nan jak ba mikva chreih chrai hu mbaok tame pala phun pagam haong patagok kinh te - xa hoi, paglaong bruk pacang khik alam moi truong sinh thai, daong ngak brei trun takik bala, pacang caga haong bruk langik salih karei. Tui kuhria tukvak 2021-2025, Hậu Giang hu pala 8,4 trieu phun rilo janih.

Dalam mbang padeih Tet jien mek tame di gah yulit di Ban Cần Thơ kuhria hu 456 tỷ đồng, tagok 10% dut saong tukvak ini thun 2024. Piah hu salih birau nan, dahlau tuk Tet , dom doanh nghiep yulit peih ngak rilo bruk duh ka tuai damuai hu siam mekre, tuai jia hatai, chreih chrai rivang ma-in. Dom labik yulit jarah rivang dok peih ngak rilo bruk sumu gauk pachreih tuai damuai. Langiu di nan, gah ba tuai nao rivang ma-in  peih ngak rilo danak dak daong, alin brei tuai tut angan nao ma-in akok thun birau, raok Xuan taduan pandap, rik tame pambuak palagaih ka tuai damuai  mbuak takaik mai Cần Thơ jeng yau dom bhum palei karei.

Darak pasar blei thanh long di tinh Binh Thuan bui sambai gilac veik hadei Tet tuk rilo urang ikak kaiy blei rilo haong yaom glaong. Urak ini yaom blei thanh long hatai patih labaih 17.000 ndong/kg, thanh long hatai bhong labaih labaih 35.000 ndong/kg. Min, tanut yaom patui tame baoh, baoh gheih, baoh praong…hu urang ikak kaiy taong yaom tuk blei di bein. Dahlau Tet, rilo bein thanh long hu kuhria baoh pabak ka darak pasar Tet, dom banah karei caik piah pabak tuk hadei Tet nan jeng daok rilo bein hu thanh long pablei di tukvak ini.

Rajaei Indonesia birau ngak salah baoh kalan Murugan ka urang agama Hindu praong abih Đông Nam Á di Tây Jakarta. Hu padang ngak di taneh praong 4.000 met vuong, kalan  hu sa sang tabung glong 40 met saong sa rup patau Yang Murugan glong 21 mét. Kalan nan oh lac labik piah kakuh, bo daok lac rup thaik  brei mboh ka bruk oh lac agama halei di Indonesia, pakajap jang bruk pambuak sajarah dakrai di Indonesia saong Ấn Độ.

Urang jakar Philippines daok brei mboh bruk njauk duh hatai ka bruk dom uranaih umo meng 10 tal 14 thun metian jeng yau njauk ruak HIV di thun umo ini dak harei dak tagok samar. Urak ini bruk metian di kamei dara umo meng 15 tal 19 thun daok trun, min bruk metian di kamei dara umo meng 10 tal 14 thun daok tagok. Uy mban Rahra saong Patagok Philippines pandar pacang caga samar chip ka asal kadha ini kayua ngak kanjah jhak tal prein yava saong bruk daong kein lagaih di kapul rahra umo njauk iek praong nan, lac dom urang ngak bruk di harei hadei daong ka taneh ia.

Adat taduan truai Á vận hội bilan La-ar mbang 9 di ban Cáp Nhĩ Tân pak Trung Quốc hu peih ngak di harei kabroi 3/2. Ini lac mbang 2, Cáp Nhĩ Tân peih ngak Á vận hội bilan La-ar thun ini hu mbaok biak ralo manuac abih kuhria meng lavik mai, ngan haong 34 Ủy ban Olympic Taneh ia. Nyaom roya hu 11 janih  kuhria abaih tih lac 64  mbo huy chuong. Kapol urang pakacah pachrak ia patau khang Viet Nam hu ta-eng Dương Trường Lập umo 20 thun, lambaok  ka bruk pandih the thao negar drei tame pakacah bruk nan./.