Di harei nyaom biai pataom kuhria iek veik bruk ngak dalam puk palei, kapul bhap bini thun 1975 - 2025 saong taom mbaok urang pan kaok phuong ka bruk rami ramik jabat pakat xa barau ni, Akaok UB Bhap bini Ban raya HCM, ong Phan Văn Mãi thau dhar phol yaok pluh rabau urang jakar bhum palei hu rik prein daong ka Ban raya HCM cakrok patagok dalam 50 thun tapa. Ngan haong nan thau dhar phol dom urang jakar saong sanya pasang iek, kuhria caga bruk ngak tani tanat. Ong jang mayai haong dom bhum palei sangka pasang iek tal rai diuk di urang jakar, ngak labik nyaom biai bhap bini ka jaik 4.900 puk palei, palei barau saong samar pandar kong nghe so tame bruk ngak.

Kapol sinh vien Viet Nam Ban Can Tho  birai peih Ngak harei Xuan hong thun 2025 pachreih hu 410 urang tut ngan tame. Dahlau tuk brei darah, yaok urang hu iek ruak, mek darak dut iek, langyah tapa pasang iek ruak, dut iek darah, iek glang dahlau, dalam saong hadei brei darah. Thun 2024, bruk jak gauk halan hatian alin  brei darah di Ban Can Tho hu labaih mbluak jang bruk ba tabiak. Thun ini, ban Can Tho patui ngak catang veik dom bruk paglong hatai sahaneng, anit daong urang, jak ba urang kham merat halan hatian brei darah. 

Harei Tet bui sambai ka adei Xuan Ula Naih 2025 ka anek naih huyen Trà Cú lac sa huyen atah biyah, bhum mikva bangsa Khmer di tinh Tra Vinh barau hu peih ngak. Pak ni Mban peih ngak alin hadiah 80 paok pandap, kuhria tui jien yaok paok pandap gam jien mbaok lac 400.000 ndong saong 20 paok jien bac ka anek naih jaoh jo, matui ame amaik saong anek saih tieu hoc gaok kan kandah. Taphia di nan ralo bruk ngak yau: Labik ma-in hu alin pandap; gilang aia mayum, aia tasau, ahar, baoh kayau oh mek jien; gilang ao capha, pandap kaya di baoh sang oh mek jien…Tinh Tra Vinh urakni hu jaik 2.400 anek naih rai diuk biak kan kandah caong khin hu sangka maong iek klak rabha di bhap bini.

Dom harei tapa, ia mbak njom tame di tỉnh Vĩnh Long, trak abih di huyen Vũng  Liêm. Thun ini, ia mbak nom tame aval saong ia mbak glong jang dut saong tukvak ini thun dahlau. Piah pacang caga njom ia mbak, pandiak bhang tua riya di bilan pandiak, UB bhap bini tỉnh Vĩnh Long tacei pato dom gah kuhria ngak dom bruk pacang caga. Langiu di nan, dom danak dak, tỉnh Vĩnh Long biak caik hatai sangka tal bruk pathau khan tacei pato bhap bini khik piah ia taba, pandar ia patak pataom, siam gheih, oh brei palai pajua ia taba.

Dom harei tapa, langik alam di tinh Hau Giang la-an saong ia kakur ralo meng hadah page mbuan ka jit ruak ngak khat palai di hamu padai Đông Xuân saong njam patam, ralo abih lac njam patam pablei salih darak pasar tukvak Tet jaik tal. Gah ngak nong hu pachreih, piah pacang caga ruak ndao on hu tani tanat, urang ngak nong thau buh khak hu gheih haong bhian nao maong iek hamu, tuk mboh padai si ruak nan padeih buh khak saong maong tui iek jit ruak.

Dalam thun 2024, dom urang njuak rambuac kayua mbom mìn, pandap patuh daok kandaong veik di Campuchia tagok labaih 50% dut saong thun 2023, brei mboh bruk jhak suai lavik kayua mesruh metak caik veik di taneh ia ini, yaom lac bruk kham merat biak ralo di Rajaei Campuchia saong daong biak praong di dom taneh ia angaok dunya dalam labaih 30 thun tapa. Bruk praong ba tal bala metai ralo kan plaik njiak  hu kayua daok ralo taneh praong hu ka duah mboh abih mbom nin saong pandap ngak patuh. 

Thu tuong Pakistan Shehbaz Sharif khan lac, labaih 22 trieu anek naih nagar ni oh hu nao bac. Ong mboh lac kayua ralo kan kandah dalam bruk khik brei hu siam gah pato magru bac da-a ka anek naih kamei Islam. Tui urang pan akaok Pakistan, yaok trieu anek naih kamei hu mbaok ngak bruk raidiuk yaok pluh thun anak tal, oh tok daong rup eng saong baoh sang truh kathaot bo daong ka kinh te dunya. Urakni kamei mablah labaih jang mateh bhap bini Pakistan, yau nan min dom urang kamei thau akhar huroh tok hu 49%.

Anak bruk apui khuah glai praong di Los Angeles, Mỹ, dom urang ilamo saong bac si ka prein yawa alam moi truong brei thau dahlau  ka dom bruk mbuan gaok bala  kayua thak saong dhun mun kayua apui mbang glai. Tui dom urang ilamo, dhun mun bau klik di labik ini tagok tal tanut pacang caga glong, meng 40 tal 100 microgam sa met khoi, glong jang ralo kuhria haong yawa langik bhian harei. Dom dhun mun kayua apui khuah glai gam haong bau saong mbo hong, ba tal dom bala trak ngan haong dom urang ruak baoh hatai, phoi, jhak tal prein yawa urang taha saong uranaih./.