Di mbang nyaom ka 2, Quoc hoi mbang 16 jaik peih papak, Rajaei pok tagok 4 danak dak hukum pambuak tal gah y te. Nan lac: Hukum Khik hacih sa-at kaya mbang (pabak pasiam veik); Hukum Alin brei, pagam mo, tame rup anek manuac saong alin, mek atau manuac (pasiam veik); Hukum pasiam veik, pabak dom asar kadha di Hukum Pacang, caga ruak kayua pakao hala saong Danak dak Hukum pasiam veik, pabak dom hukum gah y te, (dalam nan hu Hukum uranaih, Hukum Urang jaoh jo, Hukum Iek ruak - Jru ruak, Hukum Jru cavao, Hukum Urang taha umo saong Hukum BHYT). Tui Thu truong Mentri Yte Vũ Mạnh Hà, sahaneng luac tukvak pasiam veik Hukum Khik hacih kaya mbang “ pasang iek yaok bruk” salih tapa “ khik iek taong abih dom kaya kan” kuhria tui  bruk, meng tuk ngak tabiak tal tuk jeng kaya mbang.

UBND tinh Lam Dong birau ba tabiak sarak daong, pabak, rivang saong meyaom urang hu angan je gam kapol nyaom, urang naih joi dalam bhap bini bangsa takik. Tui nan, yaok thun, urang hu agan je hu mbaok tam dom tal bac pasram, pabak ilimo ka sarak hukum di Karja; hu mbaok tame bac megru di dom tinh karei. Sa thun urang hu angan je hu alin kaya 3 mbang; daong urang tuk ruak kik, kan kandah kayua bala meng langik. Tinh Lam Dong jeng hu meyaom dom urang naih joi dalam bruk ngak saong patagok kinh te.  

Jalan peih drah samar Bến Lức - Long Thành  brei peih radaih luac jalan. Ini lac mang akaok meti  jalan atah jaik 58 km pambuak atah, jeng sa jalan birau  pambuak gah Pei Meraong negar saong Dong Nam bo. Bruk ngak ini, yaok trieu bhap bini bhum gah Pei hu jalan nao birau mai bhum Pur negar, tame mblang kapal ahaok Long Thành, atau nao tal Vũng Tàu menei ia tathik abih takik tukvak jang. Kaya nong meng gah Pei jeng hu pajeng ba mai tathik samar jang, dalam nan hu dom tapen tathik Cái Mép - Thị Vải.

Meng akok thun mbiah tal ini, bala meng langik ngak khat lahik labaih 39 ti dong di tỉnh Vĩnh Long. Anak bruk rah tabiak sraw kadau, UBND tỉnh Vĩnh Long iew dom gah, dom bhum palei tui iek khaw tin, kakei dahlau; pasang iek dom labik tapen kraong, labik dhaong, labik glut jaleih piah panduan ba bhap bini hu samar; kuhria caga ginup manuac urang, kaya kan, radaih mac jamraih tui jalan “ 4 di labik”.

Hajan praong biar harei saong melam 30/9 ia dauk di Ban raya HCM daok praong tuk ia dalam tukvak katut panak, rah tabiak tuk ia ndik. Jabat khi tuong kuhria mboh dahlau meng harei ini tal harei 6 bilan 10 Ban raya HCM saong Meraong negar daok hajan, hangin tuk biar harei, melam, hu labik hajan praong gam ia ndik, abih di nyu lac biar harei saong melam. Dalam hangin, bhap bini duah tame labik salamat.

Dom kraong di Thụy Sĩ daok samar thu sit lahik labaih 5% ia khan patau hadei sa thun lahik ia khan biak samar dalam mbang pandiak glong abih di chau Au. Harak brei mboh, dalam 5  thun tapa, dom kraong ia khan di Thuy Si lahik jaik 20% ia khan, ngak kurang ia ka harei hadei saong kadha suai lavik di dom bhum ia khan di chau Au. Dom urang ilimo kuhria, meng bilan 7 tal bilan 9 tapa hu abih tih dom kraong ia khan di Thụy Sĩ lahik labaih 2,2 ribau ti lit ia.

Langik salih karei oh lagaih ba tal labik pandiak hajan  di dunya. Tokyo negar Nhật Bản yam taa 34 harei hu hajan. Yaok bilan hajan di Nhat Ban bhian rah tabiak di bilan 6. Yau nan min, dalam dom bilan hè, ban ini hu hajan praong; rilo bhum taneh praong di ban ine ia dauk trak. Tui dom urang ilimo, langik salih karei kayua menyek jeng cur patau ngak kandong ia dalam langik ba tal hajan praong.

Singapore jeng negar hu rilo urang taha tuk bhap bini umo meng 65 thun tagok labaih 21%. Tui kuhria birau brei mboh Singapore daok yam tame tukvak birau  di bruk rahrah rilo thun, urang umo taha daka harei dak ralo saong urang ngak bruk dak harei dak takik. Dalam tuk nan labaih 1 dalam 4 bhap bini  hu urang umo meng 65 thun tagok di thun 2035, bruk lagaih haong urang taha jeng bruk kan kandah ka taneh ia Dong Nam A ini./.