Dalam harei 14-10 tal, mbang akaok mereip Mentri Ngak nong saong patagok palei pala peih ngak Dien dan “Yaom pang urang nong ndom”. Bruk ngak ini pataom hu 126 urang nong naih jioy saong dom hop tac xa lamaok dalam taneh aia, ngak brei palaghaih piah ka dom urang nong klah rabha dom kan kandah, hatai caong khin saong panuac pathau tagok dalam gah ngak nong. Dien dan ini jeng lac tukvak piah ka dom urang pal akaok gah ngak nong saong kapul nyaom urang nong tui pang tapak, langyah dom kadha pandiak bo urang nong sangka. Meng nan, dom sarak, jalan langyah cambaih laih pamong tal cak rok patagok bruk ngak nong hijao saong khang kajap meda hu pathau tagok, daong ka bruk ngak nong saong cak rok patagok palei pala khang kajap. 

Tukvak tapa, tinh Ca Mau hu peih ngak rilo jalan ngak piah ngak panduan salih số angaok 3 bruk ngak prong: Karja so, kinh te so saong rahra so. Urak ini tỉnh Cà Mau hu cak rok patagok ha tang so mang luoi vien thong, cap quang Internet, mang 3G/4G tal taong abih xa, phuong, ban sit. 100% puk palei dak padang Kapul cong nghe so bhap bani. Dom kapul hu ngak mau, tacei pauto ka labaih 210.000 baoh sang mek pagam, pandar dom nen tang so, meblah 65% baoh sang dalam tinh. Panduan salih so blaoh saong daok ngak brei pambak tal taong abih gah, taong abih bruk ngak di rai diuk bruk ngak kinh te - xa hoi. 

Pasak parang iek ilamo Cam, Muyim tinh Binh Thuan bahrau peih ngak bruk bac megru ilamo ka bruk ngak khik ramik saong cakrok patagok palei ngak gaok glah lan am meng kan di urang Cam dua tinh Binh Thuan saong Ninh Thuan. Di mbang ndom biai nao mai, dom urang ngak gaok glah lan am Binh Duc caong khin puk palei duah mblang taneh laghaih piah ngak labik am cuh lan pataom, hu pandar ilamu khoa hoc ky thuat; vang pataom veik mblang taneh lan piah ka dom baoh sang ngak lan mbuan laghaih dalam bruk ngak tabiak. Tui TS Bá Trung Phụ, Akaok Pasak roh duah pataom khik ilamo mbangsa, jalan ngak suai lavik brei ka bruk pataom khik saong cak rok patagok palei ngak di urang Cam njauk peih ngak tapa dom danak dak, danak dak saong dom bruk ngak hu brei mboh di anak meta. 

Mbang pakacah Urang kamei siam binai di Bhum taneran kraong Cuu Long thun ini rah tabiak meng harei 5/10 dui atah tal harei 21/12/2024. Akaok kadha di mbang pakacah Urang kamei siam binai di Bhum taneran kraong Cuu Long mbang ini pambuak pagam haong janih siam gheih di dom palei ngak meng kan, tapa jalan ngak di gah thoi trang, ngak haong bruk parang iek saong ngak brei cam hung di dom urang siam binai hu mbaok tame mbang pakacah. Urang hu mbaok tame mbang pakacah nan lac dom urang kamei umo meng 18 – 28, diuk rai di bhum taneran kraong Cuu Long saong Ban Raya Ho Chi Minh, oh ka tok pasang, oh ka moh tangin tame harak jeng diuk jeng pasang, tamat THPT tagok. 

Kong an tinh Binh Duong cap mek hu sa jalan talei ngak harak ba-ar ja, baoh catua di dom jabat, kapul nyaom ngan haong quy mo praong. Kapul nyaom urang kong an hu duah mbih saong mek tangin hu nyaom urang daok pablei salih, ngak harak ba-ar ja di dom labik sang tro di phuong Phú Tân, ban Thủ Dầu Một. Di labik duah mboh, kapul nyaom urang kong an cap mek hu rilo janih pandap panda yau: mac tinh, mac in sambo mau, tem, phoi ba-ar mbong saong yaok rituh janih harak ba-ar ja hu ngak blaoh. Dom urang ini hu taduan lac hu peih rilo tai khoan mang xa hoi piah meyaih khan saong taduan mek don blei kaya pandap ngak harak ba-ar ja. (VOV) 

Sa roh duah bahrau ini di Vien Roh duah Japon brei thau, tal thun 2050, labaih 10% bol bhap angaok labaih 65 thun di negar ini meda daok jua sa drei tuk oh hu gauk gar jaik taphia. Tal kreh abap ini di Nhật Bản meda hu jaik 4,5 trieu urang prong thun oh daok hu gauk gar rai rah ka klau. Langiu di nan, tal thun 2025, manuac urang meng umo 65 thun tagok oh hu anek meda tagok tal 10 triệu urang. Dom kadha ini meda ba tabiak jalan cuang kandah biak prong ka gah bol bhap rah ra  saong adat hukum, abih di nyu lac dalam bruk khik iek pren yava saong daong ba rai diuk ka dom urang taha daok jua sa drei. 

Brei thau dahlau ka ribuk aia sua hu ba tabiak di 11 tinh, ban di  Thai Lan, dalam tuk ban Chiang Mai, gah Barak Thai Lan daok peih ngak bruk pacang caga haong mbang ribuk aia sua prong abih dalam pluh abap tapa tuk aia kraong Ping ndik tagok glaong ngak ka aia ndik aia sua prong grauk ban. Oh lac tok ngak brei karam rilo mblang taneh daok pala drak, aia ndik aia sua jeng ba tatheik yaok ribau drei anek athur, dalam nan hu drei lamen di Mblang bein lamen daneiy angan dalam tỉnh. Dom jabat chuc nang kuhria dahlau daom hagait daok rah tabiak di Chiang Mai meda grap tanat dalam 3 – 5 harei tal. 

Mbaok aia kraong di pabah lamnge ban Manaus praong abih di labik glai nhiet doi Amazon daok patrun di tanit biar di abih kuhria meng di thun 1902. Aia hajan ala tanut kuhria rah tapa dalam bilan hajan ngak ngak brei thảm họa ka Amazon saong rilo labik di Nam My kuhria meng thun dahlau, ngak brei rilo bruk apui khuah glai prong abih dalam labiah 10 thun tapa di Brazil saong Bolivia. Langik tasik oh daok siam laghaih ngak ka kraong Paraguay jeng daok di anut biar dia bih oh ka mboh. Dom urang ilamu kuhria dahlau di labik Amazon meda pasiam veik taong abih đo am brei tal thun 2026.