Mentri Padang ngak birau pok tagok Rajaei jalan ngak birau ka bruk padang ngak sang daok ka rahra vaktu meng thun 2026 -2030. Tui bruk ba tabiak, dalam negar brei ngak jaik 900.000 baoh sang, dalam nan hu labaih 191.000 baoh sang brei papah, labaih 10.600 baoh sang  dut haong dahlau diah. Ban raya Ho Chi Minh ba tabiak bruk ngak ralo sang brei pabah abih, tui nan lac Tay Ninh. Mentri Padang ngak khan lac, sang daok papah brei banraya dahlau, KCN saong dom labik hu urang khin pah sang ralo, piah pabah hu sang daok di urang ngak kong saong urang jien mek tame takik.

Kapol Khik iek quyen uranaih saong Kapol Khoa hoc Tam ly - Pato TPHCM birau pasang iek anek saih umo meng 12 tal 18 thun di TPHCM brei mboh labaih 38% anek saih prein yawa, akaok sahaneng oh siam. Njauk caik hatai lac, labaih 74% anek saih oh ka thau duah daong ka jalan sahaneng; 75% oh ka hu pato pakai ka jalan sahaneng di sang bac atau gah langiu. Jabat Khik iek, pato pakai gah y te caong khin, dom kapol nyaom khik iek uranaih, dom kapol nyaom saong don vi chuyen mon ka jalan sahaneng, pato pakai sangka jang tal dom uranaih ini.

Meng akaok thun tal ini, dalam ban raya Dong Nai hu labaih 10.500 mbang uranaih ruak tangin takai cambuai, tagok 81% dut saong tukvak ini thun dahlau. Njauk caik hatai, hu sa urang metai. Njauk ndem tal, dalam tuk anek saih tame thun bac birau, dom urang ruak tangin takai cambuai daok tagok samar. Anak bruk njom ruak di sang bac, gah y te saong gah pato megru daok padang ngak labik iek ruak glong 3 tal saong dom jalan pacang caga jit.

UBND tinh Dong Thap kuhria padang ngak dom danak dak Pajeng ba ia taba tapa ribong Chợ Gạo, ba ia taba ka Gò Công, di bhum  gah Pur tinh Dong Thap. Danak dak kuhria taong abih labaih 2.900 ti dong, caong khin rik tame khik ia taba duh ka raidiuk saong ngak mbang pala drak labaih 500 ribau bhap bini dalam bhum ia Taba Gò Công.

Tỉnh Vĩnh Long dak harei dak ba bruk “Darak 4.0” tame dom darak pasar, brei oh bayar jien mbaok, ba mbuan lagaih ka urang blei, urang pablei saong ngak bhian randap pandar kong nghe so. Dalam tinh Vĩnh Long urak ini hu labaih 400 darak, mbiah tal ini hu 43 xã, phuong brei ngak tui bruk “ Darak 4.0”, oh bayar jien mbaok, kuhria jien jaik 817 trieu dong. Tinh kham merat tal thun 2030, darak pakat 1 saong pakat 2 peih ngak oh pandar jien mbaok.

Mentri Ilimo saong Yulit Trung Quoc brei patagok bruk praong pakat negar, dui atah meng ini tal puac bilan 10 thun ini piah pachreih bruk rivang sirah yulit, ilimo dalam Tet Trung thu saong padeih padei Harei negar Trung Quoc jaik tal. Dalam nan karja di ralo bhum palei tagok bruk ngak labaih 20.000 bruk ilimo, yulit saong patagok labaih 310 trieu Nhan dan te, samu labaih 46 trieu USD tui harak alin, harak blei kaya piah pacheih tuai damuai blei kaya dalam dom harei roya ini.

Rajaei Thai Lan brei tapa paok jien 43 ti baht, samu labaih 1,3 ti USD, piah dui atah danak dak daong yaom lap dalam 2 bilan veik, piah daong ka bhap bini trun takik jien cai pandar dalam tuk yaom menyek tagok glong kayua bruk mesruh metak di Trung Dong. Rajaei Thái Lan caong khin daong ka bhap bini tuk yaom menyek tagok glong, gam rik tame jhuk pakhang bruk ngak mbang duah jien tame.

Hu oh lac takik 154 urang metai dalam dom mbang mesruh metak birau abih rah tabiak dalam 2 bilan tapa di Yemen. Mesruh metak rah tabiak di Yemen meng bilan 7, hadei mbang patuh phao di bol lin negar Yemen taong tame mblang kapal ahaok  dunya di ban ien Sanaa daok Houthi pacang khik./.