Tui Kapul Njam patam baoh kayau Viet Nam, pablei tabiak durian laik yaom hu tagok khang dalam dom bilan puac thun hu daong gah njam patam baoh kayau patagok samar gilac. Kuhria rah tapa dalam bilan 10 pablei tabiak hu 919 trieu do la My, tagok tal 77% dut haong tukvak ini thun dahlau. Ngan haong bruk cakrok patagok yau urak ini, kuhria pablei tabiak njam patam baoh kayau dalam thun ini brei truh tapa yaom jien 8 ty do la My, patui veik ngak jeng bruk glaong abih  bahrau di gah njam patam baoh kayau.

Hadei rilo thun padeih ngak, tatua Phước Khánh lac bruk puac abih di jalan peih drah samar Bến Lức - Long Thành, daok peih ngak drah samar piah sumu peih brei radaih nduac tapa  di bilan 7 thun 2026.  Tatua  Phước Khánh atah labaih 3km, praong jaik 22met, padang talei tuan tagok glong 55m, brei kapal gilai pajeng pandap trak 30.000 tan nao tapa kraong Lòng Tàu. Tuk ngak salah blaoh, tatua Phước Khánh pambuak jalan peih drah samar 58km, peih tabiak jalan roya praong pambuak bhum palei gah Pei negar - TP.HCM - Đồng Nai, rik tame ngak trun gal jalan Roya 51 saong jhul pakhang bruk patagok kinh te gah Meraong negar.

Dalam 10 bilan tapa kapul chuc nang hu taong bhat 3.410 bruk pandar radaih moto, radaih patuh nduac angaok jalan ka urang nao tabak takai. Tui Thuong ta Nguyễn Ngọc Nam, Phaok Akaok jabat Xanh sat jalan mbak Ban raya Ho Chi Minh (PC08), bruk peih nduac radaih moto, radaih patuh nduac tagok jalan brei urang nao tabak takai ngak kan kandah tal jalan mbak saong ngak srau kadau ka menuac urang. Meng akaok thun, PC08 hu brei thau ini lac sa dalam dom bruk hu makna brei patagok pasang iek, langyah. Urak ini ilamo di rahra hu paglaong tagok mbaoh cambaih laih, bruk ini jaik yau oh daok rah tabiak dalam tuk tabung glaong.

Di tinh Lâm Đồng, mbiah tal ini daok 1.143 gilai ikan harak abih tukvak pandar, pataom tame ralo di dom bhum palei hu bruk ngak mbang di tathik yau Phan Rí Cửa, Phước Hội saong La Gi. Chi cuc Thuy san saong tathik tinh Lam Dong khan lac pambuak kajap haong karja dom bhum  palei, jhul pakhang bruk ngak brei hu harak gal, tut angan saong langyah bruk ngak suan hukum, kham merat oh brei rah tabiak  bruk gilai ikan ngak suan hukum IUU, rik tame daong ka taneh ia talaih “ the pakat kanik” di UB chau Au.

Malam kabroi 23-10, ia ndik tagok glaong pagam haong hajan praong ngak glut jaleih ar pacang di tapen kaoh pulao Thanh Long daok di puk Phước Lý Nhì, xa Quới Thiện, tinh Vĩnh Long. Jalan glut jaleih hu praong 10m, ia meng kraong Cổ Chiên nduac khang tame dalam ngak ia dauk labaih 10 ha bein phun mbang baoh di sang bein palei pala. Bruk calah ar ini daok hu samar chip pasiam piah patakik khat lahik ngan haong bruk ngak nong ngan haong rahra.

Hadei tuk jabat chuc nang Myanmar taong tame sa pasak pachot pagat di ban sit Myawaddy, jaik 700 urang klak nduc tabiak truh pasak ini saong tapa Thai Lan. Gah bol lin saong cảnh sát tame negar Thai Lan daok pambuak piah pabak bruk daong lagaih haong dom quy trinh, harak ngak pahala. Dalam sa bruk rah tabiak pambak tal bruk ini, Đại sứ quán Indonesia di Myanmar birau ini khan lac, labaih 20 bhap bini Indonesia di Myanmar tapa kraong Moei piah tame Thái Lan dalam melam harei 22/10.

Meng harei 10/12 anak tal, labaih 1,5 trieu tai khoan mang xa hoi di urang pandar ala umo 16 thun di Australia meda njauk padeih dang atau tayah klak. Ini lac bruk ngak hu meng “Hukum Salah Salamat Online – Thun umo biar abih hu pandar mang xa hoi” bo rajaei Australia ba tabiak piah pacang khik uranaih plaih dom kanjah jhak dalam labik lek taka so. Dom kongti ilamo kong nghe meda njauk taong bhat tagok tal 50 trieu AUD (sumu haong 32,6 trieuUSSD) meyah oh ngak tui, dalam tuk nan amaik ame saong uranaih oh njauk taong bhat.

Đức brei am cuh klak labaih 15.000 drei manuk ada di sa bein var raong, hadei duah thau hu virus kum manuk ada ruak catang H5N1. Bein var ro raong manuk ada tui dua jalan raong kareik dalam var saong palao gah langiu mbang hamu. Hadei tuk dauh thau blaoh, dom urang jakar di bhum palei padang labik pacang atah 3km saong labik tui iek 10km vin taom dar labik hu jit ruak. Jabat chuc nang kakei dahlau virus mbuan njom mbak praong tal taphon cim glai saong manuk ada raong, njauk ndem tal dom janih yau ada ia, langen saong sếu.