Page harei 2-4, UBTVQH brei panuac mbang klau ka bruk kuhria caga mbang nyaom ka 1, Quoc hoi mbang XVI. Tui Tong thu ky Quoc hoi, Akaok Jabat Quoc hoi Lê Quang Mạnh kuhria taong abih tukvak ngak bruk di Quoc hoi lac 11 hari hu 2 mbang ginum biai. Tukvak padeih 2 mbang lac 8 harei piah dom jabat taduan, ramik dom danak dak  hukum, sarak. Mbang nyaom peih pakak di harei 6-4, tui kuhria harei 24-4. Akok Quoc hoi Trần Thanh Mẫn khan lac, tui kuhria mbang nyaom ka 1 Quoc hoi mbang XVI hu 3 harei ngak bruk ka urang jakar, 3 harei biai ka hukum, dom sarak. Hadei padeih 1 adit brei ginum biai mbang ka 2.

Di danak dak ngak bruk urang dang kaok ban raya hu taom gaok urang jakar Đoàn - Hội - Đội ban raya pahadar 95 thun Harei padang Ndoan Dam dara CSHCM, ong Trần Lưu Quang, Bi thu Thành uỷ TP.HCM khan lac, harei hadei  di ban raya saong taneh ia lac dalam tangin di dam dara saong bruk kuhria ka dam dara lac kuhria ka harei anak tal di ban raya. Ban raya meda brei hu sarak ka dam dara. Jeng di danak dak, Bi thu Ban uy TPHCM brei paik đờn, daoh dom kadha ka urang dam dara alin 600 urang jakar dam dara.

Tok dalam sa adit yaom durian di Dong Thap trun labaih 50%. Yaom lac caong khin “ khik piah baoh” cang yaom tagok, min urang ngak nong brei paik piah khik hu siam. Di xã Ngũ Hiệp, yaom durian Thái janih A laik yaom meng 170.000 dong sa kilo trun daok labaih 65.000 dong sa kilo; Ri6 janih A jeng trun labaih meng 95.000 dong sa kilo trun daok labaih 60.000 đông sa kilo. Trun tagok biak samar dalam 7 harei tapa ba tal rilo po bein di bhum pala gaok kan kandah.

Pachit da-a Po Patao Hung Vuong saong Roya Ahar Bhap bini Meraong negar mbang ka XIII meda rah tabiak meng harei 26/4 tal harei 01/5 ( lac harei 10 tal harei 15 bilan 3 tui saka ia bulan) di Ban Can Tho. Harei roya pataom hu meng 200 tal 250 labik parang kaya. Bruk siam gheih abih di harei roya mbang ini lac dom labik tahanek ndiuk mbeik thaik binguk talaoh ban do Viet Nam trak 700 kilo, atah 2,6 met hu 34 sambo mau lambaok valik ka 34 tinh, ban piah parang iek di kalan  kakuk Patao Hung Vuong.

Riya roya Dinh Cô di xã Long Hải, TPHCM peih ngak di puac bilan 3 meng blaoh pacheih hu labaih 230.000 mbang bhap bini saong tuai damuai mai rivang ma-in. Roya hu rilo adat cambat, ngak bruk, ma-in kadha bhap bini brei ka tuai damuai chreih chrai. Roya Dinh Cô - daok lac adat Nghinh Cô, nan lac taduan Cô ngan haong adat Nghinh Po Amuk ba ia tame ngak hamu saong adat ngak yang kaluh Amuk. Thun 2023 adat Dinh Cô hu taduan lac Drap ar ilamo oh di meta pakat negar.

Anak bruk yaom xang menyek tagok kayua mesruh metak di Trung Dong, Thu tuong Malaysia ba tabiak brei adat ka urang jakar rajaei ngak bruk di sang kuhria meng bilan ini piah trun takik abih jien blei xang menyek di negar. Malaysia  daok  buh tabiak jiak 1 ti USD yaok bilan ka dom jalan  daong yaom piah khik bruk pablei xang menyek biar abih. Yau nan min, bruk kan kadah ka jien padai daok dak harei dak praong tuk mentri Jien padai khan ka bruk oh hu daong yaom xang menyek diesel mbang ka 4 dalam adit tapa.

Labaih sa bilan hadei tuk mesruh metak di Trung Dong patuh tabiak, jiak 2.200 gilai pablei salih dom janih, daok gal tavak dalam tathik Ba Tư. Dalam nan hu labaih 320  gilai pajeng menyek saong khi cuh. Kuhria taong abih urang peih gam haong kapal gilai daok gar labaih 20.000 urang. Bol lin Cach mang  Islam Iran khan lac brei ka dom kapal glai di dom taneh ia siam gheih nao tapa labik eo tathik Hormuz. Taong abih gilai di taneh ia cagar, oh brei tapa labik ini.

Ngan haong bruk atuh phao tame dom labik ma-in mbia “kandauk”, di Campuchia  daok brei mboh bruk kham merat ngak brei lahik pakacih  bruk pachot pagat online  saong pablei manuac piah pasiam veik angan je taneh ia. Meng bilan 7 thun 2025 mbiah ta bilan 3 thun 2026 taneh ia ini patrauk labaih 11.000 urang negar langiu pambuak tal kapol pachot pagat nan./.