Pasang iek bruk peih ngak danak dak Mblang kapal ahaok dunya Long Thành di tinh Dong Nai, gam pasang iek, lang talaih dom kan kandah, jhul pasamar bruk ngak danak dak Thu tuong Phạm Minh Chính caong khin jhul pasamar padang ngak Mblang kapal ahaok  Long Thanh piah ba tame pandar piah mek jien dalam quy IV-2026. Thu tuong caong khin  dom bruk ngak suan hukum ba tal khat lahik, mbang jien dai, tham nhung meng bruk padang ngak Mblang kapal ahaok Dunya Long Thanh brei lang talaih catang, gam brei bayar jien  dom paok thau padeih ngak dalam tukvak tapa.

Ruak tangin takai cambuai patagok samar di dom tinh gah Meraong negar, njauk ndem tal bruk hu 8 urang metai. Di Ban raya HCM, meng akaok thun mbiah tak ini hu labaih 8.000 mbang urang njom ruak, dalam nan hu jaik 2.000 mbang urang tame sang iek ruak. Dom sang iek ruak pakat phuong di TPHCM jeng mboh rilo urang ruak. Tui BS Nguyễn Chiến, Sang iek ruak Nhi đồng 2, dalam 3 bilan akaok thun, urang ruak trak meblah meng 15 -16%, biak njauk kuhria caik hatai. Ta-eng di Dong Nai, meng akok thun hu labaih 2.200 mbang jien, ralo la uranaih umo 3 thun. Rilo urang brei cang suak yawa oxy, hlang darah saong hu sa urang metai.

Labaih 1,1 trieu drei pajaih dom janih hu Sở Ngak nong saong Alam moi truong tinh Lam Dong palai raong di Labik khik iek tasik Hòn Cau di xã Vĩnh Hảo bhum Bình Thuận dahlau). Dom janih pajaih hu palao lac dom janih kaya dalam ia kein laba glong, lagaih haong alam moi truong. Bruk pabak phun pajaih rik tame piah ngak brei parilo kaya kan, caik menek tabiak ngak kaya meda rilo piah ka harei hadei. Dalam tinh Lam Dong urak hu labaih 8.000 gilai saong labaih 40.000 bhap bini nao ngak mbang di tathik taong chap kaya ikan dalam ia.

Kong an tinh Dong Nai padang bruk lang talaih, chap mek 343 urang pambuka tal kapol pachot pagat online tapa nedar, hadei taduan hu jaik 400 urang mai meng Campuchia. Gah bol lin langyah taong phat suan hukum 331 mbang urang ngak suan hukum saong oh hu  ho chieu, kuhria tui jien tagok tal labaih 2,4 ti dong. Dom urang ini tapa negar Campuchia suan hukum piah ngak bruk ka dom labik Casino di PoiPet. Pak ini, khol drei  pandar dom nen tang xa hoi piah pagat dui ba urang pandar Internet.

Meng harei ini 30.3, TP.HCM langik pandiak dui atah rilo harei, tui kuhria pandiak glong abih tal 36 do C. Njauk ndem tal di pasak ban raya, kayua bruk do thi samar gam hu rilo radaih tame tabiak nao mai yau nan ye pandiak meda glong jang meng 2 tal 4 do C dut saong pandiak. Dom labik di gah Meraong negar hu pandiak catang yau Phước Long jaik 38 độ C, Tà Lài (Đồng Nai) labaih 36 độ C…Pandiak gam langik thu biak kan daman saong mbuan ngak jhak tal prein yawa gam mbuan patuh.

Thu tuong Thai Lan khan brei thau taneh ia ini hu rajaei birau dalam adit ini. Sarak angan dom akaok mentri birau hu pok tagok di hatrei 30/3, tui nan brei thau 35 urang hu ba tagok piah pasang iek, dom bruk hagait tavak tavaiy halei oh atau thei pamaoh mebai halei. Hadei tuk hu tut angan, rajaei birau brei yaih khan sarak anak Quoc hoi piah peih ngak danak dak bruk ngak.

Dalam kham merat piah ngak brei trun kan kandah gauk di Trung Dong, Pakistan peih bruk ginum biai pakat Ngoại truong haong dom taneh ia Thổ Nhĩ Kỳ, Ai Cập saong Ả Rập Xê Út di Islamabad, dalam nan pataom tame padang bruk peih jalan eo tathik Hormuz, pasiam veik bruk ngak mbang pajeng ba tui jalan tathik dunya tapa labik ini. Eo tathik Hormuz – jalan pajeng ba labaih 20%  pabak menyek saong khi ia di dunya urak in haiak abih lac gaok Iran pacang cakak hadei dom mbang patuh phao di Mỹ dui atah sa bilan tapa.

Cuba taduan 15.000 tấn brah daong ka Trung Quốc dalam bruk daong praong jang piah pabak kaya mbang ka taneh ia ini. Ini lac kaya kan mbang ka 3 hu Trung Quoc payua tal Cuba dalam thun ini. Kaya daong hu payua tal Cuba dalam tuk taneh ia ini daok dang anak bruk kurang kaya mbang dui atah, kayua dom adat hukum taong phat di My saong pabak bruk pablei tabiak./.