Di Ban raya Can Tho, biar harei kabroi 24/3, Mentri Kong thuong peih Nyaom biai jhul tagok pablei tabiak brah thun 2026 ngan haong bruk hu mbaok dui labaih 100 urang ikak kaiy pablei salih padai brah. Mentri Kong thuong brei thau, pablei tabiak brah Viet Nam kuhria tal abih harei 15/3/2026 mek hu labaih 1,74 trieu tan, yaom kaom jaik 830 trieu USD, dut saong tukvak ini thun 2025, tagok ka brah, min patrun ka yaom kaom. Kuhria meng bilan 3, pablei tabiak brah Viet Nam tapa dom darak pasar njauk gaok kan kandah kayua mesuh metak di labik Trung Dong kayua jien logistics dalam dunya tagok glaong.

Yaom pablei lẻ kaya xang RON95 di Viet Nam urak ini di tanut biar jang rilo dut saong rilo negar taphia. Ngak bruk pato tacei di Phaok Thu tuong Rajaei Bùi Thanh Sơn – Akaok Mban Pato tacei pakat negar pacang pablei dauk, bleik saleik dalam pablei salih saong kaya ja lau, pandar dom labik hu pambuak patagok bruk pasang iek radaih tabiak tame negar, abih di nyu nan lac dom radaih hu bồn chứa, blei xang menyek truh tapa tanut chuan piah tabiak negar langiu; gam haong nan kak kajap bruk pasang iek labik pataok, dil samu duah mboh, pacang cakak bruk pablei dauk tapa negar.

Biar harei kabroi 24/3, Akaok UB Bhap bini tinh Dong Nai hu harak pato tacei dom so, dom gah saong dom labik hu pambuak nyaom biai ba tabiak langyah khao tin mbao chi ndom ka bruk jalan hu padang ngak ka baoh sang rahra gaok srau kadau di xa Phú Trung (dahlau diah daok dalam huyen Phú Riềng, tinh Binh Phuoc). Akaok UB Bhap bini tinh Dong Nai jao pandar ka dom jabat, labik hu pambuak samar chip pasang iek labik, pasang duah harak gal thiet ke, padang di danak dak, ngak cambaih laih makna rah tabiak bruk nan; taong bhat aval dom bruk ngak chung (meyah hu) tui adat, khik kajap salamat ka rahra labik padang danak dak.

Danak dak Labik ngak kong Tân Đức daok dalam xa Tân Minh, tinh Lam Dong (labik huyen Hàm Tân, tinh Binh Thuan klak), hu taong abih taneh mek gilac labaih 300ha. Tal ini, bruk bayar jien peih paha mbaok taneh mek hu labaih 97%. Phaok Akaok UB Bhap bini tinh Lam Dong Nguyễn Hồng Hải pandar dom so, dom gah, bhum palei saong po buh jien tame pataom tame bruk taoh talaih kan kandah, jhul khang tukvak ngak bruk di danak dak. Dalam nan, ndom khang ka bruk samar chip salah blaoh dom harak gal hu pambuak tal bruk mek taneh saong taneh caga ka labik daok karei.

Pandiak di rilo labik daok tagok angaok labik tinh Tay Ninh, di rilo labik labik pandiak meda tagok tal 37 do C. Langik thu pandiak dui atah oh lac ngak kan kandah tal raidiuk blaoh daok dalam nan bruk mbuan patuh khuah apui, khuah glai saong dom asal kadha ka prein yava. Balai Kuhria langik tasik kraong ribaong tinh Tay Ninh harei kabroi hu khan brei thau, dalam mon 24-48 tuk anak tal, pandiak patui veik peih praong saong pandiak jang dalam tinh; Pandiak glaong hu mboh rilo abih di tanut 35–37 do C. Rahra takik tabiak langiu di tuk pandiak catang, menyum ginup ia, gam haong nan srap gap dom bruk caga apui khuah, padang khuah.

Thu tuong Narendra Modi hu caik inem hu makna dalam chinh truong An Do tuk jeng urang dang akaok karja dâ cử hu tukvak daok ngak bruk atah abih di sajarah negar ini, hu jaik 9.000 harei pan bruk. Bruk ini oh lac brei mboh bruk tani tanat saong gam gam dalam bruk hit chinh tri di Thu tuong Modi, blaoh daok brei mboh tanut tani tanat ka quyen luc di chinh truong An Do. Ong Modi hu salah blaoh dua tukvak ngak bruk taong abih saong patui veik njauk palih ruah di tukvak ngak bruk ka klau danak.

Karja Tong thong My Donald Trump pathau khan peih veik dua mbang pasang duah ngan haong Dai hoc Harvard, brei mboh ka bruk ngak catang bahrau dalam dom kadha pamaong tame sang bac dai hoc danei angan ini. Dom mbang pasang duah brei pataom tame ngak cambaih laih lac Harvard hu patui veik pandar dom bruk brei caik dahlau pambak tame chung toc dalam palih ruah sinh vien ha oh, langiu di mbaoh tangin thun 2023 di Toa an Toi cao My. Langiu di nan, dom bruk khan brei thau ka bruk bài Do Thái dalam sang bac jeng hu pasanh duah thau.

Anak dom bruk rah tabiak srau kadau saong piah srap gap pacang caga haong bruk srau kadau di Trung Dong meda hu dui atah, Rajaei Japon hu mbaoh tangin daong veik labaih 810 ty yen (labaih 5,3 ty USD) meng kadung jien caga piah srap gap veik halau phun jien phan ung taong abih, siam lagaih saong njauk lagaih. Tui kuhria, bruk bayar phun jien caga ini hu Noi cac Japon mbaoh tangin aval drah abih.