Mentri Kong An hu pasang duah, kaoh duas yaoh rituh bruk pambuak tal bruk ba urang nao ngak di negar langiu. Dom gah ngak mbang pablei salih mek jien langiu di harak tapuk biak praong; dom kapul, urang menuac oh hu brei palih ruah urang ngak bruk tapa blah web satau mang xa hoi, jhak abih lac hu urang ngak ja harak gal di jabat, kapul piah palih ruah urang ngak bruk suan hukum. Kayua nan tukvak anak tal Mentri kong An patui veik pambuak, salah blaoh adat di hukum, plaih harak brei ngak “karei”, harak gal oh njauk hu saong jao ka gah ngak mbang pablei salih hu chuc nang ba urang gak bruk nao ngak bruk di negar langiu ta-eng ciuk bruk di drei. Urak ini dalam negar hu jaik 500 labik hu harak brei ba urang ngak bruk nao ngak bruk di negar langiu tui harak pambuak bruk.

UBND tinh Dong Thap payua harak iew dom bhum palei pakhang bruk khik iek kaya khoang san, njauk ndem tal bruk kuac mek cuah. Iew dom doanh nghiep kuac mek cuah brei pagam camera pasang dom labik mek cuah njauk tui hukum; brei kaoh tui hukum meyah kuac mek cuah suan oh njauk ba ngak dom danak dak hu makna praong tui tacei ba di Thu tuong Rajaei.

Rilo urang ikak kaiy di An Giang ndom lac, urak ini yaom aring tasik trun rilo dut haong sa bilan dahlau. Yaom aring kiak daok 350.000 dong sa kilo, trun 200.000 - 250.000 dong sa kilo; aring y, aring tứ janih 1 daok 230.000 - 250.000 dong sa kilo, biar jang 50.000 – 70.000 dong sa kilo. Ong Võ Văn Thực, Phaok akaok Jabat Kinh te UB Bhap bini xa Vĩnh Phong, brei thau yaom aring trun dalam bilan tapa kayua hajan ngak patrun hatai caong pablei dalam negar, dalam tuk darak pasar Trung Quoc anak meta brei padeih pataom ndap nda kayua gah pabak dalam negar hu rilo.

Tinh Vinh Long birau peih bruk pahadar 85 thun Harei Mesruh metak di Nam Ky (23/11/1940 - 23/11/2025). Urak ini, Vĩnh Long lac tinh tapen tathik hu ar tapen tathik atah 130km, hu lagaih rilo ka bruk ngak mbang di tathik. Taneh raong pala kaya ia labaih 122.000ha. Vĩnh Long pamong tal bruk ngak tabiak nang luong hacih, njauk ndem tal dien hangin tathik, hu prein ngak bruk khang. Phun la-u di Vĩnh Long hu jeng bruk ngak mbang kinh te pablei tabiak negar langiu duah jien tame rilo. Ini lac bruk lagaih di tinh Vinh Long padang ngak saong patagok tinh Vinh Long dak hare dak kaya meda jang dalam tukvak anak tal.   

Di Ban raya Ho Chi Minh daok rah tabiak di labik parang “Ban raya Ho Chi Minh uak drei tagok gam haong taneh ia tapa mata maong gah ndien anh” yaih khan 250 thaik thaot ka Sai Gon – Ban raya Ho Chi Minh hu mek dalam kadha ndien anh. Labik bahrau di labik parang thun ini lac bruk pandar ilamo kong nghe bahrau di labik biak ja srau gauk saong photo booth 360 do, daong urang iek hu veik bruk ba drei tame ngak tapak, ndom meyai, ngak jeng bruk pambuak drut druai khang jang ngan haong dom thaik thaot, asal kadha ka ban raya. Bruk ini daok dalam Lien hoan Phim Viet Nam mbang ka 24. 

Ukraine saong Nga peih sa bruk ginum biai birau ka rup atau di dom urang lin metai. Ukraine khan lac urang taduan hu 1.000 rup atau urang lin. Bruk bayar atau di urang lin metai hu bruk daong di UB Chu thap do dunya. Dua taneh ia brei ngak rilo bruk  bayar rup atau urang lin metai, jeng yau bruk lin daok guk kuhria meng tuk mesuh metak rah tabiak di thun 2022. Yau nan min, dom ginum biai daok gal tavak, dom urang ginum biai dau gah oh hu taom mbaok.

Thu tuong Australia brei thau negar ini oh ngak cagar ka bruk kham merat di Thổ Nhĩ Kỳ dang ngak jak jeng nyaom pataom glaong pakat ka bruk langik salih karei thun 2026 (lac COP31). Ong jeng brei thau lac, bruk gar tavak dui atah ka bruk Australia atau Thổ Nhĩ Kỳ brei dang ngak COP31 meda ngak laman lamuac kham merat daong dom negar kaoh pulao di Thai Binh Duong pacang caga haong langik salih karei. Australia saong Thổ Nhĩ Kỳ jeng pabak harak gal dang ngak COP31 meng thun 2022.

Darak Noel di ban Magdeburg, di Đức peih pabah mbang taduan raok tuai gilac veik, brei mboh bruk pamedeih tagok  di sa dalam dom roya praong di bhum taneh ini, hadei tuk brei kareih pabah mbang di kreh bilan Noel thun dahlau kayua glam mbom ngak 6 urang metai saong yaok rituh urang njauk rambuac. Thun ini, oh hu peih pak ralo yau dahlau diah, salih tame nan lac yawa chuong meng nha tho taong tagok, brei mboh tame harei “roya dalam kandi kandang jua”