Rajaei bahrau ba tabiak Sarak brei adat patatik, ngak mbuan mbiah jang harak gal karja dalam du lieu. Tui nan Sarak brei adat khau tin di angaok Co so du lieu negar ka rahra hu peih ngak saong pandar salih ka dom harak gal CMND atau CCCD atau kat can cuoc, harak brei angan can cuoc; khau tin ka labik daok di rahra. Khau tin di angaok Co so du lieu ka baoh sang tui online hu peih ngak saong pandar salih ka harak angan anek birau ndih tapui atau khau tin dalam harak khan menen anek, harak mbaoh tangin ka bruk tok diuk tok pasang, harak khan ka urang metai, harak brei thau ka urang metai atau khau tin di urang metai…

Darak pasar  pablei ikan pra tabiak negar langiu hu rilo bruk salih birau siam lagaih meng bruk khin blei tame rilo di dom darak pasar Trung Quoc saong Mỹ. Meng bilan 10 mbiah tal ini, yaom ikan pra di Bhum taneran kraong Cuu Long daok di tabung glong, meng 29 ribau dong sa kilo, tagok 3 ribau  dong sa kilo dut saong thun dahlau. Tui Mentri Ngak nong saong Alam langik tathik, piah khik yaom ikan pra Viet Nam hu karo kajap, urang raong juai jak gauk raong ralo, brei raong njauk tukvak saong pambuak kajap haong urang ngak mbang pablei salih.

Tinh Ca Mau hu 386.000 ha danao raong aring; aring di Ca Mau mek hu labaih 40.000 tấn sa thun, dang akaok negar. Langiu di nan, labaih 70% kaya ngak meng aring  hu pablei tabiak negar TQ. Jeng mai meng hu angan je thei jeng takre, aring Ca Mau dang anak bruk urang ja kaya di drei. Yau nan ye, ong Lê Văn Sử, Phó Chủ tịch UBND tỉnh Cà Mau ndem lac “ aring di Ca Mau njauk brei tauk angan di Ca Mau, piah plaik njiak aring dom labik karei pajeng mai pabah mbang negar saong mek angan lac aring Ca Mau”.

Bhum kreh negar gaok 4 mbang ribuk rah tabiak jiak gauk dalam sa bilan, ngak ia dauk khut tayak sang danaok, njam patam. Puac bilan 9 - akaok bilan 10, Barak negar saong bhum kreh negar  tapa 13 harei hajan ribuk sua,  ba tal 66 urang metai atau lahik. Mbiah tal bilan 10, ia ribuk sua tame meng Hà Tĩnh tal Quảng Ngãi. Dalam 48 tuk, ia tagok di Bạch Mã glong 2.465 mm glong abih kuhria di dunya. Akok bilan 11, ia ribuk tagok samar, glong jang ia ndik adit dahlau. Langiu di nan, bruk glut jaleih  trak di jalan ceik  Khánh Lê (tỉnh Khánh Hòa) ba tal 7 urang metai saong 1 urang lahik. Di Da Nang glut jaleih taneh ba theik 3 urang.

Harei kabroi, dua mbang gkut jaleih ar kraong Hậu, di palei Vĩnh Phước, xã Phú Hữu, tỉnh An Giang, ngak 13 baoh sang gaok kan kandah, brei panduan ba nao labik karei chip. Tui kuhria khat lahik camereip labaih 300 trieu dong. Sa-ai  Nguyễn Văn Tâm bhap bini di palei Vĩnh Phước khan lac, tuk mboh ia gaving sang taneh talah, sa-ai iew daong ramik drap ar nao labik karei samar piah plaik njiak.

Indonesia am cuh klak 5,7 tấn hadang njom jru phong xa, hadei tuk Cuc Khik iek kaya mbang saong Jru tavao Mỹ duah mboh saong bayar veik 2 container. Yaom lac taka so njom phong xa biar min hadang njauk ba am cuh klak piah khik siam ka alam dunya. Dom jabat chuc nang Indonesia daok samar langyah, ngak hacih taong abih khu kong nghiep Cikande, labik hu njom phong xa.  

Australia khan lac 71 sang bac di karja pak ban ine Canberra saong dom bhum jaik taphia brei kareik pabah mbang harei 17/11, hadei dom mbang pasang iek birau abih duah mboh dom kaya ndap cuah ngak mekre hu amiăng hu pandar rilo dalam sang bac. Urak ini, negar ini mek veik abih tih 5 janih cuah ngak mekre hu sambo mau hadei pasang iek hu amiăng ngak jhak tal prein yawa.

Subuh page harei 17/11, klau urang pacang sir mbaok peih radaih oto ginuh tame gilang khan ao chiat jien ngak meng kareih di Louis Vuitton di pasak ban ine Rome, Italia, mek nao rilo kadung teik saong kaya ngak meng klik yaom rilo jien. Louis Vuitton danei angan hu rilo kadung teik saong kaya ngui cuh mekre di urang kaya meda, dalam nan hu rilo drap ar pablei yaom dua klauk ribau euro tal labaih 5.000 euro. Kayua hu yaom pablei chiat, dom labik parang pablei saong gilang drap ar ini bhian hu urang co blah caik meta klaik./.