Dalam 10 bilan thun ini hu labaih 52 ribau tan brah hu brei Harak“Brah Viet hacih, takik tathuak nerak”. Kuhria gam brah dahlau di ini, abih tih brah hu brei harak labaih 70 ribau tan, ba Viet Nam hu jeng taneh ia akaok meti ngak tabiak saong pablei brah takik thuak cabon di mblang hamu praong. Ini oh lac bruk ngak brei takik tathuak thak nerak bo daok peih tabiak jalan ngak brah Viet piah pakhang bruk meriak haong dom darak pasar caong takre blei kaya brah suai lavik.

UBND tinh Gia Lai brei peih ngak “ jalan pacang caga ribuk 3.1”, sumu haong ia kraong tagok tal tanut pacang caga pakat 3 meng 1 met. Dalam 58 xã, phuong di Bình Định dahlau diah brei panduan ba bhap bini meng 15 mon harei 18/11. Caong khin dom bhum palei kuhria caga dahlau tuk hu hajan ia ndik tagok samar; ngak njauk tuk jalan “ 4 di labik”. So Pato megru tinh Gia Lai jeng hu brei labaih 26.000 anek saih di 38 sang bac brei padeih bac kayua ia sua dauk rilo labik.

Harei roya Kaya mbang aring Ca Mau thun 2025 daok peih ngak di TPHCM daok chreih chrai hu rilo tuai damuai mai rivang iek saong blei mbang, rilo labik pablei abih oh daok aring pablei. Hu mboh di dom labik pablei dom kaya aring bhum Đất Mũi, tuai damuai mai rivang, mbang iek biak ralo dak gauk tui talei cang blei. Urang jakar tinh Ca Mau caong khin Harei roya oh lac pambak praong ilamo kaya mbang di bhum palei bo daok jhul pakhang bruk ngak mbang pablei salih, peih praong bruk pachreih urang buh jien tame ngak mbag saong yaih khan angan aring ini di TPHCM saong tinh Ca Mau.

Labik Ilamo Kong chieng Tay Nguyen hu UNESCO meyaom lac kadha biak gheih hu pato veik tapa panuac meyai ndem saong Drap ar ilamo drap ar oh mboh di meta di dunya thun 2005. Di Dak Lak, 20 thun tapa, tinh brei 214 mejam kong chieng saong labaih 1.140 blah khan ao tanjiak khan bai bangsa; peih 26 tal pato alat ragam, daoh bhap bini, tamia, daoh hari; duah pataom, ngak veik dom kadha chieng meng kan di bangsa Ê Đê, M’ nông; alin brei angan Nghe nhan uu tu ka 45 urang.

Bhum ia kraong Hau di Long Xuyen, tinh An Giang, ia kraong tagok tui ia tathik ndik meng akaok bilan 10 tui saka ia bulan. Tabung ia ndik mbang ini meda tagok meng 255 tal 265 cm, glong 3 meng 5-15 cm saong ngak ia dauk rilo xã, phuong tinh An Giang. Tui kuhria  ia glong abih meng harei 20 /11 di balai Long Xuyên di kraong Hau lac 250 cm. Tui panuac, phuong Long Xuyen  mbuan dauk dalam ia di labik jaik ar ribong, tapen kraong Hau, ribaong Rạch Giá Long Xuyên.

Rajaei Nhat Ban iew bhap bini daok diukrai di Trung Quoc paglong hatai caga saong takik nao labik hu rio manuac sia. Dai su quan Nhat Ban di Trung Quoc pachreih bhap bini “caik hatai jaik taphia drei tuk tabiak gah langiu, plaik atah dom urang mboh karei, brei nao hu rilo urang saong caik hatai ralo tal uranaih”. Bruk kan kandah rah tabiak catang hadei Thu tuong Nhat Ban brei panuac ndem tal Đài Loan (Trung Quốc) ngak catang  di Bac Kinh, ba tal bruk pambuak talei rohim oh takre gauk  di dua negar dalam rilo thun tapa.

Gilang pariak Bhap bini Trung Quốc, khan brei thau tabiak dom baoh jien xu pahadar uan raok thun birau 2026 - thun nasak Athaik Wao. Dom jien xu hu 6 janih jien xu ameh, 4 janih xu pariak saong 1 dong xu ameh patih, dom jien nan lac njuak hukum di Trung Quoc. Janih jien xu hu yaom biak praong lac jien xu ameh vin trak 10 kilo, jalan kreh atah 18mm saong hu yaom 100.000 nhan dan te, labaih 14.113 USD. Tong kong ti jien ameh di Trung Quoc brei ngak tabiak dom jien xu nan, tuk kuhria dahlau lac harei 26 bilan 11 anak tal.

Rajaei Tổng thống Mỹ  atah klak  jien je 19% ngan haong dom janih kaya nong di Philippines, daong ka labaih 1 ti USD kaya nong oh mek jien je ngan haong kaya pablei tame negar My. Rajaei My khan lac bruk nan hu ba tabiak hadei dom bruk hu palagaih ralo dalam bruk ginum biai pablei salih nao mai di dua negar saong dom kaya blei tame meng Philippines lagaih haong bruk khin blei kaya negar My./.