Page ini, Nyaom roya pakat negar mbang XIV di Dang CSVN hu peih ngak dalma praong prang  di Ban ine Ha Noi. Lambaok BCH Trung uong Dang mbang XIII, Tong Bi thu To Lam pathau khan  ka dom Harak di Nyaom roya 14 di Dang CSVN, dalam nan, Tong Bi thu To Lam kakei lac: Nyaom roya mbang XIV lac Nyaom roya di hatai jia saong hatai caong takre, khin brok tagok samar saong bruk ngak, ngak njauk hukum saong hadah krah, jum pataom saong cak rok patagok. Tui dom urang hu mbaok di nyaom roya, Nyaom roya XIV hu peih ngak tuk taneh ia dang anak bruk yam tame jaman birau - jaman uak drei patagok di bangsa. Ini oh lac tukvak ba tabiak dom bruk praong bo daok lac tuk pamedeih hatai jia, caong takre  saong bruk ngak di taong abih Dang, abih bhap bini pamong tal harei hadei patagok khang kajap.

Meng Ban raya HCM, rilo urang jakar, urang ndang, bhap bini khan brei thau hatai jia, caong takre tame dom sarak ngak brei brok tagok samar di jaman birau. Sa-ai Nguyễn Quốc Phong, daok di xã Bình Chánh, TPHCM caong khin Nyaom roya  mbang ini  ba tabiak rilo sarak njauk hatai, brok tagok samar lagaih haong radiuk; dak padang Dang hacih sa-at, khang kajap, gam haong nan patagok prein khang jum pataom taong abih bangsa, pabak prein khang  piah taneh ia cakrok patagok samar saong dak harei dak khang kajap jang.

Anak bruk suai jao taneh ba tal suai Padang ngak Danak dak jalan peih drah samar TPHCM - Long Thành, Thu tuong Phạm Minh Chính jao ka Akok UBND TPHCM saong Akok UBND tinh Dong Nai peih taneh samar drah; caong khin ngak salah dahlau Tet Nguyen dan nethak Athaik Waw - Binh Ngo 2026, gam tani tanat labik daok ka bhap bini sahanang hatai.

Gia Lai birau ngak salah blaoh saong ba tame pandar 22 jalan xã Ia Hiao tuk Nyaom roya pakat negar mbang XIV di Dang. Dom jalan hu ngak meng bruk njauk hatai, daong prein di karja saong bhap bini meng nan rahra bau angan dom jalan nan “ Jalan sahaneng di Dang hatai di bhap bini”.  Jaik 200 baoh sang bhap bini daok di 7 palei, mbon halan hatain  kaoh taneh brei jaik 40.000 met vuong taneh saong kaya kien truc, kuhria abih tih labaih 4,1 ti dong. Dom jalan nan ba mbuan lagaih ka bruk ngak mbang, ramik veik labik daok bhap bini saong pambuak dom labik dalam xã  hu sumu gauk jang.

Di Dong Thap, dom harei ini, urang ngak nong daok yam tame bilan tabung glong yuak padai Dong Xuan dalam bui sambai dua mbang: Padai yuak hu rilo, kein laba ralo kayua thau ba tame dom ilamo birau ngak tabiak padai asar siam, takik tathuak nerak. Meng langik lagaih saong pacang khik hu jit ruak siam, padai yuak hu thun ini meng 6 tal 6,6 tấn sa hecta. Urak ini, gah ngak nong hu caik hatai ba tame pandar dom mac jamraih thong minh, jhul pakhang bruk padar mac moc tame ngak, peih ngak dom iek dahlau dom bruk patrun takik tathuak nerak sang camin, gam khik brei hu rilo padai brah, gam paglong asar brah.

Indonesia peih dom sang bac y oh mek jien piah langyah dom bruk kurang bac si saong urang y te dalam negar. Tui nan, hu dom sang bac oh mek jien piah pato pakai tabiak rilo urang y te. Tong thong Indonesia brei thau hatai caong takre sarak ini ba mai kein laba glong ka taong abih, dalam nan hu uranaih meng dom baoh sang hu raidiuk kan kandah, piah bac tagok dai hoc, gam kakei lac bruk pato megru lac jalan piah patruh iek patrun kathaot hu siam lagaih abih.

Sa bala rah tabiak gam gam pambak tal labaih 100 radaih, dalam nan hu yaok pluh  radaih pajeng trak rah tabiak harei kabroi di bang Michigan, Mỹ. Langik jhak gam hangin khang saong tuyet laik kapal  pacang meta mong oh mboh la-ar trun 0 do C, ngak kan kandah ka bruk nao mai di dom radaih. Bruk bala ba tal rilo urang njauk rambuac, min oh hu thei metai.

Kuhria tal tukvak urak ini, takik abih 39 urang metai, 122 urang njauk rambuac hadei bala rah tabiak di jalan pasei biak trak di melam 18/1 di Tay Ban Nha. Ini lac bala rah tabiak di jalan pasei trak abih di taneh ia chau Au ini kuhria meng thun 2013. Karja bhum palei pataom tame padang pasak taduan raok tuai damuai,  bhap bini bhum palei ba phui men, kaya mbang saong ia panjiak menyum daong ka dom urang di melam tuk langik la-ar trun ala 6 do C./.