Dang akaok mbang nyaom biai samar chip bruk pacang caga hajan ia sua trak, pambuak online ngan haong dom tinh Dak Lak, Lam Dong, Gia Lai, Phaok Thu tuong Hồ Quốc Dũng pandar dom mentri, dom gah, bhum palei samar chip peih bruk ngak, daong urang gaok bala, khik kajap bruk daok dang mbang ngui, dil samu daong pandap mbang, ia hacih ka rahra bhum ia dauk dalam, neh rabha. Mbang hajan ia sua dui atah ngak neh rabha labaih 100 xa, phuong; labaih 40 urang metai saong lahik; labaih 52.000 baoh sang njauk ia dauk, 146 baoh sang khut tayah; jaik 13.000ha padai, njam patam khat lahik; labaih 30.000 athur raong njauk ia theik. Jalan mbak rilo labik gar tavak, 30 labik jalan raya glut jaleih, neh rabha.

Tui Pasak Kuhria dut iek langik tathik pakat negar, harei ini 21/11, tapen tathik dom tinh, ban meng Ban raya HCM tal Cà Mau ia ndik  daok tagok glong, glong abih di balai ia Vũng Tàu  lac 4,15-4,2 met. Ini lac mbang ia ndik glong, tui kuhria dui atah tal harei 24/11. Dom urang ilamo gah langik tathik kakei, ia ndik ngak suai  tathuak ia di dom kraong di bhum Dong Nam Bo. Langiu di nan, ia ndik tagok glong dalam tukwak ini daok ngak ia mbak njom tame hamu.

Kayua ribuk dui atah, njam patam pabak tabiak darak pasar takik jang ngak ka yaom di rilo njam patam di dom darap bhap bini di Ban raya Ho Chi Minh hu tagok dua mbang, gaok mai tagok klau mbang dut haong dahlau diah. So Kong thuong Ban raya Ho Chi Minh daok peih tabiak rilo jalan langyah piah patrun yaom saong khik kajap gah pabak yau pambuak haong dom tinh piah brei thau ka khat lahik, pasiam ndap nda kaya ka lagaih; gam haong nan patagok bruk pabak meng Tay Ninh, Dong Nai, Binh Phuoc…piah pabak bruk kurang katut harei.

UBND tinh Ca Mau birau brei ba bruk salih pandar  labaih 21 hecta glai piah padang ngak ar tathik Tây, labik Cái Đôi Vàm tal ribaong Kênh Năm. Ini lac bruk ngak piah danak dak hu taneh praong 144 ha patui ngak veik bruk ba tabiak. UBND tinh jao Mban Khik iek danak dak padang ngak tinh Ca Mau hu pambuak haong dom gah, dalam nan hu UBND xã Cái Đôi Vàm, piah ngak salah ho so, njauk tukwak ba tabiak saong caong khin ky thuat di danak dak ar tathik Tây.

Tinh Lam Dong brei daong 3 trieu dong sa baoh sang sa bilan dalam 3 bilan ngan haong po gilai oh hu ginup kein lagaih pandar piah tani tanat raidiuk; daok banah daong salih bruk ngak kuhria di mbang nyaom biai HĐ Bhap bini tinh dalam bilan 12 anak tal. Urak ini tinh hu salah blaoh 17/19 bruk duh ka bruk pacang taong mek IUU, mek hu labaih 78%. Lam Dong hu labaih 8.400 gilai ikan meng 6m ba tagok, labaih 5.000 gilai I cai saong labaih 50.000 urang ngak bruk, ngan haong bruk taong mek yaok thun labaih 230.000 tan.

Dom urang jakar khik iek athur glai di Campuchia hu palao Cò sói  raong dalam var, brei mboh bruk kham merat raong ngak pajaih hu jak jeng siam mekre di dunya ngan haong  dom janih cim nan. Cò sói lac akaok bingu hu sauk sambo jhuk saong takoi atah. Lien minh Khik ramik alam dunya hu dak angan tame nyaom mbuan lahik pajaih. Meng nan dom pluh thun tapa kham khik ramik, bruk nan hu salih, min daok takik ngak.

Lien hop quoc kakei caga kayua kurang jien ka bruk daong ngak pahla, yaok trieu urang panduan mai daok saong urang panduan nao daok gaok sa bilan La-an langaoh. Dom baoh sang brei ciuk la-an ala 0oC bo oh hu dom bruk njauk hu: labik pandaok lagaih, kaya plaih la-an, majam paghang, phui men, khan ao saong jru cavao.

Bol lin Pakistan pametai 23 urang lin dalam dua mbang mesruh matak di labik jaik bhum negar Afghanistan. Dalam 2 mbang mesruh metak hu peih ngak hadei sa adit  taong mbom ba tal 12 urang metai di ban ine Islamabad di Pakistan. Dom urang pametai di bol lin Taliban Pakistan atau dom nyaom hu pambuak tal kaol ini./.