Jien thuong kuhria rah tapa Tet Nguyen dan Ula Naih 2025 thun ini glaong jang 13% dut haong thun blaoh. Ini lac khau tin meng mentri Lao dong, Thuong binh saong Xa hoi. Jien thuong Tet Nguyen dan 2025 kuhria rah tapa dalam negar lac 7,7 trieu dong, dalam nan urang hu thuong glaong abih lac labaih 1,9 ty dong. Dalam tuk nan, jien thuong Tet sa ka Ia harei kuhria rah tapa lac 1,46 trieu dong sa urang, tok samu jaik 80% dut haong thun blaoh. Jeng tui Mentri Lao dong, Thuong binh saong Xa hoi, jien bilan kuhria rah tapa thun 2024 hu 8,88 trieu dong sa bilan, tagok 4% dut haong thun 2023.

Dom harei ini, dom urang gheih tangin ngak lan am Hamu Craok Bàu Trúc, ban sit Phước Dân, huyện Ninh Phước, tỉnh Ninh Thuận thuvil thuval ngak ralo pandap birau ghieh mekre, thaik thaok birau pablei ka urang blei. Dom labik samar papak pandap tame thung ka radaih pajeng nao ka urang takre lan am Cam parang iek  dalam tuk Tet thun birau Ula Naih jaik tal. Bàu Trúc urak ini hu 712 baoh sang, ngan haong abaih 3.300 urang pambuak haong bruk ngak lan yaok rituh thun tapa. Kuhria tal puac thun 2024, Bàu Trúc daok 6 baoh sang kayua taha, metui, kuranh prein ngak bruk.

Huyen Châu Thành, tinh Sóc Trăng lac huyen ngak siam bruk padang sang bac mek hu tanut chuan pakat negar, haong 37/37 sang bac njauk tanut chuan Negar. Châu Thành lac huyen hu labaih 50% rahra lac urang bangsa takik. Dalam tukvak tapa, Châu Thành tuk halei jeng caik dahlau bruk sangka buh jien tame bruk padang co so vat chat, sang bac, brei kein lagaih, pabak siam ka bruk pato saong bac di gru pato haong dom anek saih. Châu Thành jeng jeng sa huyen akaok meti di tinh Sóc Trăng hu abih tih sang bac njauk tanut chuan pakat negar.

Akok UB bhap bini tinh Ca Mau caong khin dom so, dom gah pambuak tal, dom huyen, Ban Ca Mau peih ngak dom jalan pakhang khik iek, peih ngak padai ka 3 di tinh. Tui nan, ngak catang bruk pacang caga pandiak bhang tua riya, kurang ia, njom ia mbak bilan bhang thun 2024 -2025. Huyen Trần Văn Thời pacang caga bruk pandiak bhang thu lagu saong njom ia mbak, tui pathau khan, pachreih bhap bini peih ngak tui bilan kayua gah ngak nong tacei pato, juai pala drak padai bilan ka 3. Yau nan min, hu dom baoh sang trun pajaih oh tui tacei pato.

Dalam thun 2024, njauk bala jalan mbak di TPHCM hu trun rilo di klau asal kadha: dom mbang, dom urang metai saong dom urang njauk rambuas. Abih di nyu nan lac, dom urang metai kayua njauk bala jalan mbak hu trun 193 urang dut haong thun 2023. TP.HCM hu tayah klak 7/9 labik mbuan gaok bala jalan mbak saong pasang iek siam dom labik meda mbuan gaok bala karei. Dalam thun ini, TP.HCM ba tabiak jalan ngak patui veik dui patakik dom mbang, dom urang metai saong dom urang njauk rambuas kayua gaok bala jalan mbak dut haong thun 2024.

Đảng Tự do pan akok Canada khan brei thau palih ruah urang birau pan kaok di harei 9/3 anak tal piah salih ong Justin Trudeau, tui nan brei mboh kham merat  mek hu jayak dalam bruk palih ruah tong tuyen cu thun 2025. Mban ngak bruk ndang Tu do hu nyaom biai piah ginum biai saong ba tabiak dom jalan palih ruah urang pan kaok di ndang anak tal. Harei puac tut angan piah hu jeng urang tame palih ruah pok ngak urang pan kaok ndang ini lac harei 27/1 anak tal. Yaok urang hu mbaok tame brei bayar jien 350.000 CAD  sumu jaik 250.000 USD.

Sa roh duah di Pasak roh duah kinh te Halle bahrau ba tabiak brei thau, dalam 3 bilan mbang ka IV thun 2024, Đức taduan mboh dom mbang tayah tayac gah ngak mbang pablei salih glaong abih kuhria meng di thun 2009 kayua jien laba saong jien buh tame tagok glaong. Abih tih hu 4.215 mbang tayah tayac gah ngak mbang pablei salih, ngak kan kandah tal jaik 38.000 bruk ngak - tanut glaong abih kuhria meng mbang cuang kandah ka jien padai dunya dalam kreh thun 2009.

Dom urang ilamo Lien minh chau Au khan lac, dunay birau yam tap sa thun akaok meti pandiak di dunya glong tagok 1,5 do C dut saong tukvak dahlau ngak kong nghiep. Tui nan brei mboh bruk alam langik salih karei ngak ka baoh taneh pandiak tagok oh bhian mboh di rai manuac janam birau. Baoh taneh pandiak  tagok glong, sa mbang tra brei mboh bruk jhak kayua alam langik salih karei daok rah tabiak di grauk bhum taneh, ngak kan kandah tal abih manuac sia./.