Patui veik danak dak mbang nyaom biai ka 36, harei ini, Ủy ban Thường vụ Quốc hội (TVQH) brei panuac ka danak dak Hukum pasiam veik, pabak dom paka di Hukum Tiêu chuan saong quy chuẩn kỹ thuật; Danak dak Hukum Sĩ quan bol lin bhap bini Việt Nam; danak dak Hukum Phòng không bhap bini. Jeng dalam harei ini, Ủy ban TVQH brei panuac ka danak dak jalan pasang iek ka bruk “peih ngak sarak, hukum ka bruk cak rok patagok saong pandar manuac ngak pabak tui hatai caong cak rok patagok kinh tế - xã hội, abih di nyu nan lac urang ngak hu ilamo glaong”. Pasang iek, brei tapa bruk pabak kuhria kadung jien kanja thun 2024 di Mintri Y tế saong brei panuac ka bruk peih ngak Mbang nyaom biai Quốc hội ka bruk pasang iek.

Di Nyaom roya dom bangsa takik tỉnh Sóc Trăng mbang ka IV bahrau ini, Bí thư Tỉnh ủy Sóc Trăng Lâm Văn Mẫn taong yaom, bhap bini dom bangsa takik lac sa binah oh neh rabha hu saong lac  “ralow - darah” di bangsa Việt Nam. Nan ye, Tỉnh uỷ Sóc Trăng thau lac brei patui jalan patagok KT-XH bhum bhap bini bangsa takik di tỉnh. Bí thư Tỉnh ủy Sóc Trăng caong lac, anak tal, brei patagok bruk pathau khan, pagloang akaok sahneng, bruk ngak di dom pakat uỷ, tổ chức đảng saong karja palei ka bruk bangsa saong sarak bangsa, abih di nyu lac prein khang meng 3 danak dak bruk ngak negar piah pasiam hạ tầng bhum bhap bini bangsa takik, khik kajap tukvak, siam mekre saong kein lagaih.

Mban Khik ramik danak dak padang ngak dom jalan mbak tỉnh Ninh Thuận brei thau, kayua bruk pataom mek kaya glai dalam tinh ini ka oh ngak salah nan ye ka oh hu mbaok taneh padang ngak danak dak thanh phan ka 2, jalan pambuak meng xã Ma Nới, huyện Ninh Sơn, tỉnh Ninh Thuận tal canah 4 Tà Năng, huyện Đức Trọng, tỉnh Lâm Đồng, atah abih tih labaih 41km. Dalam nan, labik tapa tỉnh Ninh Thuận atah labaih 23 km saong labaih 17km tapa tỉnh Lâm Đồng. Danak dak ngak salah meda pambuak jalan nao mai dom bhum di tỉnh Lâm Đồng, Ninh Thuận saong Khánh Hòa. Dalam harei hadei, meda pambuak jalan nduac samar drah barak – maraong, jalan Roya 20, jalan Roya 28B, jalan Roya 27, jalan Roya 1, jalan Vành đai tỉnh Ninh Thuận.

Mban Bangsa tỉnh Lâm Đồng padang ngak, patabiak jalan peih ngak dom bruk pathau khan ka adat hukum dalam bhum bhap bini bangsa takik ka pacang caga jru phiel - ma túy, bruk likei kamei samu gauk, bruk lakhah caga, bruk khin gauk dalam but pajaih saong khin gauk tuk umo thun daok sit. Tui nan, meng akaok thun tal ini, Mban Bangsa tỉnh Lâm Đồng dang tabiak, pambuak bruk peih ngak 5 nyaom biai pathau khan, pato pasram, pabak ilamu gah adat hukum ka 1.130 urang lac urang jakar ngak bruk bangsa pakat huyện, pakat xã, dom urang pathau khan adat hukum, urang jakar dân số, urang y tế puk palei, urang jakar puk palei, lambaok dom kapul nyaom di palei, urang hu angan je saong urang bangsa takik.

Kapul Y, bác sĩ halain hatain TP.HCM bahrau peih ngak Danak dak iek ruak, brei jru ngan haong labaih 150 janih jru, alin pandap saong cakak mbuk oh mek jien ka 1.715 mbang mikva daok pak huyện Tánh Linh, tỉnh Bình Thuận. Rahra Tánh Linh hu pasang iek ruak, hu iek ruak ka urang kumei saong pasang iek ung thư cổ tử cung; iek ruak tangi, idung, tarakaong saong pasang iek ưng thư vòm họng; siêu âm; X quang phổi, talang; dut iek hatai baoh. Tapa nan, Kapul Y, bác sĩ halain hatain TP.HCM haong dom urang ngak pahla jeng alin 700 paok pandap ka mikva gaok kan kandah, mikva bangsa takik mai iek ruak tui danak dak.

Urang ngak praong di Mintri Ngoại giao Nga bahrau ini khan lac, Nga hu panuac ieu Đức samar duah thau bruk palai pajoa jalan nding “Dòng chảy phương Bắc”. Mintri Ngoại giao Nga ndom lac, Nga daok jhul patagok dom bruk ginum biai piah khik ka Đức peih ngak dom bruk pakat dunya di drei dalam bruk mesruh pacang khủng bố. Jalan nding raok khí đốt Dòng chảy phương Bắc 1 saong 2 yaom yaok tỷ đôla daok ala tasik Baltic khut pacah kayua dom mbang patuh di bilan 9 thun 2022. Jabat Tổng công tố Nga hu peih bruk duah thau ka bruk ini yau ye sa bruk khủng bố pakat dunya.

Darak pasa taneh riya, sang danaok pak Trung Quốc daok trun yaom meda ngak ka gah kinh tế Australia khat lahik 3 tỷ đô la Australia kayua bruk pablei tabiak quặng sắt tapa Trung Quốc trun. Yaom kaom quặng sắt di Australia daok trun, meng 143 USD/tấn di akaok thun 2024 trun daok 81 USD/tấn di puac adit blaoh. Ini lac yaom bier abih meng di bilan 11/2022 saong bier jang tanut du thao kadung jien kanja di kreih thun ini. Yaom lac Australia kuhria mboh dahlau lac yaom quặng sắt meda trun min bruk trun yaom rah tabiak samar drah jang kuhria, ngak ka gah kinh te taneh ia ini gaok rilo khat lahik.  

Takik di abih 23 urang njauk rambus dalam sa mbang khuah bahrau ini di sa mbang pataom ragu ragam jaik ban Leipzig di negar Đức. Bala rah tabiak tuk sa sruh gaiy gondola di vòng đu quay di harei pataom ragu ragam Rock saong nhạc Pop Highfield khuah tapa sa sruh gaiy gondola karei. Mban peih bruk brei thau, dua sruh gaiy khut abih ngak brei 23 urang hu mbaok njuak rambus. Harei pataom ragu ragam ini hu jaik 30.000 menuac mai hu mbaok, njauk padeih dalam 2 mon kayua pui khuah. Gah chức năng jeng daok peih bruk duah thau ka makna ba tal bala nan./.