Meng akok vaktu IV mbiah tal ini, Kapol khik caga uranaih Viet Nam jak ba hu labaih 250 ti dong jien saong kaya kan piah daong ka labaih 235.000 uranaih dalam negar. Dom danak dak yau “Sahaneng hadah krah di uranaih”, “Truac hadah dom caong khin”, “Baoh sang caong takre”…rik tame paglong jalan sahaneng di bhap bini ka adat uranaih. Langiu di nan, meng ini tal abih vaktu ngak bruk, Kapol peih dom tal bac tacei pato ka dom urang ngak amaik ame  brei  salih ka jalan pato taong puac ka anek tapa jalan tui ngak njauk bruk di amaik ame.

TPHCM birau ba tabiak jalan 20 buk ngak piah bayar, daong, padang labik daok di Danak dak Jalan 4 piah ngak salah bruk peih taneh di bilan 8 thun 2026. Ban raya HCM jak ba taong abih gah chinh tri tame ngak bruk, pakhang pambuak bruk haong po gah ngak mbang saong karja bhum palei di dom labik gaok kan kandah. Pambuak bruk mek veik taneh hu khan brei cambaic laic, khik hu kein lagaih di bhap bini; tui nan jao mbaok taneh njauk tukvak piah paglong kein lagaih di danak dak.

Tukvak jaik ini, yaom durian di tinh Dong Thap trun gam gam. Urak ini, yaom durian Ri6 daok meng 20-25 ribau dong sa kilo, daok Monthong hu yaom labaih 60 ribau dong sa kilo. Yaom ini, yaok kilo baoh durian po bein khat lahik labaih 20 ribau dong. Urak ini, ralo baoh durian pablei dalam negar, pablei tabiak negar langiu gaok kan kandah. Piah lang talaih dom kan kandah, tinh Dong Thap  amar pasang iek, taong yaom dom labik pala, njauk ndem tal dom labik mbuan njom Cadimi; tui iek catang bruk khik iek ma so pala saong ma so papaok.

Tui Rayo Khi tuong Thuy van tinh Vinh Long, njom ia mbak daok ngak haduh hatai ia mbak 4%0 – mbon ngak khat lahik tal bruk pala drak. Njauk caik hatai lac, di kraong Hậu, ia mbak 4%0  meda lih tame dalam tal labaih 42km, ngak kurang ia pala drak saong ia pandar. Anak bruk nan, jabat chuc nang  kakei bhap bini juai mek ia pruh tuk ia mbak tagok glong. Brei padang dalam danao, ribaong, kuang padang ia saong pruh ia brei patak pataom.

Ngak yang  Po Muk di Bimong Po Nagar thun 2026 daok rah tabiak di tinh Khanh Hoa meng harei 5 tal harei 11 bilan 5. Adat ngak yang hu rilo danak dak hu makna  yau taong hagal peih ngak yang saong cuh gahluw di Bimong; Menei po yang, salih khan ao ka Po. Adat yang ba ia brei ngak dahlau di Bimong Po Nagar dalam praong prang di Labik Inem krung pakat negar Bimong Po Nagar,  ba tui hatai caong khin brei hajan ha ngin hu lagaih, caong khin abih bangsa dalam negar jum pataom, ngak mbang kaya meda. Bimong Po Nagar hu padang meng abap 8 tal abap 13, lac sa bimong ngak tui thaik kien truc Cam, hu taduan angan Inem kien truc nghe thuat pakat negar di thun 1979.

Dom urang ilamo Trung Quoc kakei dahlau, tuk thaik binguk yer dua gah tangin akhar V, meda mbon ba tal mblo tabiak khaw tin sinh trac hoc di drei. Piah takik mblo tabiak khaw tin di drei, bhap bini thaik binguk jaik, juai pandang plaik tangin atau akok tangin tapak mac thaik binguk. Tui nan, juai ba dữ liệu sinh trac hoc di dom mac duh bhap bini atau mac jamraih bo drei oh khik iek hu.

Dom urang roh duah di Đại học Hong Kong (Trung Quốc) ngak tabiak  “jru xịt idung tapung nano” akok meti  di dunya,  meda ba jru tagok glo akaok  piah daong ruak samar ka urang dot quy kayua kurang darah tagok glo akaok, bo oh cang klauk jru atau blaic raic. Bruk nan pabak ka bruk sangka daong iek ruak tuk tame sang iek ruak dot quy kurang drah.

Takik di nyu 8 urang metai saong 36 urang njauk rambuac hadei sa mbang apui khuah di sa pasak blei kaya kan di gah Pei Ban ine Tehran di Iran. Apui khuah rah tabiak  tuk padeih cuh biak oh ka thau yau halei di Iran saong Mỹ gaok kan kandah kayua birau cuh gauk di dua gah meng akok adit. Yau nan min, oh ka duah mboh bala halei kayua gah langiu./.