Mentri Lao ndong, Thuong binh saong Xa hoi brei thau, kuhria abih tih jien buh tabiak piah khik kajap bruk daok dang mbang ngui di rahra dalam harei Tet thun ini ka urang kathaot, baoh sang kan kandah hu kuhria labaih 10.000 ty ndong. Dalam nan tanut yaom jien ka pandap alin hadiah Tet di Akaok negar alin hadiah ka urang ngak bruk cach mang meng dahlau daih lac 300.000 dong; pandap kaya Tet alin hadiah ka Amaik Viet Nam ngak bruk cach mang, urang lin meng kal njauk rambuas trak lac 600.000 dong sa urang. Dom bhum palei jeng hu kuhria ka bruk sangka Tet haong tanut yaom jien 300.000 dong sa baoh sang kathaot. Daok di Ban raya Ho Chi Minh ye hu tanut daong 1,15 trieu dong sa baong sang. Thu tuong pabak, brei tabiak 7.500 tấn brah piah sangka ka labaih 500.000 rahra, dom urang gaok kan kandah kayua njauk bala, ia sua, urang bangsa takik, baoh sang kathaot, jaik kathaot…

Peih ngak Danak dak pakat negar padang ngak palei pala birau thun 2025, tinh Dong Nai kham merat jak ba abih prein khang di dom pakat chinh tri saong dalam xa hoi tame ngak bruk padang ngak palei pala birau. Dalam nan hu ba tabiak bruk kham merat hu veik 8 xa mek hu tanut chuan palei pala birau paglong, 4 xã  mek hu tanut chuan palei pala birau kieu mau, hu 3 huyen ngak salah ho so likau Mentri Ngak nong saong Patagok palei pala taduan brei anagn palei pala birau paglong. Piah peih ngak bruk ini, tỉnh Dong Nai kuhria abih tih phun jien labaih 210.000 tỷ đồng.

Urak ini, po bein tinh Tien Giang tari tarieng sangka ka bein phun, ngak ka phun tabiak baoh karei bilan piah duh ka tabung glaong darak pasar Tet Nguyen dan. Tui So Ngak nong saong Patagok Palei pala tinh Tien Giang, dalam harei Tet Nguyen dan, dom po bein hu langyah ka phun brei tabiak baoh karei bilan haong labaih 6.600 ha, kuhria paik labaih 80.000 tấn rilo baoh kayau. Tui ilamo di po bein, mbang paik baoh kayau jaik Tet bhian hu yaom glaong jang dut haong harei bhian meng 5-10% abih di nyu nan lac hatai caong parang salao hu lime baoh tui adat bhap bini haong haatai caong blei pandar di rahra tagok glaong.

Nyaom pataom Bingu-Phun ngak mekre Chợ Lách ngan haong kadha “Sambo mau Chợ Lách” birau hu peih ngak di huyen Chợ Lách, tỉnh Bến Tre. Ini lac mbang akaok meti huyen Chợ Lách – labik pala rilo phun pajaih, bingu ngak mekre di dalam negar peih ngak bruk nan pachreih yaok ribau bhap bini, tuai damuai jaik atah  mai hu  mbaok rivang iek. Yaok thun, bhap bini pak ini  ngak tabiak hu labaih 10 trieu bingu kieng dom janih pablei ka darak pasar dalam negar. Yau nan ye, nyaom pataom  mbang ini pok meyaom, patagok bruk pala bingu ngak mekre, patagok jien mek tame meng bingu kieng di bhum palei ini.

Di ban sit Phước Long, huyen Phước Long, tinh Bac Lieu dalam 2 thun tapa, bhum palei hu daong jaik 80 baoh sang kathaot, jaik kathaot, baoh sang bahrau truh kathaot hu bruk ngak mbang piah duah rilo jien ka baoh sang, dalam nan hu labaih 40 baoh sang hu daong anek meja piah raong. Tui nan, yaok baoh sang hu daong 4 drei meja hu yaom 28 trieu dong. Bruk raong meja pak sang meng akaok meti hu taong yaom lac bruk njauk hatai daong rilo urang hu jien mek tame, uak drei tagok truh kathaot karo kajap. Urak ini dom baoh sang kathaot di huyen Phước Long tok daok labaih 0,5%, samu haong 22 baoh sang.

Dom urang ilamo duah thau gah baoh taneh Trung Quoc khan lac hu 515 mbang megei baoh taneh khang 6,8 di huyen Tingri, quan Shigatse, Khu tự trị Tây Tạng. Bruk kuhria labaih 500 mbang megei baoh taneh  ba tal huac kanda ka bruk taneh megei khang veik dom mbang di anak tal. Urak ini, Trung Quoc  daok pataom tame bruk pasiam veik hadei di nan, daong ka bhap bini saong padang veik ha tang di labik megei taneh khut khat trak abih.

Tal tukvak urak ini, dom mbang apui khuah glai di bang California jeng oh ka padam hu, rilo baoh sang hu yaom kaom glaong abih dalam dunya njauk apui mbang abih. Tong thong Mỹ ong Donald Trump hu ieu dom bruk daok rah tabiak nan lac sa bruk biak duas sak. Tui urang jakar di bhum palei, hu takik abih 5 urang metai, labaih 130.000 urang hu panduan nao daok karei, 100.000 urang daok dalam bruk hu kakei dahlau lac brei panduan nao daok karei. Dom kapul daong padam apui karei mai meng rilo labik daok hu ba tal dom labik daok rah tabiak apui khuah.

Labaih 100 tabung ceik pui ala taneh daok kandang ia khan kapan di gah Meraong baoh taneh saong bruk langik alam salih karei ralai samar  meda ngak ralai drah samar, ba tal dom mbang pruh kan thau dahlau. Yaom lac bruk nan rah tabiak samar saong meda dui taah yaok rituh thun, dom urang ilamo mboh lac nyu daok rah tabiak saong meda kan pacang hu, jeng yau dalam tuk baoh taneh pacang hu pandiak./.