Dang akaok mbang ginum biai Thường trực Rajaei haong dom mintri, dom gah ka danak dak buh jien padang ngak jalan pasei nduac samar angaok jalan Bắc – Nam peih tabiak tuk pagaiy ini, Thủ tướng Phạm Minh Chính ndom lac, rah tui taneh ia meng gah brak tal gah meraong negar, urak ini hu ginup dom jalan pajeng ba, lac: jalan radaih, jalan pasei, kapal haok, jalan tasik. Nan ye, bruk padang jalan pasei nduac samar Barak – Meraong brei khik kajap bruk samu gauk, pambuak gauk saong patagok hu kein laba di nyu saong dom jalan nao mai urak ini daok hu. Danak dak padang ngak jalan nduac samar Bắc – Nam hu yaom phun jien buh tame ngak abih tih lac 67 tỷ USD, jalan atah abih tih 1.541km, nao tapa 20 tỉnh, ban saong hu ngak dalam 10 thun, meng thun 2025 tal thun 2035.

Mban Bangsa tỉnh Đồng Nai bahrau peih Nyaom biai pataom mbaok urang hu angan je dalam bhum bangsa takik dalam tỉnh. Di nyaom biai, urang hu angan je dalam bhum bangsa takik hu khan brei thau dom hatai sahaneng, dom caong maong, dom ilamo dalam bruk pathau khan, pambuak rahra pak di labik daok. Ong Nguyễn Sơn Hùng, Phó akaok UBND tỉnh Đồng Nai ieu dom pakat uy, kanja patui bruk caik hatai sangka patagok dom bruk ngak di urang hu angan je dalam bruk jak ba rahra dalam bhum mikva bangsa takik.

UBND huyen Tri Tôn, tỉnh An Giang bahrau peih Nyaom roya dom bangsa takik di huyen mbang ka 4 thun 2024. Nyaom roya hu pilih ruah 30 urang nao hu mbaok tame nyaom roya dom bangsa takik tinh An Giang thun 2024. Dalam nyaom roya, akaok UBMTTQVN tỉnh hu panuac ieu Huyen uy, UBND huyện, dom gah, dom puk palei dalam huyen Tri Tôn patui bruk sangka iek glang siam raidiuk mbang ngui daok dang ka bhap bini bangsa takik dalam huyện; ngak siam 3 danak dak bruk ngak negar, patagok bruk jum pataom bangsa. 

Miuyim tỉnh Bình Định daok pambuak bruk haong kapul ilamo bhap bini Cam tỉnh Ninh Thuận peih parang me-in pamere tuai mai ravang iek di labik inem mek pakat negar bimon Tháp Đôi saong bimon Bánh Ít tal abih bilan 8 ini. Ini lac bruk ngak piah khik ramik saong patagok yaom glaong inem krung ilamo bimon Cam pak Bình Định, duh ka tuai mai rivang iek dalam bilan du lich he, rik daong paglaong kein lagaih pathau khan, mayaih khan inem krung, dui pachreih tuai  dalam saong langiu taneh ia, gam jhul tagok bruk cak rok patagok kinh te di tỉnh.

Urak ini, di Tiền Giang abih bilan paik baoh durian, nan ye janih baoh ini daok biak takik, yaom tagok glaong. Durian  pajaih Monthong yaom labaih 100 ribau đồng sa kilo, Ri6 yaom labaih 70 ribau đồng sa kilo, tui yaom nan yaok kilo durian  laba hu meng 30 - 50 ribau đồng. Kayua kurang baoh durian nan ye  jiak abih dom doanh nghiep, labik blei durian  pablei tabiak negar langiu  di Tiền Giang brei kareih pabah mbang, padeih ngak bruk. Tiền Giang hu labaih 23.000 ha pala durian. Thun blaoh, jaik abihdom bein durian jeng hu laba glong, labaih 1 tỷ đồng sa thun, hu bein hu rilo baoh, nan ye laba hu tal jaik 2 tỷ đồng sa thun.  

Cảnh sát Malaysia bahrau taong tayah sa jalan pablei salih manuac. Dom urang dalam jalan ngak ini hu pambak tame dom urang negar langiu jaoh jo piah nao likau mbang pak Johor. Jalan ngak di dom kol pablei salih manuac lac tabiak negar langiu palua dom urang jaoh jo tapa Malaysia piah likau mbang. Dom urang njauk bala hadei di nan hu ba tame Malaysia njauk adat hukum meng thị thực du lịch. Dalam mbang taong tame jalan ngak pablei salih manuac, cảnh sát hu daong ka dom urang jaoh jo negar langiu saong pataom mek radaih ô tô, jien mbaok. Dom urang dalam jalan pablei salih manuac ini meda kaoh duas meng daok guk 5 thun tal daok guk luac rai.

Báo Bưu điện Washington ba panuac dom urang ilamu y te Mỹ brei thau, riyak pandiak meda lac sa makna praong ba tal pandik meteh akaok, yaom lac bruk pandik meteh akaok bhian mai meng rilo bruk srau kadau pambuak gauk. Tui nan, pandiak glaong bhian nao gam haong dom salih karei gah ap thap khi quyen, taom gaok tapak haong pandiak ia harei, độ ẩm saong dom salih karei gah alam langik tasik meda ngak brei pandik meteh akaok. Tui kuhria urak ini hu 39 triệu urang Mỹ daok diukrai dalam bruk pandik meteh akaok kayua langik pandiak dak harei dak rilo jang saong dui atah.

Kanja Liby brei thau hu tal 4/5 dom urang negar langiu di taneh ia Bắc Phi ini oh hu harak gar njauk adat hukum saong bruk taduan dom urang di cu hu hatai caong tal châu Âu lac bruk oh taduan hu. Liby daok atah Italia labaih 300km, lac labik tabiak nao ka dom urang di cu nao tapa Địa Trung Hải mbuan matai lahik piah duah sa raidiuk siam makre jang pak châu Âu.