Page ini, harei 14/01, Mentri Bangsa saong Agama peih Nyaom biai kuhria iek veik taong abaih bruk bangsa, agama thun 2025, peih ngak thun 2026. Pho Thu tuong Rajaei Lê Thành Long mai pataom mbaok saong tacei ba Nyaom biai. Tukvak tapa, Mentri Bangsa saong Agama brei ngak tui hu siam lagaih dom jalan tacei ba, jalan peih ngak sarak hukum ka bangsa saong agama, peih ngak danak dak pakat negar patagok bruk ngak kinh te - xa hoi di bhum urang bangsa takik saong bhum ceik pambuak pagam haong bruk padang ngak palei pala birau saong danak dak patrun kathaot khang kajap…Meng nan, tani tanat raidiuk di bhum urang bangsa takik, mikva bangsa diukrai dak harei dak patagok, siam mekre dalam raidiuk, hatai jia tame hu karo kajap.

Bingun Tet nethak Athaik Waw anak tal, Tong Lien doan Lao dong Viet Nam meda daong 2.500 harak ve radaih apui, kapal haok ka urang ndoan, urang ngak hu raidiuk kan kandah ngak mbang atah sang di dom tinh, ban gah Meraong negar. Tong Lien doan parabha harak 500 harak vé radaih apui nao palei gam 500 paok pandap yaom 300.000 dong sa paok ka Liên đoàn lao động TPHCM, LĐLĐ tỉnh Đồng Nai, tỉnh Tây Ninh piah daong ka urang doan, urang ngak mai palei mblang Tet. Tui nan parabha 2.000 harak ve nao saong mai gam 2.000 paok kaya Tet yaom 300.000 dong sa paok ka urang doan, urang ngak.

Danak dak daoh tamia “Thun birau jum pataom - Tet anit ranam” birau peih ngak di phuong Đông Hòa, TP.HCM, dahlau diah lac Ban Dĩ An, tỉnh Bình Dương pambuak bruk anit ranam, pambuak dom urang ngak pahala rik tame hu jaik 700 trieu dong kuhria Tet ka urang kathaot. Phường Đông Hoà urak ini hu jaik 140.000 bhap bini, ralo lac urang ngak mai meng dom bhum palei karei mai daok pak ini ngak mbang, raidiuk dao kan ndah ralo. Bruk rik jien daong di dom urang ngak pahala lac prein khang biak iek praong daong ka bhum palei kuhria ka raidiuk hu tani tanat.

Mbiah tal ini, tinh Dong Thap hu padang ngak saong pasang iek hu 2.767 baoh sang salih ka dom baoh sang taik tahak, hu taong abih bruk ba tabiak. Dom danak dak sang daok xa hoi hu ngak salah baoh: Tân Hương (171 baoh sang), Danak dak sang daok ka urang ngak (392 baoh sang), Danak sang daok xa hoi Song Hải Long (156 baoh sang), sang daok ka anek saih sinh vien (424 baoh sang). Bruk padang ngak sang daok ka urang kathaot, baoh sang jaik kathaot tukvak tapa  hu dom gah, dom pakat dalam tinh Dong Thap peih ngak tui jalan “ hala siam papaok hala tahak”.  

Ban Can Tho birau kuhria iek veik bruk jak ba urang halan hatian thun 2025 saong Jak ba gauk ngak tui “ Danak dak jak ba urang halan hatian brei darah tuk Tet saong Roya Xuan hong” thun 2026. Cần Thơ kham merat peih ngak siam lagaih dom bruk hlan hatian brei darah, Harei “Taong abih bhap bini halan hatian brei darah”; Danak dak “Dom darak meriak bhong bilan hè”; dom bruk pachreih  “ Harei Dunya urang brei darah” saong  “ Bruk ngak Meriak bhong”. Ta-eng Bilan Tet saong Roya Xuan hong kham merat hu takik abih lac 13.800 don vi darah, sumu  20 % dalam thun.

Harei kabroi (13/10), Gah Y te Dunya (WHO) brei panuac kakei catang  iew dom taneh ia patagok jien je dac biet ngan haong dom kaya ngak jhak tal prein yawa, nan lac ia menyum hu saradang saong alak. Tui kuhria di WHO, yaok thun dunya hu labaih 2,6 trieu urang metai pambuak tal bruk pandar alak mbia saong labaih 8 trieu urang metai kayua mbang huak oh lagaih. Tapa nan brei mboh  bruk kanjak njak tal prein yawa biak trak ngan haong prein yawa bhap bini di dunya.

Page ini, sa bala rah tabiak angaok jalan pasei biak trak rah tabiak di huyen Sikhio, tỉnh Nakhon Ratchasima, Thái Lan. Sruh radaih cần cẩu di labik padang ngak jalan pasei jaleih trun kateik  radaih daok peih nduac, ngak apui khuah praong saong ngak metai urang dak harei dak ralo. Kuhria mbiah tal jala pandiak, urang metai kuhria mboh takik di nyu 22 urang. Yaok pluh urang njauk rambuac trak kayua dom sruh radaih plait jalan pasei saong apui khuah khang. Njauk caik hatai, ralo tuai damuai di sruh radaih apui  nan lac anek saih, sinh vien saong urang ngak bruk.

Hajan praong rah tabiak gam gam dalam dom adit blaoh di ban ine Jakarta, Indonesia ia ribuk sua trak, ngak gal tavak balai sac radaih dien duh ka bhap bini di ban ini, ba tal labaih 40% radaih pajeng pandap peih meng dien klak saoh. Kraong ia Krukut sre ar ngak ia dauk labik daok di bhap bini tagok tal 20 cm tal sa met. Dom jabat pambuak tal jalan tathuak ia, kuhria caga dom kaya mbang ka bhap bini./.