Di mbang ngak bruk haong dom mintri, dom gah, tinh, ban di bhum taneran kraong Cửu Long ka bruk peih ngak dom danak dak di pak ini, tuk bier harei 30/1, Thủ tướng Phạm Minh Chính ieu kakei dom gah, dom tinh, ban njauk pambuak bruk catang jang, pato tacei peih ngak bruk cak rok patagok jalan mbak, abih di nyu nan lac dom jalan cao tốc di bhum Taneran kraong Cửu Long; samar drah ngak salah adat caga dahlau ka bruk buh jien tame, tani tanat ilamo, njauk adat. Njauk haong bruk daok rahtabiak urak ini, ngak salah dalam 6 bilan akaok thun 2023 piah peih bruk padang ngak samu gauk dom danak dak daok veik.

Tui Mintri LĐTBXH, dalam tuk Tết, jien blei pandap brei ka dom urang buh prein ka cach mang, dom menuac daok hu mbang jien daong yaok bilan, dom urang kan kandah meng kadung jien karja saong jien jak ba hu, tagok tal 10.000 tỷ đồng. Langiu di nan, dalam bilan akaok thun, Rajaei hu tabiak 5 sarak daong brah ka bhap bini tuk Tết saong tuk cang yuak thun 2023. 17 tỉnh haong labaih 18.000 tấn brah hu daong brei ka jaik 200.000 sang gam saong 1 triệu 200 rabau menuac.

 Di tỉnh Bình Dương urak ini hu 86% urang ngak mai ngak bruk gilac veik hadei di mbang padeih Tết. Bruk urang ngak mai ngak bruk veik mboh hu tani tanat, pabak hu dây chuyền bruk ngak di doanh nghiệp saong oh mboh hagait lac kan kandah ka urang ngak. Tui pasang iek, bruk caong pilih ruah urang ngak di doanh nghiệp dalam quý 1/2023 lac labaih 10.000 urang ngak, dalam nan bahrau pilih ruah hu labaih 35%, rilo meng lac piah pabak ka dom urang ngak oh mai ngak bruk. Dom gah ngak rilo abih lac jhik manyim, kalik takhaok saong dom gah karei yau ye điện tử, cơ khí, ngũ kim saong dom gah dịch vụ.

 Hadei di 3 mbang tabiak tukvak peih bruk padang ngak haong tukvak dui atah jaik 3 thun, harei ini (31/1) tatua Thống Nhất (tapa kraong Cái, sa dhar di kraong Đồng Nai) daok dalam danak dak jalan praong pasak ban Biên Hòa, labik meng jalan Võ Thị Sáu tal jalan Đặng Văn Trơn hu peih bruk padang ngak. Jalan pasak ban Biên Hòa atah abih tih labaih 5,4km. Ini lac sa dalam dom danak dak jalan mbak praong di Đồng Nai hu peih ngak meng rilo thun tapa haong yaom jien buh tame ngak abih tih labaih 1.500 tỷ đồng.

Dah page harei 30/1, meng dom jalan ngak di drei, Jabat Cảnh sát pasang iek kol tội phạm gah ma túy Công an tỉnh Sóc Trăng pambuak haong Công an huyện Mỹ Xuyên vaih tame baoh saong oh hu laik di mangaok jalan tame Palei Điện lực di puk Hòa Mỹ, ban sit Mỹ Xuyên, huyện Mỹ Xuyên hu mboh 10 urang daok pandar ma túy. Pandap pataom mek hu lac 6 kadung ma túy tổng hợp, 18 asal jru lắc saong dom pandap panda piah pandar ma túy.  Urak ini, bruk ini daok hu jabat Công an patui veik pasang iek ngak cambaih laih piah langyah dom urang ngak suan tui njauk adat hukum.

 Nyaom roya pakat negar oh kuhria caga dahlau di đảng Bhap bini Campuchia hu tamat blaoh hadei di 2 harei ngak bruk. Nyaom roya hu ginum biai saong brei tapa rilo jalan ngak praong pambuak tal bruk pan akaok ba jalan patagok taneh ia dalam tukvak anak tal. Dalam nan, Đảng Bhap bini Campuchia hu ba tabiak dom jalan ngak lac daok tui bruk khik caga sron mbon, độc lập, quyền ngak po taneh ia; jhul patagok khang kajap kinh tế, padang hệ thống an sinh xã hội siam lagaih, khik kajap gah jien padai, peih ngak sarak đối ngoại độc lập tui adat hukum, padang talei pambuak bruk siam mekre di Campuchia haong dom taneh ia mangaok dunya saong dom kapul nyaom dunya, kham merat hu mbaok tame bruk khik sron mbon, tani tanat, siam mekre saong ginup meda dalam bhum saong mangaok dunya.

Gah Y tế dunya (WHO) brei thau lac, COVID-19 jeng daok lac sa bruk samar drah ka prein yava di dunya. Ini lac panuac kakei glaong abih di Gah Y tế dunya (WHO) pambuak tal jit ruak COVID-19. Jabat ini daok brei thau lac, jit praong meda daok di tukvak salih bahrau veik, kayua yau nan ye njauk khik ramik biak tani tanat piah trun manieng dom kan kandah, kanjak jhak meda rahtabiak. Klau thun blaoh kuhria meng di tuk WHO tabiak panuac lac jit COVID-19 lac bruk samar drah di dunya, kuhria tal urak ini hu labaih 6,8 triệu urang metai, ngak kan kandah tal yaok taneh ia di dunya, palai pajoa dom nền kinh tế.

Takik di nyu  28 urang metai saong 150 urang karei njauk rambus dalam sa mbang patuh praong harei 30/1 di sa sang megik daok di ban Peshawar, Tây Bắc Pakistan. Mbang patuh njauk di tuk hu rilo menuac daok samen. Sa binah di sang megik nyu jaleih saong hu rilo menuac daok gar dalam nan. Gah Tây Bắc Pakistan meng lavik mai lac labik srau kadau, dalam nan dom kapul pan phao kraong nyu ngak srau kadau khang yaom lac karja kham merat khik caga sron mbon./.