Biar harei kabroi 15/12, Akaok Quoc hoi Trần Thanh Mẫn, Akaok Hoi dong Bau cu Negar hu dang ba Mbang nyaom biai ka 4. Akaok Quoc hoi Trần Thanh Mẫn brei thau, bruk srap gap ka mbang palih ruah daok rah tabiak biak siam, samar drah, ngak tui adat ba tabiak; ndom khang, karei haong dom mbang palih ruah dahlau nan, mbang palih ruah mbang ini rah tabiak dalam bruk majam chinh tri, majam karja palei daok patui veik pasian taong abih, ramik dak tui jalan ngak dom sarak di Trung uong; dom bruk kapul karja ban medin, karja palei hu salih bahrau, salah blaoh.

Ndom meyai dalam Nyaom biai Ban uy mbang ka 2, Bi thu Ban uy Ban raya Ho Chi Minh Trần Lưu Quang ndom khang ka dua bruk ngak praong bo Ndang mbo Ban raya brei pataom tame kham merat ngak bruk dalam tukvak anak tal. Nan lac, Ban raya Ho Chi Minh brei khik kajap bruk sron mbon, gam haong nan langyah patruh dom asal kadha daok kandaong dui atah. Dalam nan, abih di nyu nan lac pataom tame asal kadha praong bo Tong Bi thu hu jao brei di Nyaom roya Ndang mbo Ban raya Ho Chi Minh mbang ka I, dalam nan hu: gar jalan, dauk ia, njom nerak yava langik saong padang Ban raya Ho Chi Minh brei patagok njauk haong bruk dang akaok, sa gah patagok di dalam negar; jeng sa labik nao dahlau dalam bruk pandar ilamo khoa hoc – kong nghe, salih bahrau, salih lek taka so; lac pasak ilamo saong ban medin hadah krah.

Harei kabroi, Uy vien Mentri Chinh tri, Akaok Mban Noi chinh Trung uong Phan Đình Trạc hu mbaok di Harei Peih ngak “Jalan ngak Quang Trung” di xa Hàm Thuận Bắc, tinh Lam Dong (huyen Hàm Thuận Bắc, tinh Binh Thuan klak). Jalan ngak brei samar drah padang veik sang daok ka rahra gaok bala, daong mikva samar drah tani tanat dahlau Tet Nguyen dan. Mbang tui “Jalan ngak Quang Trung”, tinh Lam Dong hu peih ngak padang 6 sang daok ka dom baoh sang bahrau lahik sang dalam mbang hajan ia sua bilan 12 di xa Hàm Thuận Bắc.

Thanh ndoan Can Tho pambuak haong Uy mban Mat tran Negar xa Mỹ Tú peih bruk pasang iek ruak, brei jru oh mek jien saong alin kaya ka rahra, uranaih bhum palei. Di ini, kapul hu peih bruk pasang iek ruak saong brei jru oh mek jien ka 300 rahra, rilo meng lac urang praong thun. Hadei tuk rivang pasang iek, yaok urang daok hu jao alin sa kaya alin lac ndap nda hu yaom 200.000 dong. Mban peih padang jeng alin 100 kaya dalam nan hu kadung tapuk, kaya duh ka bruk bac ka dom adei anek saih bangsa Khmer baoh sang kan kandah. Taong abih jien daong rahra mbang ini lac 140 trieu dong.

Labaih 16h harei kabroi, sruh ahaok Boeing 787 di Vietnam Airlines kataok trun jalan ka 1 Mblang kapal ahaok par pakat Dunya Long Thành, tinh Dong Nai. Ini lac mbang par ky thuat akaok meti piah taong yaom taong abih prein ngak, bruk pambuak dui ba di dom labik. Ajaok par meng mblang par Tân Sơn Nhất, Ban raya Ho Chi Minh di mon 15 tuk 34 minit. Hadei labaih 30 minit par, 787 hu kataok trun salamat di Mblang par pakat Dunya Long Thành.

Danak dak ndien angin angaok tasik atah ar abih di Trung Quoc hu taong abih cong suat tagok tal 800 MW hu brei peih ngak. Danak dak hu padang di bhum tasik gah pur barak Đại Phong, ban Diêm Thành, tinh Giang Tô, hu taong abih 98 tua-bin angin brei pagam. Bruk hu makna abih di danak dak lac labik atah ar abih tagok tal 85km. Danak dak brei pabak labaih 2,8 ty kWh ndien hacih sa-at yaok thun, pabak ginup hatai caong pandar di labaih 1,4 trieu baoh sang rahra.

Japon daok brei njauk dom mbang tuyet praong, pagam tui angin khang ngak ribuk tuyet khang ngak kan kandah taong abih labik gah Barak saong gah Pei negar ini, abih di nyu nan lac dom tinh Hokkaido, Aomori… Angin yuk dut hu di Hokkaido tagok tal 28m/giay. Abih di nyu nan lac, di dom labik angaok tasik, angin yuk tagok tal 40m/giay. Tuyet jeng kapal abih, ngak kanjah jhak tal jalan mbak saong bruk daok dang di Japon.

Tui khau tin meng Gilang Pariak gah Ngak nong Nga, dalam thun 2025, urang Nga kuhria pablei hu labaih 1 trieu tan quyt, dalam nan hu labaih sa dalam klau hu pablei dalam dom adit anak thun bahrau 2026. Kuhria dalam sa thun, quyt hu labaih 10% “jam baoh kayau” di urang Nga. Min dalam bilan li-an, abih di nyu nan lac dom adit dahlau thun bahrau, bruk ini tagok rilo mbang, hu labaih sa dalam klau bruk pablei quyt yaok thun.