Tui Mentri Ngak nong saong Moi truong,  ia ribuk sua di bhum Brak negar, bhum Kreh negar saong Tay Nguyen ngak palai pajua, ia dauk jaik 20 ribau hecta padai, njam patam saong phun mbang baoh. Dalam nan di bhum Brak Trung Bo, hu 483 hecta njam patam dauk dalam ia ralo lac di ban Huế. Rilo bhum daok dalam ia dauk oh ka kuhria hu ginup abih. Di Nam Trung Bo sang Tay Nguyen, hu labaih 8.460 hecta phun pala dauk dalam ia ribuk, khut metai. Lam Dong lac bhum palei khut khat rilo abih labaih 7.720 hecta  phun pala khut metai.

Tui Rayo kuhria iek langik tathik gah Meraong negar, meng harei ini tal harei 6 bilan 11, hajan praong ba tal ribuk khang ka 13 gam ia ndik tagok glong meda ngak ia dauk, dui atah di Ban raya HCM saong rilo tinh, ban gah Meraong gam hajan praong haong hangin khang, ia hajan  hu meng 70- 140 mm, gaok mai labaih 140mm. Njauk caik hatai, dom tinh Lam Dong, Dong Nai, Vĩnh Long, Đồng Tháp hu hajan praong, meng 100-150 mm. Dalam tuk nan, Ban raya HCM hajan praong meng 70 - 110 mm. Dalam tuk hajan hangin, meda rah tabiak hangin, jakala klak, hajan patau saong hangin khang.

Tui kuhria mboh dahlau, ia ndik tagok glong  meda tapa pakat 3 tuk ia bulan Pomi 9 tui saka ia harei, Chi cuc Thuy loi tinh Ca Mau peih kareik ngak bruk di labaih 300 brong pabah tathik, pabah ribong piah caga ia dauk, trun khat lahik ka bhap bini. Tui kuhria mboh dahlau ia tagok meng 3 -4,3 m, ia tagok glong di balai ia Gành Hào meda yam tapa pakat 3, meng 20 -35 cm. Akok UB Bhap bini tinh Ca Mau jeng hu iew brei pakhang bruk pasang iek jalan dien saong tacei pato bhap bini caga bala kayua dien, khik brei salamat ka bhap bini.  

TPHCM peih bruk dauh thau hatai bhap bini dalam negar ka danak dak pahadar urang plang metai kayua ruak COVID-19 di taneh ka 1 jalan Lý Thái Tổ (phuong Vườn Lài, TP.HCM). Danak dak nan lac bruk taduan saong meyaom dom bruk ngak, var  klak rup saong klah rabha  ka kaya jeng yau hatai anit ranam di bhap bini dalam negar “ daong prein, sa hatung hatai haong gauk” dalam bruk pacang, caga jit saong pasiam bruk ngak mbang kinh te - xa hoi. Danak daok lac sa kadha bac megru hu meng labik mai dalam sajarah dakrai biak njauk hadar miat miat, yau panuac kakei veik ka dom rai hadei. Danak dak kuhria ngak salah dahlau Tet Nguyen dan Binh Ngo - anek thak Athaik Wao thun 2026.

Harei Óoc Om Bóc - Pakacah ghe Ngo Ban Cần Thơ thun 2025 peih ngak meng ini tal harei 5.11 hu rilo bruk ngak ilamo, padhih the thao biak chreih chrai, bui sambai. Ini lac bruk ngak ilamo biak gheih di mikva urang bangsa Khmer daok di gah Meraong negar, brei mboh dom adat siam gheih meng kan mai saong jalan sahaneng  pambuak bhap bini. Piah khik brei salamat ka harei roya nan, Kong an Ban Can Tho hu peih ngak sumu gauk dom jalan, dalam nan brei caik hatai duah thau, pacang caga saong meriak haong kol kanjiak jhak; khik brei salamat jalan mbak, pacang caga apui khuah, daong urang gaok bala.

Tong thong Iran Masoud Pezeshkian khan lac, taneh ia ini padang ngak veik dom labik ngak hạt nhân “prein khang jang”, min oh duah ngak vũ khí hạt nhan. Tong thong Iran khan  lac, bruk bac megru gah hạt nhan daok dalam tangin di dom urang roh duah di taneh  ia ini, yau nan ye, bruk ngak tayak dom tabung sang glong saong sang mac hat nhan oh hagait kan di Iran. Dahlau di nan, Tong thong My Donald Trump khan lac brei taong tame veik dom labik ngak hat nhan Iran meyah taneh ia ini kham padang ngak veik dom labik bo My blaik mbom di bilan 6 meng blaoh.

Hà Lan meda jao ka Ai Cập rup patau meng 3.500 thun dahlau. Urak ini, rup patau ini srak tame thaot binguk sa urang ngak praong di jaman patao Pharaoh Thutmose III, lac urang klaik saong ba nao pablei truh negar Ai Cập, meda la dalam tuk mesruh sraw kadau di “ Bilan ban pataih A-rập” thun 2011, dahlau tuk tabiak rai senni  nghe thuat dunya.

 Sa bien the anek ruak dau mua khi birau urak ini daok njom mbak dalam bhap bini di Mỹ saong chau Au. Di bilan 10, bang California khan brei thau 3 urang njom ruak bien the dau mua khi birau. Dom urang ruak oh nao sirah rivang negar langiu dalam tuk vak jaik ini. Bruk nan brei mboh virus dau mua khi meda njom mbak dalam bhap bini min oh thau. Tui Gah Y te Dunya, meng akaok thun mbiah tal ini hu labaih 44.000 mbang urang njom ruak dau mua khi./.