Gam haong taneh ia, mikva dom bangsa tinh Dak Lak chreih chrai raok Tet Doc lap -Bebat dalam bui sambai. Meng hadah page, di dalam hoi truong phuong Thành Nhất mikva mai hu mbaok bak piah taduan pandap alin. Thei thei jeng bui sambai ndom meyai, brei mboh hatai je tame bruk pan akaok di ndang, Karja saong mboh hadah mbaok meta anak bruk salih bahrau di taneh ia hadei 80 thun bebat. Bruk bui sambai pambak praong grauk mbon palei. Di mbon palei rah rivang bhap bini Ako Dhông, mikva hu srap gap dom kadha adaoh bhap bini, kong caing, rak alak saong dom kaya mbang bhap bini piah raok tuai, yaih khan ilamo di bhum palei.

Di Ga Metro Bến Thành saong Vincom Mega Mall Thảo Điền, So Kong thuong Ban raya HCM birau peih ngak danak dak “ Khuyen mai ndap nda siam hu angan je - City Sale 2025”. Ini lac bruk pachrei urang blei ndap nda siam hu pablei ralo abih kuhria meng lavik mai ngan haong labaih 500 ndap nda, yaom lap tal 80% saong mbang akaok meti hu peih tabiak di labik ala taneh. Ban raya HCM caong khin, tapa bruk ini, bhap bini saong tuai damuai  hu rivang iek blei ndap nda birau, rik tame bruk ngak mbang pablei salih, jitvu, yulit, rik tame ngak brei patagok  kinh te dalam thun 8,5%.

Ong Phạm Văn Nam, Yam ndok So Pato Megru tinh Gia Lai brei thau, hadei tuk pagam, dalam tinh Gia Lai urak ini hu jaik 1.400 labik pato megru hu labaih 33.000 gru pato. Min, yam tame thun bac ini, gah pato megru jeng daok kurang tagok labaih 3.500 gru pato saong urang ngak. Tinh Gia Lai hu roh duah di 7 xa tapen gah Pei negar saong ba tabiak jalan padang sang bac pho thong gam daok gam bac pambuak pakat hu taong abih phun jien buh tame labaih 1.200 ty dong. Dom danak dak hu caga samu gauk meng bilik bac, labik daok, sang mbang huak, mblang me-in tal y te dalam sang bac, duh ka labaih 9.400 anek saih, dalam nan hu meteh lac anek saih bangsa takik.

Harei kabroi, di xa My Tu, ban Can Tho peih ngak Yai vah ghe gilai ngak meng Composite hu mbaok di jaik 70 kapol mai meng dom xa hu rilo urang bangsa Khmer diukrai. Bruk ni pachreih yaok ribau urang saong bhap bini hu mbaok tame pakacah ngak chreih chrai, bui sambai brei mboh ilamo siam ghieh di Nam Bo. Dom sruh gilai sit, yaok kapol hu 8 urang vah pakacah gauk biak catang, ngak pacheih hatai urang.

Jaik abih dom labik rah rivang di dalam labik tinh Dong Thap dalam 3 harei tapa jeng tagok meng 2 – 3 mbang dut haong dom harei bhian. Rilo tuai damuai abih lac labik bhap bini di pulao Thới Sơn, labik ula Đồng Tâm, palei meng kal klak Đông Hòa Hiệp, tasik Tân Thành, darak bhum palei Tân Thuận Đông, Palei bangu Sa Đéc. Abih di nyu nan lac, di bingun 2/9 ini, kayua tatua Rạch Miễu 1 oh daok gar jalan yau dahlau  hsaong tatua Rạch Miễu 2 hu brei peih nduac radaih, hu jalan vaih tame pulao Thới Sơn nan tuai damuai mai rah rivang, padeih padei di ini tagok biak rilo.

Rilo harak mbao  di bhum Trung Dong harei kabroi 2/9 ba khaw tin meyaom Le dieu binh, dieu hanh pahadar 80 thun Kat mang bilan Dalipan saong harei bangsa negar 2/9, jeng yau bruk cakrok patagok di Viet Nam. Dom harak mbao hu ba khaw tin yaok ribau bhap bini, chreih chrai pataom gauk di  ban ine Ha Noi piah hu mbaok tame maong iek duyet binh, dieu hanh di 40.000 bollin saong bhap bini, gam dom phao kraong praong birau  dalam nan hu kapal ahaok, radaih xe tăng, ten lua, gilai angaok ia saong ala ia…

Negar Anh bahrau rah tapa bilan pandiak bhang abih meng tuk bahrau kuhria di thun 1884, saong bruk langik pandiak khang ini hu kuhria rah tabiak veik dalam harei hadei kayua kanjah jhak di bruk langik salih karei. Dalam bilan pandiak thun 2025, Anh rah tabiak pak mbang pandiak bhang, glaong abih lac 35,8°C. Oh lac negar Anh, rilo negar karei dalam dunya jeng daok gaok kan kandah kayua dom mbang pandiak bhang dalam bruk baoh Taneh pandiak tagok.

Sa mbang megei baoh taneh khang 6 ndo richte  rah tabiak di bhum gah Pur negar Afghanistan, ba tal takik abih 500 urang metai, khang jang 1.000 urang lin njauk rambuac. Urang njauk rambuac daok rilo veik tuk karja Afghanistan duah daong dom urang daok lahik dalam mbuk patau kayau kateik angaok. Karja Taliban kakei lac urang njauk rambuac birau yaok tuk camereip min, kayua  rilo baoh sang urang daok gan tavak ala mbuk patau kayau sang jaleih kateik angaok./.