Tui kuhria mboh dahlau, meng ini tal harei 20/2, ia mbak nyom tame bhum taneran kraong Cuu Long tagok glong. Gam haong nan halau ia saong ia mbak njom tame di Bhum taneran kraong Cuu Long dalam bilan pandiak thun 2024 -2025 glong jang dom thun dahlau. Yau nan ye, dom bhum palei samar padang ia taba tuk ia trun piah duh ka bruk ngak nong saong ia pandar ka bhap bini. Tui nan, duah thau khaw tin kuhria iek langik tasik saong dom jalan pacang caga njom ia mbak.

Tui So Tai Nguyen saong Moi truong Ban raya HCM, dalam abih tih jaik 81.000 baoh sang oh ka hu harak pandar taneh riya hu yaok kuhria meng bilan 4/2023, tal ini tok daok jaik 10.000 baoh sang oh ka hu harak pandar taneh riya. Kuhria tal puac thun ini, Ban raya HCM lac ngak salah blaoh bruk brei harak pandar taneh riya ka dom baoh sang daok veik. Min, So Tai nguyen saong Moi truong Ban raya HCM khan lac, ini lac taka kuhria meng bilan 7/2014 tal abih bilan 4/2023. Urakni, hu rah tabiak ralo dom danak dak barau oh ka hu harak pandar taneh riya nan daok kham marat lang talaih.

Bhum taneh ngak padai di HTX Ngak nong Tân Điền, huyện Gò Công Đông, tỉnh Tiền Giang brei yuak padai ban inge tím hu pala mbang camereip. Hu doanh nghiep blei yaom 14.000 dong sa hecta yau nan ye urang ngak nong mek hu kein laba 70 -80 trieu dong sa hecta sa mbang yauk, lac oh ka bhian mboh meng lavik mai. Tui  tiến sĩ Đào Minh Sô- urang lai tabiak padai pajaih tím ban inge SR21, brah ban inge pajaih birau hu asar pacang oxy mbang, lagaih haong urang mbang kieng. Brah nan  taneh lisei bingi, mbuan tahaneh yau brah patih, mbong bhian harei.  

Dom thun jaik ini, muk kamei bangsa takik Gia Rai di huyen Phú Thiện, tinh Gia Lai thau pandar kaya drap ar lagaih hu di bhum palei drei piah padang bruk ngak mbang hu siam makre. Dalam nan, bruk ngak men alak tapai meng kan xa Ia Yeng lac sa kadha piah khan. Oh tok rik prein daong khik ilimo meng kan, bo daok ngak tabiak inem hadah ka gah jirah rivang ilimo, dom urang hu mbaok tame di bruk ngak ini hu krein mboh jalan patagok kinh te patui di ngaok mang xa hoi. Urakni, tui thaik thaot praong sit di caih alak tapai bo hu yaom meng 150 - 350 rabau sa baoh caih.

Bo chi huy Bol lin Biên phòng tỉnh Kiên Giang birau padang ngak hu salah Rup patau thaik “Wa Ho thong urang lin Bien phong”. Rup thaik hu padang ngak meng patau praong katil, sambo mau kanjik katam, glong jiak 1,9 met, kuhria abih tih taneh praong jaik 780 met vuong, kuhria jien abih tih jaik 1 tỷ dong. Rup thaik  hu padang di labik taneh  Bộ Chỉ huy Bol lin Biên phòng tỉnh Kiên Giang. Hadei ngak salah rup patau thaik Wa Ho, đơn vi peih bruk jak ba “ Tet pala phun miat miat hadar dhar phol Wa Ho” dalam taneh pdang bol lin, dom jalan mbak nao mai dalam bhum palei pala, rah tui jalan pasang khik tapen negar.

Tong thong My Donald Trump hu khan bruk ikak jien je 25% ka abih tih nhom saong thep blei meng nagar langiu. Tanut jien je ini hu peih ngak meng harei 4/3 anak tal. Langiu di harak gal ini, ong Donald Trump hu khan brei thau dalam dua harei anak tal, hu pathau khan di bruk ikak jien je di abih tih dom nagar ikak jien je pandap panda My saong dom pandap panda njauk ikak jien je mada hu o to, chip ban dan saong jru cavao. Ong Donald Trump jang pathau khan oh sangka di bruk taong ikak jien je di dom nagar karei.

Mentri Noi vu Anh khan lac, dalam bilan 1 meng blaoh chap mek hu labaih 600 mbang urang negar karei tame, hadei karja taneh ia ini hu peih 800 mbang pagui mek. Rajaei Anh tacei tabiak ini lac tanut tagok 73% dut saong bilan 1 thun 2024 nan lac tuk đảng Bảo thủ pak adat. Tui đảng Lao động Anh, labaih 16.400 urang negar karei tame  mai njauk  patrauk tabiak truh kuhria meng tuk palih ruah.

Jabat pasang iek langik alam Argentina hu khan kakei brei njuak caik hatai ralo abih kayua pandiak pambak praong ralo labik di 11 dalam 23 tinh, ban di nagar ini pandiak tagok tal labaih 40 ndo C, dalam tuk di ralo tinh karei jang hu panuac kakei bhap bini. Dom urang jakar hu kakei mikva takik tabiak jalan di dom tuk langik pandiak tabung glaong klah di pandiak dalam rup saong langiu langik oh sumu gauk, brei manyum ralo ia, cuk ao tapha laneng lanoi, luk jru di kalik piah pacang pandiak./.