Kuhria tal harei 8/9, Danak dak jak ba daong rahra Cuba hu angan “65 thun Anit Ranam Viet Nam - Cuba” hu labaih 421 ty dong (tagok labaih 6,4 mbang dut haong bruk kuhria meng akaok). Tui Phaok Akaok, Tong Thu ky Dui ba bruk ngak Kapul Chu thap do Viet Nam Nguyễn Hải Anh, ini lac mbang akaok meti sa danak dak jak ba pakat dunya di Kapul Chu thap do Viet Nam hu yaok trieu mbang daong prein saong yaok rituh ty dong dalam tukvak katut abih. Bruk brei thau dil samu, cambaih laih ka jien daong, dom mbang daong prein saong daong jien, daong haong dom jabat harak mbao daong pambak praong Danak dak.

Dalipan bilan tapa, TPHCM peih ngak hu jak jeng siam mekre dua bruk nan lac gam ngak bruk di karja palei dua pakat gam patagok kinh te-xa hoi. Ban raya daok khik hu bruk patagok siam mekre saong bruk ngak brei patagok di taneh ia haong dom labik cakrok siam mekre…Yau nan min, bruk peih ngak karja palei dua pakat daok hu labik labaih - labik kurang”, kurang urang jakar hu ilamo naih joi yau nan ye pakat xa daok gal tavak, harak ho so daok kandon biak ralo…Yau nan ye, Akok UBND TPHCM caong khin ngak siam bruk karja palei dua pakat.

Piah daong ka dom adei anek saih sang kan kandah hu daong prein kham merat, uak drei tagok bac megru siam, Tinh ndoan Ca Mau hu peih bruk daong ka labaih 5.540 adei anek saih kathaot, hu baoh sang kan kandah hu labaih 1.700 paok jien pachreih bac, jaik 250 sruh radaih juak, gam haong rilo tapuk siphau, tapuk bac megru, mac vi tinh, hu taong abih yaom kaom jaik 2 ty dong. Dahlau nan, Tinh ndoan Ca Mau jeng pambuak haong rilo gah peih Danak dak “Daong prein nao bac” alin pandap ka anek saih kathaot, hu baoh sang kan kandah thun bac 2025-2026 di xa Long Điền hu yaom yaok ty dong.

Mban tacei ba Bol lin bien phong Ban Can Tho pambuak haong  Kapol pachreih bac Ban Can Tho birau alin brei 200 paok jien bac, yaok paok sa trieu dong ka dom anek saih dalam danak dak “ Pandok takai daong adei nao bac” saong  dom anek saih bangsa Khmer raidiuk kan kandah kham merat bac megru naih joi di labik tapen tasik negar di Ban Can Tho. Tukvak tapa, Bol lin bien phong Ban Can Tho pambuak bruk jak ba dom po ngak mbanh pablei salih, peih bruk daong dom adei ndap nda piah bac da-a, daong ka dom adei anek saih raidiuk kan kandah kham merat bac megru naih joi.

Mbang hajan praong dui atah dalam 2 harei tapa ngak ka ia dauk katuak, ngak khat lahik trak ka drap ar jien padai saong phun pala di rilo baoh sang rahra di phuong Binh Phuoc, tinh Dong Nai. Urak ini hu 10 baoh sang rahra njauk ia dauk, daok veik ye rilo meng lac dauk bein phun. Labik njauk ia dauk trak abih lac daok rah dua tapen ia craoh Rạt, taphia di phuong Binh Phuoc saong xa Dong Tam. Urak ini kan kandah abih lac kurang dom ndap nda njauk hu yau cano piah nduac angaok ia nao duah sraong daong, dalam tuk nan labik njauk ia dauk lac biak praong.

Akok Mentri Noi vu Anh ginum biai haong dom gah meng Mỹ, Canada, Australia saong New Zealand piah daong jhul pakhang bruk ba urang negar langiu gilac mai bhum palei di urang kayua oh hu harak gar piah daok veik dom taneh ia ini. Harak pathau khan nan payua tal negar halei ye duah jalan ngak sraw bruk salamat di khol drei. Meyah dom ayut oh hu ginup harak gar piah daok veik negar Anh, khol dahlak patrauk tabiak. Meyah dom taneh ia oh taduan urang klak palei nao mai veik, ye khol dahlak ngak bruk.

He thong Y te han Quoc daok laik tame bruk kurang trak ka dom jitvu y te hu makna, dalam nan dom labik pasang iek ruak bahrau dak harei dak rilo. Rilo meng lac labik pasang iek ruak bahrau di Han Quoc tok pataom tame bruk pasiam kalik saong blac raih ngak gheih, ngak kurang dalam dom gah njauk hu yau ye taong ruak uranaih saong blac raih dak harei dak praong. Bruk ini brei mboh bruk njauk duh hatai: rilo bac si sit thun umo pilih ruah labik pasang iek ruak ta-eng urang menuac salih ka bruk nduac tui danak dak pato pakai daok veik piah jeng bac si chuyen khoa.

Kadung jien Dan so rahra bhap bini LHQ (UNFPA) khan lac hu takik abih di nyu 375 urang metai dalam sa mbang glut jaleih taneh rah tabiak di palei atah bayah di bhum Pei Sudan di puac bilan 8 meng blaoh. Dalam tuk nan, Jabat Ngak bruk pahala di LHQ khan lac bruk tame palei gaok kan kandah kayua glut jalaih taneh labik ini rilo ceik glai saong langik hajan gam gam, yau nan ye dom urang daong brei pajeng ba ndap nda meng thaik./.