Mentri Padang bahrau hu mbaoh tangin ka Danak dak buh jien tame padang peih praong jalan peih samar ban raya Ho Chi Minh – Trung Lương – Mỹ Thuận tui jalan oambuak pakat karja saong menuac urang, taong abih jien buh tame labaih 36.000 ty dong. Danak dak brei peih ngak di puac thun ini, kuhria salah blaoh thun 2028 piah patakik bruk gar jalan pambuak Ban raya Ho Chi Minh ngan haong Bhum taneran kraong Cuu Long. Danak dak hu labik akaok di canah jalan Chợ Đệm (Ban raya Ho Chi Minh); labik puac abih di tatua Mỹ Thuận 2 (Dong Thap). Taong abih atah labaih 96km.

Di Nyaom biai mbang ka II, vaktu meng thun 2024-2029 di UB Mat tran TPHCM brei mboh, meng harei 21 tal harei 25/11, ban raya pajeng ba ndap nda tal dom tinh bhum ia sua di bhum Kreh negar 10.000 kadung jru ka baoh sang, jaik 2.800 tấn ndap nda kuhria tal jaik 280 ti dong; daong ramik pasiam sang bac, balai y te; daong pajaih phun pala, athur raong ka bhap bini rahar samar tani tanat raidiuk. Langiu di nan, ban raya brei khan tapa harak daong taong abih jien blei harak bao hiem y te ka anek saih saong urang taha umo meng 65 tal 75 thun oh ka hu mbang tui sarak halei karei.

Piah srap gap mbang pala baoh kayau Tet Asaih Waw 2026, gah karja tinh Dong Thap daok ngak tacei ba rahra langyah ilamo ky thuat ka bangu tabiak baoh. Tal ini, tinh Dong Thap hu langyah tabiak bangu gam gam jaik 3.000 ha pa-aok, kuhria ngak hu jaik 36.000 tan. Mbang pala ka Tet ini, sang bein langyah ilamo ky thuat jaik 14.200 ha, kuhria hu labaih 183.200 tan dom janih baoh. Gah karja pachreih po bein pambuak saong gah ngak mbang pablei salih, hop tac xa piah pablei tabiak lagaih jang.

Dalam mbang daong y te samar chip ka bhum ribuk ia sua di Dak Lak, langiu bruk dut iek ruak saong brei jru oh mek jien ka labaih 3.500 bhap bini, dom y bac si TPHCM daok halan hatain rik daong 45 trieu dong blei brah, alin ka mikva bhum ribuk ia sua. Langiu bruk iek ruak, yaok kapol nyaom daok ba tui 500 kadung jru ka baoh sang nan lac: jru trun pandiak,  oresol, jru aih craoh, jru ruak lagah la-ar, jru rao hacih saong kaya jru ruak tuk camereip.

Kapul urang ngak halar tian Han Quoc hu peih bruk pasiam sang daok ka bhap bini bangsa takik dalam puk palei 5, xa Xuân Quế, tinh Dong Nai. Ini lac bruk daok dalam Danak dak Daong 5 baoh sang urang bangsa takik daok gaok kan kandah hu tani tanat raidiuk kayua Han Quoc daong jien. Dom ganing sang hu mathik bahrau oh lac daong baoh sang hu praong laneing lanoi, gheih ghang hacih jang, bo daok brei mboh bruk sangka, klah rabha di ayut cuai sahabat dalam dunya saong karja palei ngan haong raidiuk di baoh sang rahra bangsa daok rilo kan kandah.

Quoc hoi Italia mbaoh tangin ba tame pandar hukum pametai urang kumei saong taong bhat daok guk luac rai. Bruk buh phieu phieu njauk harei Dunya atah klak bruk taong paoh urang kumei kayua Nyaom raya LHQ tacei pato ngak. Bruk ba tabiak nan kayua rajaei Italia pasmar ngak saong ba tabiak hadei rilo mbang pametai urang kumei. Hukum jeng iew brei parilo jalan pacang caga bruk diuk rai likei atau kumei, dalam nan hu bruk tui iek saong ba tagok mang xa hoi dom bruk oh mekre.

An Do brei truh tapa dom bruk srau kadau pambuak tal gah pablei salih saong khik tani tanat cakrok patagok dalam banah daok veik di thun 2025-2026, meng hatai caong dalam negar khang, jien pandar tani tanat saong bruk palai pậu hu patrun. Tui kuhria, pandar dalam labik palei pala patui veik pasiam meng jien mek tame gah ngak nong saong bruk mek hu bilan ngak mbang siam, dalam tuk pandar labik ban medin pasiam khang jang hadei mbang cakak bruk patrun jien je./.

Canh sat  Nigeria khan lac takik abih 10 urang njauk chap mek di bang Nigeria, labik rah tabiak labaih 300 anek saih saong gruk pato njauk chap mek meng sa sang bac gam bac gam daok jiak sa adit dahlau. Dalam tuk nan gah pathau khan lac, hu tal 24 urang ngak hamu hu ba nao. Bruk patuh phao birau abih  rah tabiak tuk  Nigeria daok gaok sraw kadau, dom kapol nyaom patuh phao tame bhum palei atah bayah./.