Bingun Tet nethak Asaih Waw 2026, Uy mban Karja ka urang Viet Nam di negar langiu - Mentri Pambuak negar langiu pambuak haong dom jabat hu pambuak tal bruk peih ngak Danak dak Bal Pataih Bhum palei 2026 hu angan “Caong takre Viet Nam: Salamat, Ginup meda” dalam harei 08/02/2026 (lac harei 21 bilan 12 thun Ula Naih Bak tui saka ia bulan). Labaih 1.500 rahra daok di negar langiu naih gheih hu mbaok tame rilo danak dak chinh tri, ilamo rahra hu makna di Ha Noi saong Ninh Binh. Dom danak dak rah tabiak dalam bingun ini pok meyaom dom bruk siam gheih, pambak hatai gul pataom taong abih bangsa adei sa-ai, pamedeih hatai hadah mbaok mbaok meta saong caong takre rik daong di bhap bini Viet Nam di negar langiu ngan haong bruk padang saong patagok taneh ia negar.

Palei ngak ahar phồng Sơn Đốc, xã Hưng Nhượng, tỉnh Vĩnh Long daok sami samar ngak ahar ka ka urang blei pablei tuk Tet. Urak ini, palei ngak ahar phồng Sơn Đốc hu 26 labik ngak ahar phồng saong 25 labik ngak ahar phồng mì, patei hana menyek, ahar phồng hu linge…Thun 2008, palei  ngak ahar phồng Sơn Đốc hu Hiep hoi Palei ngak Viet Nam brei harak meyaom Palei ngak Viet Nam saong thun 2018 hu Mentri Ilamo, The thao saong Yulit tadan, ba tame angan Drap ar ilamo oh mboh di meta pakat negar.

Dong Thap lac tinh daok dalam dom tinh hu bruk menek anek biar nan So Y te daok nyaom biai saong UB Bhap bini tinh brei patagok yaom jien daong ka menuac urang tuk menek ginup 2 anek dahlau umo 35 thun. Urak ini, tanit daong menuac urang menek ginup 2 anek dahlau umo 35 thun rilo abih lac 1 trieu dong sa urang. Tui gah y te tinh Dong Thap patagok atnut daong piah pachreih, daong prein dom diuk pasang menek ginup 2 anek, tapa nan, daong ngak lagaih tal bruk rahra bhap bini.

TPHCM khin hu jaik 348.000 ti dong piah peih ngak 157 danak dak piah ngak 159 labik dauk dalam ia kayua hajan saong ia ndik tal thun 2030. Dalam Ban raya HCM dahlau diah hu 76 labik, di Binh Duong hu 52 labik saong bhum Bà Rịa - Vũng Tàu hu 31 labik. Bruk langik salih karei  ngak rah tabiak rilo saong catang jang; ia tathik tagok glong di dom labik pabah kraong, ribaong tuk halei jeng glong, ia kan tathuak tabiak. Suai lavik, Sở Padang ngak khan lac, TPHCM brei pasang iek, padangngak sumu gauk ar pacang, brong pacang ia ndik, binek padang ia…piah patagok siam dom binek, kraong ribaong do thi.

Bingun Tet Nguyen dan 2026, kapul chuc nang tinh An Giang patagok bruk nao pasang duah, pasang iek catang jalan tapen negar piah dil samu duah mboh, pacang cakak bruk pablei dauk, bleik saleik dalam pablei salih saong ndap nda kaya ja lau. Dalam thun 2025, Mban Pato tacei 389 di tinh hu duah mboh 1.838 mbang ngak chung hukum. Mek khik ba tame kadung jien Karja jaik 300 ty dong. Tui urang dang akaok So Cong thuong tinh An Giang, bruk pablei dauk, bleik saleik pablei salih saong ndap nda kaya ja lau kuhria  hu patui veik rah tabiak srau kadau dalam tukvak anak tal, abih di nyu nan lac bingun Tet Nguyen dan 2026.

Thái Lan saong Mỹ kuhria caga ka bruk pasram kalin kan “Hổ mang vàng -Ula kanyik 2026”,  tui kuhria peih ngak meng harei 18/2 – 6/3 di Thái Lan. Bruk pasram kalin thun ini hu labaih 8.000 urang lin mai meng 30 taneh ia, pasram  rilo kadha saong pambak praong, lagaih haong bruk khik caga taneh ia, an ninh urak ini. Tong Tu lenh dom gah bol lin phao kraong Thai Lan ndem lac pasram bol lin Ula kanyik katam thun ini hu patagok siam tuk hu rilo kadha pasram gah langiu jeng yau dalam mang internet.

Kapul Y te Dunya (WHO) brei thau, Anh gam haong dom negar chau Au saong Tay A hu lahik quy che neh klak ruak ndaih baoh, hadei tuk bruk njom ruak dalam labik hu tagok khang. WHO ndom catang ruak soi lac ruak mbuan njom mbak, min meda hu pacang caga taong abih meng vaccine. Bruk ruak soi tamuh veik urak ini hu maong yau lac bruk njauk duh hatai di bruk daok rabha hatai ka bruk klauk vaccine hadei jit ruak COVID-19.

Di sa balai khik kareik di Đông Bắc Syri daok khik labaih 2.000 urang kumei saong uranaih pambuak tal IS dalam tuk gah an ninh, chinh tri di taneh ia ini daok oh karo kajap. Ralo urang kareik lac diuk saong anek di dom urang patuh phao di kol IS daok negar langiu. Dom urang kumei njauk taneh ia ini mek harak angan taneh ia, ngak ka urang oh hu angan taneh ia. Urang khik iek guk khan lac hu biak takik taneh ia taduan bhap bini drei daok khik veik pak Syri. Dalam tuk nan, sraw kadau an ninh pak ini dak harei dak catang./.