Dang akaok nyaom ka 18 di Mban tacei jalan Pakat negar ka bruk pacang caga bruk taong cap ikan suan hukum, oh khan brei thau saong oh tui hukum IUU online pambuak  tal 21 tinh, ban tapen tathik di melam 21/10, Thu tuong Phạm Minh Chính caong khin meriak haong bruk taong cap suan hukum IUU; yau nan ye, yaok adit, dom mentri, dom gah khan brei thau bruk ngak hu siam. Thu tuong caong khin tal adit anak meyah gilai ikan oh hu harak gal ye oh brei tabiak tathik. Thu tuong caong khin brei patagok kaya ikan tani tanat, khang kajap, kham merat lang talaih pakat kanjik katam di EC dalam thun ini.

Harei ini, patui danak dak mbang nyaom ka 10, Quoc hoi  ginum biai Hukum ramik pasiam, pabak dom asar kadha di Hukum Pato megru; danak dak Hukum pato dai hoc (pasiam veik) saong Hukum pato bruk ngak ( pasiam veik). Sa dalam dom bruk hu urang lambao caik hatai sangka ralo saong ndem njauk bruk caong khin di cu tri nan lac ngak veik mejam tapuk bac piah pandar dalam negar njauk asar kadha klak bac gah langiu atau pato gah langiu. Dalam tuk nan, anek saih kurang dom ilamo saong jalan diukrai.

Tinh uy Dong Nai birau peih nyaom biai ka bruk pambuak jalana mbak  haong Ban raya HCM. Urak ini, jalan pambuak Dong Nai saong TPHCM lac jalan raya. Dom jalan praong Quoc lo 1, Quoc lo 51 biak rilo radaih, bhian gar tavak. Piah langyah bruk nan, TPHCM saong Dong Nai biai gauk parabha bruk ngak, roh duah  jalan birau, njauk ndem tal jalan tame mblang kapal ahaok Long Thành saong langyah  dom kan kandah  mek veik taneh, iek nan lac “ tukvak ameh” piah patagok. 

Harei Kate lac harei ilamo hu makna biak praong di urang Cam tui agama Balamon pieh ngak hu dua harei gam haong rilo bruk ndung bak ilamo bangsa siam gheih. Pho akaok UBND tinh Lâm Đồng Đinh Văn Tuấn brei mboh Dang saong Karja tinh iek praong, sangka rik daong ka bhap bini Cam dalam bruk khik ramik, patagok drap ar ilamo bangsa. Urang ngak praong di tinh Lam Dong  caong khin gah ila mo, padhih the thao saong yulit sangka iek veik, daong ka urang bangsa Cam ngak hu siam jeng yau patagok Harei Ka-te, khik ramik dom adat ngak yang dalam harei ini.

Ia tagok di dom kraong, ribaong di bhum Dong Thap Muoi di tinh Tay Ninh daok tagok samar, pakhang kuhria meng 1-3 cm dalam harei melam. Ia tagok glong oh lac ngak khat lahik ka phun pala bo daok ngak khat lahik yaok ribau hecta padai di bhap bini. Rilo ar binek ia  mbuan si talah.Tui yaok kuhria camereip, ia ribuk sua ngak khat lahik jaik 252 hecta padai; 22 hecta phun mbang baoh saong 1,5 ha njam patam metai.

Jien Yên Nhật trun biar dalam sa adit hadei tuk muk Sanae Takaichi hu pok tagok ngak thu tuong di Nhat Ban -Japon. Muk Sanae Takaichi hu jeng urang thu tuong akaok meti di negar ia harei tagok. Bruk muk Takaichi njuak hatai haong sarak jien karja kuhrai caga saong sarak jien padai hu cadu meda pacang bruk patagok kein laba di Gilang negar Nhat Ban.

Trung Quoc, bruk ngak kinh te so dang dhi 2 angaok dunya daok gaok kan kandah ralo piah pasiam veik bruk pablei Sali taneh riya sang danaok, tuk yaom sang daok dalam bilan 9 trun 0,4% - nan lac trun biar abih dalam 11  bilan tapa. Hu tal 63 dalam 70 ban raya hu yaom sang birau trun, abih di nyu nan lac ban dhi 2 saong dhi 3. Bruk nan brei mboh  bruk oh lac cadu trun di rilo tinh, ban, bruk pablei salih taneh riya sang danaok daok trun.  

Gah Bol lin Myanmar brei ba lin nao mesruh di bang Karen, jaik labik tapen negar Thai Lan, piah taong tayak pasak pachot pagat praong saong daong 2.200 urang. Akok thun ini, Thai Lan, Trung Quoc saong Myanmar hu ginum biai pambuak haong dom pasak pagat kayua dom kapol nyaom dius di Myanmar. Tui kuhria  hu meng 100.000 – 120.000 urang chap ngak bruk. Mentri Ngoai giao Thai Lan mboh labaih 10.000 urang hu daong ba, metah dom urang nan lac bhap bini Trung Quoc.