Tui Jabat Kapul Y te dunya (WHO) di Viet Nam, kuhria tal harei 19/11 bahrau blaoh, Pasak Pasang iek saong Pacang caga Ruak hakik hu taduan 31 urang njauk medil saong brei thau njauk jru mek botulinum di anek kaman hadei tuk brei menyum ia tasau ngak tui jalan ByHeart Whole Nutrition. Mentri Y te pachreih amaik ame saong urang sangka uranaih: Meyah njauk blei ia tasau, padeih menyum aval drah. Brei caik hatai sangka saong ba uranaih nao tal labik y te jaik abih meyah uranaih mboh jru mek. Rao hacih sa-at dom kaya saong mbaok kaya bak ia tasau  meng jabon pandiak atau jamraik pathak rao pangin.

Meng ini tal puac thun, So Kong thuong TPHCM ngak khang bruk, pasang iek  kaya kan ndap nda di darak pasar. Dalam tuk pataom tame dom janih kaya palei Tet yau kaya mbang, ahar keo, alak, mbia saong dom janih karei hu rilo urang caong blei di puac thun. Bruk pasang nan piah kuhria caga  kaya Tet,  pacang cakak bruk pablei salih dauk, ndap nda kaya ja, piah khik ka urang blei pandar, meriak gauk angaok darak pasar hu lagaih.

Hajan ia sua trai di dom bhum palei gah Pur tinh Gia Lai (tinh Binh Dinh klak), khat lahik kuhria labaih 1.000 ti dong. Piah daong mikva, tinh Gia Lai hu pato tacei peih dom sarak samar chip ka labaih 5.000 baoh sang kathaot, jaik kathaot saong baoh sang biak kan kandah. Yaok baoh sang hu daong 2 trieu dong sa bilan dalam 3 bilan. Tinh jeng likau Trung uong brei 2.000 tan brah daong samar chip ka rahra bhum ia sua. Langiu di nan, dom baoh sang gaok jaleih sang, khut tayah patui veik hu daong.

Harei roya Ilamo - Yulit Palei meng kan Đông Hòa Hiệp mbang ka 6 hu peih ngak di tinh Dong Thap harei 3-7/12 anak tal. Dom bruk praong hu peih tabiak nan lac: Jalan pambuak Drap ar “Pambuak ilamo, yulit saong palei ngak”; Yaih khan kaya OCOP, kaya nong siam di bhum palei; parang iek thaot binguk baha saong sang meng kan di tinh Dong Thap; padang ngak veik dom bruk ngak meng kan…Bruk padang rija roya nan rik tame  khik ramik alam moi truong, khik ramik drap ar ilamo, jhul pakhang bruk ngak sirah rivang ma-in saong pachreih tuai damuai; gam yaih khan thaot binguk ilamo saong anek manuac Dong Thap tal tuai damuai.

Gilang khik drap ar Binh Duong peih bruk parang asal kadha “Lan su Meraong Negar tapa dom jaman”. Lan Meraong Negar lac angan ieu ka dom bhum lan patagok di gah Pur Meraong Negar meng puac abap 18 tal ini, ngan haong tukvak lan hu yaom dui atah meng abap 19 tal kreh abap 20. Bruk parang iek piah pok meyaom yaom kaom, bruk di lan su dalam raidiuk di urang Viet, dalam nan hu rahra Meraong Negar. Tapa nan, daong yaih khan drap ar ilamo, sajarah karei di bhum tameh Meraong Negar.

Thu tuong Han Quoc Kim Min Seok tacei ba karja bhum palei brei panduan ba samar saong khik brei salamad ka bhap bini hadei apui khuah glai di huyen Inje di tỉnh Gangwon gah Barak taneh ia ini. Bilan 3 meng blaoh, Rajaei Han Quoc jak ba taong abih gah tame padam apui khuah glai biak trak di taneh ia ini, ngak ka labaih 30 urang metai saong yaok pluh ribau urang panduan ba nao labik karei.

Pakistan hu pamatai 23 urang pan phao karaong dalam bruk taong tayah di labik jaik tapen negar ngan haong Afghanistan. Pakistan jeng ndom lac Afghanistan palao ka dom kapul pan phao karaong ngak bruk taong metai menuac urang dalam negar Pakistan. Gam haong nan ndom ka An Do ka bruk oh ngak catang bruk pamatai dom kapul pan phap karaong di tapen negar. Min, dua negar nan jeng kamlah ka dom panuac ndom nan.

Italia daok dang anak rilo bala pametai urang kumei, birau ini lac urang thaik thaok siam binai angan Pamela Genini metai di kreh bilan 10. Genini lac urang ka 72 di dom mbang pametai urang kumei di Italia dalam thun ini. Hadei di nan, hu veik 4 urang kumei karei njauk pametai saong 6 mbang lac bala pametai urang kumei. Thun 2024, taneh ia ini hu 116 mbang. Urang kumei thu tuong akaok meti di taneh ia lac muk Giorgia Meloni, tagok ngak hu 3 thun dahlau daok ngak ndua nong trak langyah bruk taong paoh urang kumei jeng yau oh sumu dalam bruk ngak.