Ngan haong kadha: “ Jum pataom - Adat ngal po - Ngaik njauk - Salih birau - Patagok”, Nyaom roya pakat negar mbang XIV di Dang peih ngak di Ban Ine Ha Noi meng harei 19 tal harei 25/1/2026. Dalam harei ini, Nyaom roya tame ginum biai kuhria caga dahlau daok lac trù bị. Ngan haong kadha “Ala hala dok hadah tanjak meriak bhong di Đảng, rik prein tame ngak brei jayak dom bruk praong di taneh ia  tal thun 2030; ngak po di bruk ngak, khang kajap, jia tame prein di drei, yam tagok dalam jaman uan drei patagok di bangsa anit ranam salamat, bebat, adat ngak po di bhap bini, kaya meda, ilamo, haniem phol , yam tagok chu nghia xa hoi khang kajap”,  Nyaom roya XIV di Dang brei ginum biai saong khan tapa dom harak van kien hu makna praong nan lac: Harak pathau khan Chinh tri di BCH Trung uong mbang XIII; Harak pataom iek veik dom asar kadha saong bruk  ngak brei salih birau tui jalan XHCN dalam 40 thun tapa di Viet Nam; Harak pataom iek veik 15 thun peih ngak Asar kadha di Dang ( 2011 -2025) ba tabiak, tacei pato pabak, pasiam veik Asar kadha di Dang; Harak khan ka bruk pasang iek veik urang jakar ngak praong, tacei ba di BCH Trung uong Dang Mbang XIII. 

Dalam dom harei ini dalam negar chreih chrei peih ngak rilo bruk hu makna siam mekre, brei mboh hatung hatai jia tame bruk tacei ba jalan di Dang. Grauk jalan di Ban raya HCM yau ngui cuh tagok rup khan ao birau, hala dok, bingu hala, pano, panuac salam uan Nyaom roya pakat negar mbang XIV di Dang. Di pasak Ban raya HCM, dom jalan hu ngak rilo labik dak bingu dui atah. Di rilo canah jalan praong, dom man hinh LED, pano hu ba tagok thaok binguk pachreih jak ba, panuac huroh  uan raok Nyaom roya Dang. Dalam tuk chreih chrai uan raok dalam negar, brei mboh hatai jia saong caong khin di bhap bini tame dom bruk tacei pato ka rilo bruk praong di anak tal.

Dom harei ini, nao tal dom mbon palei bhum Tay Nguyen, mbok labik halei jeng tual hala dok bingu hala hadah hadai. Ngan haong bhap bini dom bangsa di labik ini, Nyaom roya XIV di Đảng oh la bruk ngak chinh tri praong dalam, bo daok lac harei roya praong di hatai jia saong caong khin hu rilo siam mekre. Bruk chreih chra bui sambai nan daok brei mboh tapa bruk ngak biak tari tarieng. Prein khang  di bruk jum pataom taong abih bangsa  di bhum Tay Nguyen daok pagam khang kadang jang tuk halei karei.

Piah daong ka urang kathaot, urang raidiuk kan kandah uan raok Tet thun birau nethak Athaik Waw - Binh Ngọ 2026, UBMT Negar dom pakat  dalam tinh Dong Thap hu jak ba , daong ka labaih 10.000 paok pandap Tet alin ka baoh sang kathaot kuhria tagok tal labaih 4 ti dong. UBND tinh Dong Thap hu jalan tacei ba brei pakat the BHYT ka bhap bini 16 xa An toan khu dahlau Tet thun birau 2026.

Piah pacang caga glut jaleih taneh, khik caga siam ka anek manuac, drap ar di bhap bini, UBND tinh Vĩnh Long ba tabiak bruk buh jien tame ngak danak dak Ngak kajap ar kraong Hàm Luông di ban Bến Tre( klak) ngan haong jien buh tame ngak abih tih 500 ti dong. Danak dak hu peih ngak meng thun 2026 saong ngak salah di thun 2029. Danak dak lac pacang caga glut jaleih ar kraong piah khik ka dom danak dak ha tang do thi, co so ha tang kinh te, labik daok di bhap bini saong taneh tapen kraong.

Mỹ khan lac brei kuhria jien je 10% ngan haong taong abih kaya ndap nda bei mai meng Đan Mạch, Na Uy, Thụy Điển, Pháp, Đức, Anh, Hà Lan saong Phần Lan pambak tal bruk rah tabiak di Greenland. Bruk nan ba tabiak ngak sraw kadau bruk pablei salih di Mỹ saong Lien minh chau Au (EU) mbaok harak meng thun dahlau, ini jeng lac bruk caong khin brei cakak trun jien je ka rilo kaya ndap nda pablei  tame negar My. 

Hong Kong (Trung Quốc) ngak salah blaoh bruk duah thau urang gaok bala kayua apui mbang sang chung cu di quan Tai Po di puac bilan 11 thun 2025. Dom urang metai  tagok tal 168 urang. Cảnh sát chap mek 16 urang pambak tame bruk ngak bala gam haong 6 urang bleik saleik; 14 urang karei njauk chap mek kayua hu pambak tame mbang jien di dom danak dak ngak pasiam sang chung cu ini.

Dom mbang apui khuah glai praong di dom labik bhum kreh negar saong bhum meraong Chile ngak metai 15 urang. Tong thong Chile khan lac bala apui khuah, dalam tuk apui mbang glai mbang khang njauk panduan ba takik ye lac 20.000 urang nao labik karei. Urang ngak praong di Chile khan lac hu jaik 8.500 hecta glai apui mbang abih, takik di nyu lac 250 baoh sang apui khuah./.