Kongan Ban raya HCM hu kaoh duas bruk suan hukum, kaoh duas urang suan hukum, mek kareik 3 urang ngak bruk ka dom gah ba urang tabiak negar suan hukum tapa Campuchia. Ngan haong bruk ba tabiak asal kadha duah urang ngak bruk di negar langiu “bruk hanjol, jien bilan glaong” saong rilo bruk jhak karei, dom urang nan plue jue, dui ba dom urang dalam taneh ia nao tapa Campuchia piah mek hu “jien meyaih khan”. Dalam thun 2024, Kongan TPHCM hu pasang iek, kaoh duas 4 bruk ngan haong 22 urang hu pambuak tal bruk pablei salih menuac, daong paklah hu 54 urang. Dalam nan, hu jalan talei pablei salih uranaih kaman dalam bruk ngak ja yau brei - taduan anek raong.

Di tỉnh Đồng Nai hu jiak 1.300 doanh nghiep pathau khan ka bruk alin jien thuong Tet ka urang ngak, jien thuong glong jang thun dahlau. Dalam nan khoi doanh nghiep hu phun jien buh tame ngak mai meng negar langiu bhian glong abih, kuhria rah tapa  jaik 11 trieu dong sa urang, biar abih lac 5 trieu dong sa urang. Jien thuong glong abih lac urang ngak praong pan kaok doanh nghiep lac 823 trieu dong sa urang. Langiu di nan, ralo lac dom doanh nghiep hu alin brei pandap Tet, rivang  urang ngak hu raidiuk kan kandah, daong harak ve radaih apui, radaih nao palei, lixi jien akaok thun saong peih danak dak uan raok Thun birau.

Bruk uan raok Tet Nguyen dan 2025 hu tame pabak blaoh di dom sieu thi dalam ban Can Tho. Ngan haong dom pandap panda hu khik piah tal yaok ribau tan, srap gap piah duh ka hatai caong blei pandar di rahra. Piah khik kajap hu ginup pandap panda ka rahra, So Kong thuong Can Tho hu ngak bruk haong dom gah pablei pandap panda saong pagun sanya oh tagok yaom dalam harei Tet. Gah asal kadha karo salamat pandap mbang ka dom pandap mbang that, dom sieu thi saong pasak pablei salih jeng pagun sanya lac oh brei ka pandap panda bruk me-ih, kurang karo salamat dalam sieu thi.

Piah pakhang bruk khik iek, ngak bruk saong tani tanat yaom kaom dalam tuk Tet Nguyen dan thun nasak Ula Naih 2025, UB Bhap bini tỉnh Dong Thap hu tacei pato dom jabat chuc nang tui iek, tui iek njauk bruk ngak tabiak saong bruk caong pablei, yaom lac darak pasar, abih di nyu lac dalam tuk dahlau, dalam saong hadei Tet; pakhang bruk pacang caga pablei salih dauk, bleik saleik saong pandap ja. UB bhap bini tỉnh jeng hu brei langyah ngan haong dom urang ngak suan, pambak tame tuai damuai tagok rilo dalam tuk Tet piah patagok yaom jitvu.

Po bein tinh Hau Giang daok srap gap paik baoh kayau piah pablei ka darak pasar Tet Nguyen dan Ula Naih. Bilan Tet ini dalam tinh kuhria lac paik hu labaih  38.000 tan baoh kayau, rilo meng lac baoh pa-aok, kruac bung, kruac, quyt, kandiuk xiem, lahaong…Dalam nan hu rilo abih di huyen Phụng Hiệp haong jaik 14.000 tan. Piah patakik dom kanjah jhak kayua jit ruak, tukvak tapa, gah ngak nong huyen Phụng Hiệp gam haong urang ngak nong nao rivang bein, pacang caga dom janih jit ruak ngak khat lahik. Gam haong nan pambuak haong dom gah ngak mbang pablei salih piah daong ka mikva pablei tabiak baoh kayau hu lagaih.

Bruk lakhah ja di Singapore tagok dalam thun 2024, ngan haong 32 urang.  Dom mbang lakhah ja di Singapore bhian piah likau harak ba-ar piah daok veik atau ngak bruk pak ini. Bruk patagok dom bruk nan lac haduh hatai kayua meda ba tal bruk xa hoi di Singapore, labik dom urang negar langiu meda ngak dom bruk suan hukum. Dom urang ngak suan hukum meda daok guk tal 10 thun, taong bhat jien tal 10.000 dola Singapore atau njauk kaoh tui abih duah jalan nan.

Hu 32 urang metai saong 38 urang njauk rambuas kayua mbang megei taneh khang 6,8 độ richte rah tabiak di huyen Định Nhật, Tây Tạng, Trung Quoc dalam page ini (7/1). Hu thau lac, megei taneh bhian rah tabiak di gah Pei Meraong Trung Quoc. Sa mbang megei taneh rah tabiak di tinh Tứ Xuyên ngak jaik 70.000 urang metai dalam thun 2008.

Rilo taneh ia hu mboh bhap bini njom ruak jalan suan yawa kayua virus  HMPV daok njom pambak praong di Trung Quốc. Di Bengaluru, Ấn Độ hu dua adei sit, umo 3 bilan saong 8 bilan, hu mboh ruak, dahlau di nan hu ruaik viem phe quan phoi. Negar Kazakhstan jeng dom urang ruak virus nan. Dalam nan hu Nga ba tabiak kakei dom urang mbuan njom virus HMPV, abih di nyu lac uranaih, urang taha saong urang takik prein pacang ruak, tuk jit ruak ralo tagok dalam bilan la-ar./.