Brei panuac di var nyaom biai online pakat negar ka bruk kuhria iek veik bruk bangsa thun 2024 saong bruk ngak di thun 2025, Phaok Thu tuong thuong truc Nguyễn Hòa Bình brei pataom dom jien padai jeng yau manuac urang piah khik kajap bruk ngak samu tukvak dom danak dak pakat negar, praong abih  lac Danak dak pakat negar bangsa takik saong bhum ceik saong Danak dak trun kathaot karo kajap. Taphia nan, tuk peih ngak dom danak dak, brei buh jien tame ngak  njauk bruk, plaih lahik jien ka makna karei piah ngak jeng bruk salih bahrau siam lagaih ka kinh te – xa hoi saong raidiuk rahra.

Jalan peih samar Can Tho - Ca Mau atah labaih 110km. Jien buh tame ngak jaik 27.520 ty ndong, hu peih ngak meng bilan 1/2023. Tui hatai kham marat “3 ka ngak - 4 kapul”, ngak oh padeih Tet, hadei jaik 2 thun peih ngak, jalan peih samar Can Tho - Ca Mau bahrau hu tuh menyek ka dom met jalan camereip. Kuhria mboh dahlau lac jalan ngak blaoh di puac thun 2025. Jalan peih samar Can Tho - Ca Mau hu makna praong glaong di bruk pambuak Bhum Taneran kraong Cuu Long haong dom bhum kinh te pusak di nagar.

Urak ini hu jaik 3.000 labik raong glang di Dong Nai brei panduan nao labik karei piah khik brei hacih sa-at alam labik daok. Yaom lac brei harei panduan tal puac bilan 12 brei ngak salah blaoh, min urak ini bahrau hu jaik 2.000 labik raong glaong hu panduan, hu labaih 65% dut haong jalan ngak ba tabiak. Hu rilo makna ngak ka bruk panduan suai, dalam nan hu bruk tinh oh ka hu quy hoach cambaih laih ka labik raong glang, langiu di nan, dom labik raong glang gaok kan kandah ka jien panduan, taoh talaih var ro atau padang bahrau.

Dalam thun ni tapa dom jalan daong, Tien Giang hu daong jaik 500 baoh sang taduan harak tapa truh kathaot, gam hu 19.000 urang hu daong bruk ngak. Tien Giang kham marat dalam thun anak tal duah hu bruk ngak ka jaik 20.000 urang, ba 550 urang nao ngak bruk pak nagar langiu, patrun urang oh hu bruk ngak di thanh thi ala 4%.

Yaom baoh li-u thu di Ben Tre daok hu dom urang ikak kaiy blei 140.000 dong/12 baoh, yaom glaong abih dalam 5 thun jaik ini. Tui dom urang ikak kaiy, ngan haong yaom blei glaong yau nan min bruk blei biak kan kandah kayua li-u dalam rahra daok takik. Ong Huỳnh Quang Đức, Phaok Yam ndok So Ngak nong saong Patagok palei pala Ben Tre brei thau ngan haong yaom baoh li-u urak ini hu brei kein lagaih ka urang pala li-u di dom tinh ĐBSCL meda sahnang hatai diuk hu haong phun li-u.  

Kapul pasang iek ralo gah di Han quoc bahrau ba tabiak adat chap mek Tong thong Yoon Suk Yeol kayua pambak tal bruk peih ngak thiet quan luat min oh jieng meng akaok bilan ni. Tui kapul pasang iek, dom urang nan likau ba tabiak adat chap mek ong Yoon Suk Yeol ngan haong dom panuac mayai duis lac ong ngak srau kadau nagar pambak tame bruk ngak di drei, hadei di tukvak urang ieu mai tanyi sua 3 mbang min ong oh hu mbaok. Panuac bahrau ba tabiak nan hu pok tagok Toa an.

Rajaei Campuchia brei thau khau tin di Patao Norodom Sihamoni hu klak tapa duas ka 13 urang kamei Philippines daok njauk 4 thun daok guk di Campuchia kayua duas metian anek ka urang. Rajaei Campuchia jeng ndom lac bruk klak tapa duas ini oh njauk lac jeng “klak tapa” ka duas ikak menuac saong brei ngak catang patagok bruk khik kajap adat hukum pambuak tal duas metian pah ka urang mai meng jalan pablei salih. Campuchia pakauk bruk metian pah ka urang mai meng jalan pablei salih meng thun 2016. Min, taneh ia ini oh ka ba tabiak hukum halei ka duas ini.

Kapul Y te Dunya (WHO) bahrau  hu kakei dahlau, jit ruak aih caraoh daok srau dau veik di grauk dunya, mayai lac bruk ni biak cuang kandah khin ngak samar, jhul khang dom bruk klauk jru vaccine saong ngak pasiam danak dak ia hacih. Tui WHO, bruk jit ruak aih caraoh njom mbak gilac veik kayua kurang jien padai jeng yau manuac ngak bruk, halau ia pandar oh hacih saong kurang  ka dom nagar bhum taneh chau Phi nan daok srau dau, mesruh metak./.