Taduan ngak tui Adat ba ngak  di Quan uy Trung uong – Mentri Quoc phong, Ban raya Ho Chi Minh bahrau peih harei alin meteh rup patau Chu tich Ho Chi Minh ka 168 xa, phuong, dac khu dalam ban. Dai ta Thái Thành Đức, Phaok chu nhiem chinh tri Quan khu 7, ndom khang ka bruk alin brei meteh rup patau Wa Ho ka dom labik karja pakat labik lac jalan hu makna chinh tri, ilamo saong siam mekre. Ini oh lac bruk thau dhar phol ngan haong Wa Ho bo daok brei mboh bruk ngak, hatai anit ranam Bol lin rahra Viet Nam ngan haong pakat uy, karja saong rahra dom bhum palei.

Pahadar 81 thun Harei Padang Bol lin bhap bini Viet Nam, melam 21 bian 12, UB bhap bini tinh Tay Ninh pambuak haong Ban Tri su Giao hoi Phat giao Viet Nam tinh Tay Ninh peih bruk pahadar  dom anh hung liet si di Kubo liet si Vĩnh Hưng - Tân Hưng saong Kubo liet si Ka mbon ceik 82. Kubo liet si Vĩnh Hưng - Tân Hưng daok jaik bhum taneh tapen negar Việt Nam – Campuchia, lac labik padeih padei di labaih 3.700 liet si var klak rup drei dalam dom mbang mesruh metak haong kol Prang, kol My saong mesuh metak  pacang khik bhum taneh tapen Meraong negar. Tapa mbang pahadar ini, dom rairah harei ini saong harei anak tal pahadar  ka sajarah hadah hadai praong prang di bangsa, meng nan pabak hatung hatian anit ranam taneh ia, kham merat ba drei tame ngak bruk daong khik taneh ia palei negar.

Jeng di bingun pahadar 81 thun Harei padang Bol lin Rahra Viet Nam, VOV Ban raya Ho Chi Minh hu peih kapul nao rivang, tadhau ayuh urang jakar, bol lin pan phao karaong Quan khu 7 saong rilo labik Bol lin pan phao karaong gah Meraong negar. Di dom labik mai rivang, Urang ngak praong di VOV Ban raya Ho Chi Minh tadhau ayuh urang jakar, bol lin dom labik tuk halei jeng khang kadang, gul pataom, salah blaih naih gheih dom bruk hu pandar; caong khin hu pambuak pagam haong gauk di VOV saong dom labik dak harei dak khang, nao tame dalam, lagaih saong siam lagaih jang veik, rilo meng lac dalam bruk khau tin, pathau khan, pambak praong thaik thaot “Bol lin Wa Ho” jaman bahrau nao tal rilo urang pang rayo saong rahra.

Kuhria tal puac thun 2025, tinh Dong Nai kham merat ngak pasiam 9 labik hadei gaok ia dauk. Urak ini, dalam tinh daok 18 labik hu peih ngak dom jalan langyah piah pasiam veik ha tang do thi. Tukvak anak tal, So Padang ngak tinh Dong Nai brei pasang iek veik taong abih bruk kuhria padang ngak saong pandar taneh piah kuhria bruk tathuak ia lagaih tui labik. Bruk pamong tal lac buh jien tame padang ngak sumu gauk, plaik njiak bruk buh jien tame ngak oh njauk, oh lagaih. Tui nan, So likau dom danak dak pacang caga ia dauk “danak dak ngak samar chip” piah mbang tui sarak daong.

Mbang ia sua praong abih meng blaoh ngak ka tinh Dak Lak njauk khat lahik trak ka urang saong drap ar (kuhria labaih 7.000 ti dong). Daok gah ngak nong, labaih 29.400 ha phun pala njauk khat lahik, labaih 941.000 athur raong, menuk ada njauk ia theik. Njauk caik hatai lac, majam kraong ribaong njauk khat lahik trak daok hu samar drah pasiam, kham merat salah blaoh dahlau harei 10.1.2026 piah samar drah trun pajaih. So Ngak nong saong alam langik Dak Lak daok jak ba taong abih kapul, ngak dalam tukvak malam, pasiam, daong rahra hu labik daok hadei hajan ia sua.

Dom ban raya dalam negar Indonesia raok thun birau oh hu dom adat peih ngak praong prang yau bhian thun, salih tame nan palih ruah dom adat mbuan mbiah, yau bruk sit min brei mboh bruk jum pataom bhap bini daok dang anak haong rilo kan kandah  kayua ia ribuk sua glut jaleih taneh di Sumatra, ba tal labaih 1.000 urang metai. Indonesia buh tabiak 60 ribau ti rupiah (3,6 tỷ USD) dalam kadung jien karja  piah daong pasiam veik khut khat hadei bala meng langik tathik.

Akaok Mentri Noi vu Thuy Si brei thau negar ini brei ngak khang jang piah pacang khik uranaih anak dom kanjah jhak meng mang xa hoi, caik peih bruk meda ba tabiak bruk pakauk uranaih oh ka jeng dam jeng dara pandar dom nen tang ini. Tui nan, dom jabat karja di Thuy Si brei maong iek rilo bruk karei gauk, dalam nan hu pasang iek asal kadha kanjah jhak, pacang cakak dom thuat toan pandar dom bruk laman lamuac hatai sahaneng di urang dam dara, gaok mai patakik atau pakauk uranaih pandar mang xa hoi.

Sa bruk roh duah birau khan brei thau jaik ini, ia kraong ia khan ralai meda tagok tal 4 ribau yaok thun di kreh abap ini meyah baoh taneh pandiak oh ngak patrun ladam la-ar. Dom urang roh duah  langyah labaih 200.000 kraong ia khan tui rilo jalan daok ralai kayua baoh taneh pandiak tagok karei di gauk piah duah kadha “tukvak tabung glong ia khan ralai abih”  nan lac thun  bo kraong ia khan ralai saong lahik ralo abih. Bruk jhak oh lac mbuan ba tal kurang ia bo daok lac ia tathik tagok glong, meda ba tal urang klak palei negar nao labik karei saong kan kandah ka bruk daong ngak pah hala.