Page ini, dom sang bac dalam negar gam gam peih pakak thun bac bahrau 2025-2026 tui jalan ngak tapak saong tapa online. Urang ngak bruk danak dak taong abih khau tin:

- Ong Y Thanh Hà Niê Kđăm, Uy vien Trung uong Ndang, Bi thu Tinh uy Lam Dong hu mbaok di harei peih pakak thun bac bahrau di Sang bac Tieu hoc Nguyễn Văn Trỗi, xa tapen negar Thuận An saong alin pandap ka anek saih sang kathaot truh tapa kan kandah. Thun bac ini, gah Pato Megru Lam Dong hu brei mboh 9 bruk ngak hu makna, dalam nan caik dahlau ka bruk salih bahrau bruk pasang iek, paglaong asar siam pato megru saong patagok kapul gru pato.

- Tinh Dak Lak brei mboh kadha luac thun bac ini lac “Tapak – Hadah krah – Salih bahrau – Patagok”, dalam nan sangka iek praong bruk salih bahrau danak dak, jhul khang salih lek taka so. Page ini, Tạ Anh Tuấn, Akaok UB Bhap bini tinh Dak Lak hu mbaok di harei peih pakak di Sang bac Pho thong gam bac gam daok Tay Nguyen.

- Sang bac gam daok gam bac Điểu Ong di xa Bù Đăng, tinh Dong Nai thun bac ini hu 468 anek saih dom bangsa takik yau ye: S’tiêng, M’nông, Dao, Tày, Nùng, Mường, Cao Lan…Di harei peih pakak di page ini, Trung uong Ndoan saong Kapul Trung uong alin rilo paok pandap hu makna, dalam nan hu: 2 tu tapuk, 20 paok jien pachreih bac Vừ A Dính, 10 sruh radaih juak saong 100 thaik thaot Wa Ho. Taong abih yaom kaom di dom paok pandap lac 180 trieu dong.

- Sang bac Tieu hoc 1 Đất Mũi, xa Đất Mũi, tinh Ca Mau - sang bac karei crih daok di labik Meraong abih di Negar - page ini peih pakak thun bac bahrau. Xa Đất Mũi hu 7 labik sang bac, hu labaih 3.300 anek saih jeng hu peih pakak praong prang saong siam gheih.

Kapol Urang Quoc hoi TPHCM pasang iek bruk salih pandar laik taka so saong salih jalan ngak harak gar karja di phuong Lái Thieu saong xã Bàu Bàng.  Ong Nguyễn Văn Lợi, Akok kapol Urang Quốc hội TP.HCM caong khin dom bhum palei, patui veik bruk ngak brei tani tanat, tacei ba jalan ngak harak gar karja saong salih taka so. Tui nan, salih jalan peih ngak saong parilo urang daong bhap bini dalam tuk salih pandar taka so,lang talaih dom kan kandah piah jhul pakhang bruk ngak kinh te - xa hoi patagok.

Piah khik kajap salah blaoh 2 danak dak jalan peih samar Can Tho – Hau Giang saong Hau Giang - Ca Mau di puac thun ini, Mban Pasang iek danak dak Mỹ Thuận bhian pasang iek, pajrak saong langyah dil samu dom tavak tavaiy piah khik kajap tukvak ngak bruk 2 danak dak hu makna ini. Ong Trần Văn Thi, Yam ndok Mban Pasang iek Mỹ Thuận pandar: Yaom lac kateik geik ka tukvak ngak bruk biak praong piah samu salah blaoh jalan peih samar Can Tho - Hau Giang, Hau Giang - Ca Mau di bilan 12 anak tal, daong mek hu bruk kuhria hu 3.000 km jalan peih samar di puac thun ini, khik kajap asar siam, salamat dalam bruk ngak.

Harei kabroi, di xã Mỹ Đức Tây, Tinh Doanh Dong Thap pambuak haong bruk Peih pakak  ba tatua “ 9 Dần” pandar. Tatua “ 9 Dần” hu padang ngak meng betong saong pathei khang kajap, atah 58 met saong praong 4,5 met, kuhria tui jien labaih 1,7 ti dong saong labaih 1.000 harei ngak bruk. Bruk ngak blaoh tatua hu ba tame pandar lac makana biak praong dalam raidiuk kinh te – xa hoi di bhum taneh ini, duh ka labaih 300 baoh sang bhap bini nao mai jeng pajeng ba ndap nda kaya nong hu lagaih, mbuan sanang jang.

Bo Chi huy bol lin tinh An Giang bahrau jao 204 radaih moto ka dom mban Chi huy bol lin pakat xa njauk adat. Mban Chi huy bol linpakat xa, phuong hadei tuk taduan radaih brei pasang iek, pandar radaih tani tanat, siam lagaih saong salamat jalan mbak. Tong Cuc Hau can – Ilamo Ky thuat hu samar drah peih jalan ngak blei pandar, caga labaih 6.000 radaih moto ka labaih 3.000 mban Chi huy bol lin pakat xa, phuong di grauk dalam negar. Yaok labik hu jao 2 sruh radaih Honda Wave Alpha. (VOV)

Tong Yam ndoc Gah Palei salih Dunya ( WTO) khan lac, bruk pablei salih di dunya daok rah tabiak tui Hukum  “Toi hue quoc”, daok trun meng labaih 80% daok ala 72%, kuhria meng tuk hadei Tong thong Mỹ Donald Trump tang jien je. Hukum “ Toi hue quoc” lac jalan ngak dahlau saong hu makna biak praong dalam dom bruk pablei salih di WTO. Dalam nan, meyah sa taneh ia di WTO brei ka sa taneh ia karei jien daong pablei salih, ye brei ngak dreih yau gauk ka taong abih dom taneh ia karei dalam WTO.

Di sa labik pala padai lúa mi di Nam Phi, sa bruk salih bahrau kandauk daok rah tabiak. Urang ngak nong salih meng dang sinh hoc - sa janih dang hoat tinh ngak meng kayau klak - piah pasiam taneh kurang asar siam, pasiam nang suat phun pala saong daong pacang bruk langik salih karei. Dang sinh hoc hu cuh am cuh pandiak tal labaih 600°C, hadei nan hu am cuh veik tagok tal 900°C. Tuk hu drak tame taneh, dang hoat tinh jeng carbon am, daong tagok rilo phun pala saong pacang caga hu bruk langik salih karei.

Mentri Quoc phong Afghanistan khan lac, Bol lin taneh ia ini tame ngak bruk daong hadei megei baoh taneh khang ba tal labaih 1.400 urang metai saong yaok ribau urang karei njauk rambuac. Urang brei panuac di karja  Taliban khan lac labaih 1.400 urang metai, daok hu labaih 3.100 urang njauk rambuac saong labaih 5.400 baoh sang tayak tayaic. Dom  urang jakar khan lac, trak abih lac 3 palei di tinh Kumar jaleih ndaok abih, ba tal labaih 600 urang metai./.