Mentri Pato Megru daok peih Danak dak pakacah tamat THPT di angaok mac tinh. Tui kuhria dahlau, dalam bilan 4 saong 5-2026, brei hu labaih 100.000 anek saih ba drei tame pakacah iek dahlau kadha tangi di angaok mac tinh piah padang gilang kadha tangi saong taong yaom majam ilamo ky thuat… Tal bilan 6-2027, mbang pakacah tamat THPT brei peih haong gauk tui dua jalan: pakacah di angaok mac tinh di dom labik pakacah ginup saong pakacah angaok bi-ar harak di dom labik karei.

UBMT Negar Viet Nam xã Củ Chi, TP.HCM birau meyaom ong Nguyễn Văn Tâm, umo 87 thun, daok di palei 6A, xã Củ Chi hu halan hatian kaoh yaneh 400 met vuong alin brei ngak jalan. Ong Tâm khan lac ong halan hatian brei taneh kajar pablei ngak jalan, piah mikva dalam palei nao mai hu lagaih. Ong caong khin puk palei dak harei dak hu cakrok patagok, raidiuk bhap bini siam jang. Ong Tâm la bhap bini naih gheih di palei 6A tuk halei jeng ngak siam tui jalan tacei ba di Dang, sarak hukum di Karja.

Tui Kapul Njam patam baoh kayau Viet Nam, pablei tabiak durian tagok khang dalam dom bilan puac thun hu daong gah njam patam baoh kayau patagok samar gilac. Kuhria rah tapa dalam bilan 10 pablei tabiak hu 919 trieu do la My, tagok tal 77% dut haong tukvak ini thun dahlau. Ngan haong bruk cakrok patagok yau urak ini, kuhria pablei tabiak njam patam baoh kayau dalam thun ini brei truh tapa yaom jien 8 ty do la My, patui veik ngak jeng bruk glaong abih  bahrau di gah njam patam baoh kayau.

Di tinh Lâm Đồng gah pato megu gaok rilo kan kandah  dalam bruk pato bac dua var dalam sa harei. Kayua kurang ndap nda, mac jamraih, kaya piah pato bac oh sumu bruk bac. Gam haong nan daok kurang gru pato, oh hu jien piah bayar jien bilan ka gru pato langiu sang bac…Tui So Pato megru tinh Lam Dong, piah ngak hu sam jalan pato bac dua var dalam sa harei, gah pato megru  khik hu 4.300 ti dong, vaktu 2026 -2030.

Di Bhum taneran kraong Cuu Long yaom baoh li-u thu ngak pandap tamo patui veik hu tagok glaong, dalam tuk baoh li-u that menyum ia trun yaom rilo. Yaom li-u thu pandap tamo di Vinh Long hu meng 150.000 – 160.000 dong 12 baoh. Dalam tuk yaom baoh li-u that menyum ia tok daok 30.000 – 40.000 dong 12 baoh, trun labaih meteh dut haong kreh thun, ngak ka urang ngak nong jaik yau oh hu jien laba. Tui dom urang ikak kaiy, yaom baoh li-u that trun khang kayua daok tame bilan paik baoh, darak pasar blei suai. Dalam tinh Vinh Long hu labaih 119 ribau ha li-u, sumu haong 22 trieu phun.

Tong thong Han Quoc Lee Jae-myung iew da-a brei ngak dom jalan khang kadang jang pacang caga dom bruk pachot pagat tapa mang Internet di dunya. Ong Lee Jae-myung iew dom jabat chuc nang pambuak tal bruk ba tabiak dom bruk ngak “biak khang” di rajaei  piah langyah ka bruk ini. Sa nyaom 64 urang Han Quoc hu pambak tame  kapol nyaom pachot pagat  di  Campuchia – hu ba mai Seoul hu tui ba di gah canh sat di harei 18/10 meng blaoh.

Jeng pambuak tal bruk chot pagat online, Kapul SpaceX hu ngak dang labaih 2.500 ndap nda thu internet Starlink di Myanmar hadei tuk mboh dom jalan talei chot pagat online dalam dunya njauk pandar. Rilo Kapul chot pagat hu pambak tame bruk pasang iek oh ka kajap di labik tapen negar Myanmar piah padang dom pasak chot pagat, taong tame dom urang dalam dunya. Jaik ini, bol lin hu taong tame dom pasak chot pagat praong abih di negar ini saong pataom khik 30 ndap nda akaok iku Internet ve tinh Starlink. (VTV)

Dom pabah mbang negar di dua taneh ia Nam Á Pakistan saong Afghanistan kareih  abih di harei 11/ 10 meng blaoh, hadei dom mbang mesruh metak. Taong abih dom bruk pablei salih  saong pajeng ba kaya nao mai di dua negar gar tavak. Yaok harei dua taneh ia  khat lahik labaih 1 trieu dola Mỹ meng bruk yaok rituh  contaner njam patam khut bruk saong yaok ribau container kaya kan karei oh tapa hu. Kayua kurang pabak ndap nda urak ini,  yaom kaya kan pandar yaok harei di dua negar ini tagok glong.