Page ini 19/1, di Pasak Nyaom biai pakat negar (Ha Noi),  Dai hoi taong abih pakat negar mbang XIV di Dang CSVN tame ginum biai tru bi. Nyaom roya yar tangin njauk hatai abih gauk brei tapa Danak dak var ginum biai trù bị, Harak ngak bruk di Nyaom biai, Danak dak ngak bruk di Nyaom roya saong Quy che palih ruah di Nyaom roya  pakat negar mbang XIV di Dang. Nyaom roya palih ruah Kapol Chu tich hu 16 urang Ủy viên Mentri Chinh tri. Nyaom roya palih Kapol Thu ky hu 5 urang jakar saong Mban Tham tra pasang iek urang dang hu mbaok di nyaom biai hu 13 urang. Nyaom roya yer tangin njauk hatai abih gauk brei tapa Harak pathau khan ka urang lambaok vakil Nyaom roya XIV di Dang kayua Mban Tham tra urang tame nyaom biai. Tui nan, taong abih 1.586 urang hu mbaok tame Nyaom biai hu ginup siam piah hu mbaok tame Nyaom roya.

Jalan peih drah samar Danak dak jalan mbak Hậu Giang - Cà Mau atah labaih 73 km peih radaih. Bruk nan brei mboh bruk praong dalam sajarah dakrai tuk taong abih jalan mbak peih drah samar Cần Thơ - Cà Mau pambuak jalan, ba mbuan lagaih ka bruk pablei salih pajeng ba ndap nda jeng yau nao mai di bhap bini. Ngan haong bhap bini di gah Pei negar, bruk peih jalan brei pajeng ba oh lac brei mboh  bruk caong mong meng lavik mai hu sa jalan praong bo daok rik tame bruk ngak veik 3.000 km jalan peih drah samar dalam negar di Rajaei.

Tinh Dong Thap daok pataom tame jhul pasamar peih ngak dom danak dak praong meng akaok thun birau. Thun ini, kuhria abih tih phun jien buh tame ngak di karja tinh Dong Thap hu labaih 11.375 ti dong. Meng phun jien nan, tinh pataom tame peih ngak dom danak dak praong hu makna kinh te- xa hoi praong. Urak ini, yaom lac gaok rilo kan kandah ka mbaok taneh, kaya padang ngak min po danak dak duah jalan ramik pasiam dom kan kandah ngak salah bruk dalam thun ini.

Meng harei ini 31/1/2026, Mban Jak ba daong Trung uong brei padeih bruk taduan jien daong bhap bini khat lahik kayua ribuk, hajan. Meng tuk jak ba mikva rik daong tal ini, taong abih pakat Mat tran taduan hu labaih 3.900 ti dong. Mban jak ba daong Trung uong hu parabha 10 mbang kuhria abih tih jien labaih 833 ti dong, daok veik brei parabha  tuk Tet Nguyen dan anak tal.

Balai Bien phong Thạnh An (huyện Cần Giờ dahlau), Bol lin Biên phòng TP.HCM birau peih ngak danak dak “Xuan Bien phong anit ranam puk palei” xuan nethak Thaik Waw - Binh Ngo thun 2026. Danak dak peih ngak rilo bruk hu makna praong, dalam nan hu: papaok 50 mbaik ahar tapei nung alin ka dom baoh sang kan kandah; peih ngak labik kaya mbang saong mblang ma-in ka uranaih. Tuk ini, dom don vi, urang ngak pahala  alin brei 100 paok pandap ka dom baoh sang dalam sarak karja, baoh sang kan kandah; 20 paok pandap Tet ka urang jakar, urang lin Don Bien phong Thanh An, 300 paok pandap kaya piah bac da-a ka uranaih.

Sa mbang la-ar biak la-ar, hangin khang, tuyet laik kapal saong hajan jeng ia khan di bhum kreh negar saong gah Barah Trung Quoc. Meng ini tal harei 21 bilan 1, langik la-ar trun meng 6 -14 do C, hu labik trun tal 16do C. Dom bhum  palei  hu tuyet laik kapal meng 10 -18 mm.  Jabat chuc nang iew dom gah, dom bhum palei  kuhria caga saong brei dom kapol daong samar chip, piah pacang caga dom khat lahik tal manuac urang saong drap ar.

Meng bilan 5, Pháp peih ngak var huak 1 Euro di taong abih dom labik mbang huak ka saih bac sinh vien. Ini lac sa dalam dom bruk kuhria dahlau  di paok jien daong ka thun 2026, piah daong ka dam dara saong sinh vien dalam tuk bruk ngak mbang kinh te gaok rilo kan kandah. Jien kuhria ka bruk nan kuhria labaih 90 trieu Euro yaok thun. Dahlau di nan, sarak var huak 1 Euro di Pháp hu peih ngak di rilo labik dalam tukvak COVID -19.

Tui dom rajakar ngak praong di Campuchia birau chap mek 75 bhap bini negar langiu kayua pambuak tal dom bruk pachot pagat online saong tame daok suan hukum. Urang ngak praong di Campuchia kakei lac, bruk pagui chap mek kol pagat online  daok hu peih ngak di rilo abik dalam negar. Dom urang brei langyah catang, oh lac thei, piah khik ka manuac sia raidiuk  jeng yau khik hu angan je di Campuchia haong dunya./.