Dalam harei ngak bruk akaok meti di Mbang nyaom biai ka Sa, Quoc hoi mbang ka 16, page ini, Quoc hoi hu peih bruk palih ruah Chu tich Quoc hoi negar Cong hoa xa hoi chu nghia Viet Nam mbang ka XVI, tukvak 2026-2031. Chu tich Quoc hoi Mbang ka 15 Trần Thanh Mẫn hu Quoc hoi patui veik khik bruk ngak Chu tich Quoc hoi mbang ka 16. Ndom meyai hadei tuk dang bruk, Chu tich Quoc hoi Trần Thanh Mẫn likau thau dhar phol dom urang buh harak phieu Ban raya Ho Chi Minh hu je tame palih ruah tame Quoc hoi mbang ka 16; ndom lac, ini lac bruk hadah mbaok meta praong glaong, gam haong nan lac taduan bruk praong glaong anak Ndang, Karja, urang buh phieu saong Rahra dalam negar.

Sở Padang ngak TPHCM pok tagok UBND Ban raya padang ngak sarak daong urang peih radaih buyt pajeng bhap bini, tui kuhria oh mek jien radaih buyt dalam 8 bilan daok veik dalam thun lac labaih 930 ti dong.  Sarak pamong tal bruk daong urang pandar radaih buyt, salih ka bruk pandar ngak tui di kapol urang yau dahlau diah. Tapa nan, Ban raya  HCM caong khin ngak brei salih birau bruk bhian randap nao mai, takik peih radaih di drei.  

Tinh Dong Thap hu taneh pala phun mbang baoh praong abih bhum taneran kraong Cuu Long hu labaih 134.000ha. Di tukvak urak ini, tinh Dong Thap daok dala tukvak tabung glaong pandiak bhang pagam haong pandiak catang, ngak kanjah jhak tal bruk cakrok, baoh paik hu saong asar siam baoh kayau. Kayua nan So Ngak nong saong Alam langik tinh pambuak haong dom so, dom gah, bhum palei bhian peih bruk dut iek, tui iek bruk njom ia mbak di angaok dom kraong; pathau khan dil samu saka pandar danak dak kraong ribaong piah bhum palei saong rahra srap gap ngak mbang.

Kapol urang ilamo dunya mai meng Viện Viễn Đông Bác Cổ saong Sang bac Dai hoc Khoa hoc Huế peih bruk pasang iek di Gilang khik piah Pleiku, tỉnh Gia Lai piah duah thau, thaik binguk saong duah pataom taom tu lieu kaya ilamo Cam daok khik di labik ini. Dahlau di nan, kapol urang jakar pasang iek bia Cam meng kan Tư Lương di phuong An Binh. Ini lac sa dalam dom bia hu makna biak praong, hu sarak akhar huroh Phạn – Akhar thrah Cam, hu meng abap XV. Hu jaik 600 thun, bia Tư Lương hu iek yau drap ar  hu vak akhar meng kan dahlau lavik abih daok veik di bhum taneh Tay Nguyen.

Srap gap Tet bhap bini Chôl Chnăm Thmây, kapul Guk pataom po acar anit ranam negar ban raya Can Tho hu pandar dom sang baha Phat yao Theravada Khmer di bhum saong bhap bini tui agama Phat oh hu mbaok tame bruk me tin di doan oh lagaih; abih di nyu nan lac, oh peih ngak saong oh ba drei tame dom kadha me-in yau ye: luk tapung, prai tapung, thac ia. Pachreih dom labik duh paling peih labik me-in pambuak bhap bini siam mekre tapa bruk peih danak dak adaoh tamia bhap bini saong dom kadha me-in bhap bini tui hatai bui sambai, chreih chrai saong oh palai jien padai.

Trung Quoc meda brei ngak harak nao mai di labik tapen negar meng ndien tu meng harei 15/4, salih ka harak ba-ar piah takik ngak haral gal ka bhap bini. Dalam bhap bini Trung Quoc dai luc umo meng 16 thun tagok meda tut angan likau harak ndien tu piah nao mai tapa mang jitvu karja di jabat khik iek bhap bini. Tui bruk ba tabiak, harak gar ndien tu  brei pandar gam haong harak ka rup eng yau chung minh nhan dan.

Bol lin Katmang Islam Iran ndom lac oh peih eo tasik Hormuz tui panuac pandar di My. Dahlau nan tong thong My Mỹ Donald Trump hu ba tabiak harak payua ka Iran pandar brei peih gilac eo tasik Hormuz, meyah oh ngak ye ba Iran gilac mai jaman pandar kaya patau. Iran mbaoh tangin kareik bambang eo tasik Hormuz, jalan pajeng ba menyek hu makna di dunya, piah taong bayar ka bruk tập kích di My saong Israel tame negar ini meng harei 28/2.

Ia ribuk sua pambak praong, glut jaleih taneh, jakala klak kayua hajan praong saong ribuk di Afghanistan dalam 10 harei tapa ba tal 77 urang metai saong 137 urang njauk rambuac. Langiu di nan urang metai, jaik 800 baoh sang khut tayak abih. Rilo doanh nghiep, taneh pala drak, bingun ia saong ia pruh jeng khat lahik, kuhria abih tih labaih 5.800 baoh sang./.