Bruk jak ba ngak “ Tet anit ranam” Bilan pataik Athaik Waw 2026 kayua Trung uong Hoi Chu thap do Viet Nam peih bruk jak ba hu jaik 897 ti dong, daong ka labaih 1,5 trieu paok pandap Tet ka urang kathaot saong dom urang mbuan gaok kan kandah. Jien nan hu jak ba meng bruk daong di labaih 12.000 doanh nghiep, kapol nyaom, urang saong labaih 1.500 kapol halan hatian dalam bhap bini. Tapa nan, ba bruk bui sambai mai uan raok Bilan pataih anit ranam, pambuak talei rohim dalam bhap bini saong pambak praong bruk klak rabha hatai ranam piah daong ba urang karei. 

Metri Y te birau ba tabiak bruk daong 2 trieu dong ka urang kumei ndih tapui ginup dua urang anek dahlau umo 35 thun piah pachreih urang ndih tapui dalam tuk urang takik ndih tapui. Langiu di Mentri Y te jeng ba tabiak daong 2 trieu dong ka yaok mbang ndih tapui ka urang bangsa takik manuac atau daok di bhum palei takik manuac ndih tapui. Dom urang ndih tapui  hu palih ruah dahlau saong kuman hu daong jien.

Tinh Dong Thap caik hatai brei peih ngak rilo jalan piah daong ka urang jaoh jo hu bac megru, piah ba tame pambak praong bruk bac megru haong gauk. Mbiah tal thun bac 2025-2026, dalam tinh hu  678 sang bac, hu labaih 2.700 tal bac pato pakai ka labaih 3.550 anek saih jaoh jo. Di dom labik ini, langiu bac ilamo, anek saih daok hu pasram pato jalan diuk rai, thau ngak ka rup eng, ndem meyai xa hoi saong hu tame ngak bruk ilamo, padhih the thao piah patagok siam abih. 

So Padang ngak TPHCM, birau pataom hu 69 labik pagam tu salih pin ka radaih patuh di rilo tapen jalan. Dom labik pagam tu ralo di labik dom jalan praong, labik hu rilo bhap bini, jaik danak dak duh rahra atau dom labik jalan praong. Bruk brei thau dom labik pagam tu salih pin radaih ndien piah duh bruk pandar radaih di bhap bini.

Labaih di xã Hòa Bình, tỉnh Cà Mau birau rah tabiak bala ngak dua urang metai. Dahlau di nan labaih 12 mon harei 16/3, dua sa-ai likei Châu Tuấn saong Danh Sả Phol pah mai padang got jamang samar ka sang ong Lâm Văn Tỷ di palei Phước Thạnh 1, xã Hòa Bình. Dalam tuk padang, mac kuac lubang ngak gaok talei ndien di sang jaik nan ba tal sa-ai Châu Tuấn saong Danh Sả Phol metai. Urak ini, Kong an xa daok langyah bruk nan tui hukum karja.

Tong tong Mỹ Donald Trump khan lac Nhà Trắng brei padeih mbang nao rivang Trung Quoc  di ong, dalam tuk Mỹ daok pataom tame bruk mesruh di Iran. Tong thong Mỹ  payua panuac tal Bắc Kinh piah kadun veik mbang nao rivang hu makna praong nan 1 bilan saong ong jeng caong khin nao sirah rivang. Dahlau di nan, karja Mỹ jeng brei mboh bruk iek praong mbang nao rivang njauk bruk ba tabiak.

Rajaei Cuba brei palao 51 urang daok kareik di dom sang guk di kaoh pulao negar ini. Mentri Ngoai giao Cuba khan lac bruk peih palao urang guk dalam dom harei anak atal mai meng bruk pambuak talei rohim di Havana saong Vatican. Rajaei Cuba khan lac, kuhria meng thun 2010, taneh  ia ini brei an xa ka labaih 9.900 urang guk. Dalam 3 thun tapa, labaih 10.000 urang duis daok guk di Cuba jeng hu palao.

Sa mbang patuh phao tame sa palei di tinh Hajjah, gah Barak Yemen ngak takik di nyu 10 urang metai, labaih 30 urang njauk rambuac. Urak ini oh ka hu khaw tin ginup ka bruk patuh phao, yau nan min Rajaei Yemen ndem puac bol lin Houthi hu Iran  dang gah likuh. Tỉnh Hajjah lac sa dalam dom labik sraw kadau di gah Brak Yemen. Ralo labik di tinh ini daok khik di bol lin Houthi./.