Danak dak ilamo ngan haong 3 kadha: “Panuac pato di Wa hadah miat miat”, “Kayua taneh ia var klak rup, kayua rahra duh pamere”, “kayua sron mbon di raidiuk, kayua haniem phul di rahra”, hu ba mai ka rahra dom kadha daoh tamia siam gheih. Danak dak ilamo hu brei mboh lac “di chúc” di Chủ tịch Hồ Chí Minh lac yaom glaong jalan sahaneng, hatai siam gheih di sa urang Anh hùng peih paha bangsa – Urang padang tabiak, pato pakai saong pato pasram Kong an bhap bini.

Dah page ini, di Sang Quoc hoi, Uy ban Thuong vu Quoc hoi peih mbang nyaom ka 36. Rah tabiak dalam 4 harei, di mbang nyaom ini, Uy ban Thuong vu Quoc hoi brei panuac ka rilo asal kadha praong, abih di nyu nan lac Uy ban Thuong vu Quoc hoi peih bruk tangi sua saong javap jalei di 3 akaok mintri. Dalam mbang nyaom ini, Uy ban Thuong vu Quoc hoi jeng hu pasang iek, brei pabak kadung jien karja thun 2024 di Mintri Y tế; pasang iek, brei ramik veik đơn vị hành chính pakat huyện, pakat xã tukvak 2023 - 2025 di ban Cần Thơ, tỉnh Ninh Thuận saong tỉnh Phú Yên.

Ngan haong kadha “dom bangsa jumpataom, salih bahrau, patagok dom kein lagaih, prein khang, mbeik drei yam tame dunya saong cak rok patagok khang kajap”, Nyaom roya dom bangsa takik tỉnh Sóc Trăng mbang ka IV, thun 2024 bahrau tamat di harei kabroi. Brei panuac pato tacei di mbang nyaom, Akaok Mintri, Akaok Uỷ ban Bangsa ong Hầu A Lềnh taong yaom glaong bruk khang hatai chinh tri saong bruk pato tacei, pan akaok biak catang di dom pakat ủy Đảng, kanja dom pakat saong bruk kham marat, yam tapa kan kandah di rahra dom bangsa dalam tỉnh Sóc Trăng. Akaok Mintri, Akaok Uỷ ban Bangsa ndem lac tukvak anak tal Đảng bộ, kanja, bol lin saong bhap bini dom bangsa takik di tỉnh Sóc Trăng njauk khang hatai jang, kham marat mek hu dom jak jeng praong glaong jang.

Di huyện Ninh Hải, tỉnh Ninh Thuận, harei kabroi, Lữ đoàn 955, Bộ Tư lệnh bhum 4 Hải quân pambuak haong dom sở, ngành pambuak tal, peih ngak danak dak “Hải quân ngak labik pambak tame ka urang taong ikan tabiak tasik”. Di danak dak, urang jakar, urang lin Lữ đoàn 955 hu peih bruk iek ruak brei jru ka labaih 100 rahra, alin hadiah 500 hala dok taneh ia, ao phao saong 10 pok pandap brei ka sang urang taong ikan gaok kan kandah, brei 10 pok jien bac ka anek di urang taong ilan sang kan kandah, kham merat yam tagaok dalam bac ta-a.

Hadei di labaih sa thun padang ngak, tatua Phước An, pambuak ban sit Phú Mỹ, tỉnh Bà Rịa – Vũng Tàu haong jalan nao tal pabah lamnge Phước An, tỉnh Đồng Nai daok tame tuk padang ngak samar drah, njauk tukvak ba tabiak. Ong Trần Thượng Chí, Yam ndok So Jalan mbak pajeng ba tỉnh Bà Rịa – Vũng Tàu brei thau, tatua Phước An hadei di tuk ngak salah meda daong dui katut panak tukvak pajeng pandap meng pabah lamnge tabiak dom tỉnh miền Đông saong Tây Nam Bộ, Tây Nguyên saong dom bhum kinh te praong karei. Bruk pambuak ini oh lac jhul samar bruk pablei pandap bo daok daong patrun trak damak ka dom jalan mbak urak ini, abih di nyu nan lac Jalan Roya 51.

Harei kabroi di ban ine Bangkok rah tabiak bruk taduan mek sắc lệnh di Patao Thái Lan brei amuk Paetongtarn Shinawatra ngak Thủ tướng ka 31 di Thái Lan. Thủ tướng bahrau di Thái Lan sangya lac gam haong Đảng Kayua taneh ia Thái saong dom đảng dalam liên minh cầm quyền, kham merat abih drei piah samar langyah dom kan kandah, tavak tavaiy, rik daong paglaong raidiuk di rahra. Hu mbaok di tuk peih ngak adat taduan Harak pok ngak Thủ tướng bahrau, hu urang pan akaok saong rilo hạ nghị sỹ di 11 đảng liên minh cầm quyền. Dua Thủ tướng dahlau daih lac ong Thaksin Shinawatra saong ong Srettha Thavisin jeng hu mbaok.

Di Paha Phật Tích dalam ban ine Vientiane, Lào hu rahtabiak Đại lễ Vu Lan thau dhar phol amaik ame. Mai pataom mbaok, hu dom chư Tăng, Phật tử haong rilo rahra di dua taneh ia Việt Nam saong Lào. Ini lac bruk ngak yaok thun kayua paha Phật Tích peih tabiak piah khik ramik dom ilamo siam gheih meng kan dalam hatai sahaneng di yaok urang anek taneh ia Việt, abih di nyu nan lac haong rahra urang Việt Nam daok atah palei negar. Meng di tuk dah page sup palup, rilo mikva Viet Nam daok di negar langiu saong Phật tử urang Lào gam hu mbaok tame dom adat meng kan di Phật giáo Lào saong Việt Nam, cuh gilau, pahadar tal dom amaik ame urang pajeng.

Hàn Quốc bahrau khan lac brei tabiak “tapuk mbong” camereip ka mbang pandiak bhang dalam tuk taneh ia ini rah tapa mbang langik pandiak glaong abih di bilan hè. Baoh tapuk hu ndom tal sajarah saong makna ba tal mbang pandiak bhang, gam ba tabiak panuac kuhria mboh dahlau dalam tukvak mbiah saong atah. Tapuk mbong jeng hu pasang iek dom kan kandah di mbang pandiak bhang tal menuac sia, tal palei negar. Ini lac mbang camereip abih Cục Khí tượng Hàn Quốc ba tabiak sa tài liệu ka mbang pandiak bhang. Kuhria tal harei ini, 22 urang Hàn Quốc matai kayua dom ruak pambuak tal pandiak saong labaih 2.600 menuac gaok kan kandah meng pandiak./.