Dom asal kadha di mbang nyaom brei panuac lac: Dự thảo Sarak di Quốc hội ka bruk ngak iek dom jalan ngak, sarak taoh talaih dom kan kandah, tavak tavaiy dalam bruk buh jien tame padang ngak dom danak dak jalan mbak nao mai; dom sarak bahrau dalam gah khik ramik bruk tame tabiak, quá cảnh, labik daok ka urang negar langiu di Việt Nam; danak dak Hukum Căn cước công dân (pasiam veik); Danak dak huklum dom kapul brei pasraiy jien (pasiam veik); ieu kakei padang ngak Hukum pasiam veik, pabak dom paka di Hukum tame, tabiak negar langiu di rahra Việt Nam saong Hukum tame, tabiak, quá cảnh, labik daok di urang negar langiu di Việt Nam.

Mesup ini (27/3), kapul pasang iek di QH hu ngak bruk haong urang pan akaok Thành ủy, HĐND saong UBND TP.HCM ka salih harau danak dak pato pakai phổ thông. Tapa nan, urang pan akaok ban raya hu pok panuac tagok Quốc hội, Rajaei brei samar padang sarak ka gru pato 2 jala sa harei. Dalam nan, dom sang bac hu brei adat pambuak bruk haong dom labik ngak bruk oh pilih ruah hu. Langiu di nan, kadung jien karja meda pabak piah bayar jien bilan ka urang ini tuk peih ngak bruk oh mek jien bac jala ka 2 ngan haong anek saih bac danak dak pato pakai phổ thông bahrau.

Sở Ngak nong saong patagok palei pala tỉnh Bà Rịa – Vũng Tàu brei thau lac, Sở daok pambuak haong jabat chức năng daok pasang iek bruk  gilai taong ilan nao tapa  bilai taong cap ikan oh tui adat ka bhum tasik brei taong cap. Kapul ini bahrau mboh hu 4 sruh gilai taong ikan tapa dom bilai taong ikan suan adat hukum. Dahlau di nan, di harei 26/3, kapul pasang iek bruk taong cap ikan di tỉnh Bà Rịa-Vũng Tàu dalam tuk nao pasang iek di bhum phao ka 0 tasik Vũng Tàu, gilai pasang iek bruk taong ikan KN 999 BV hu mboh 4 sruh gilai daok taong cap meng lưới katung daok taong cap suan bhum tasik brei adat. 

 Meng pataom tame lang talaih dom kan kandah ka sarak, jalan ngak, kham merat dalam bruk peih taneh nan ye dom bilan akaok thun ini, bruk peih ngak dom danak dak, dom bruk ngak di tỉnh Tiền Giang hu mbuan lagaih. Tiền Giang dang akaok dalam taneh ia ka peih jien đầu tư công.  Thun ini, tỉnh Tiền Giang brei peih labaih 5.314 tỷ đồng meng phun jien đầu tư công; dalam nan Thủ tướng Rajaei jao labaih 4.954 tỷ đồng. Tal abih bilan 3 ini, tỉnh peih brei hu 1.653 tỷ đồng, samu 31% duk haong bruk phun jien hu jao brei.

 Meng akaok thun tal ini, dalam tỉnh Bình Thuận oh hu bruk khuah glai. Dom gah po gilai bhian nao pasang iek dom labik mbuan khuah glai glaong, tui iek saong samar drah pathau khan, kuhria caga dahlau ka bruk khuah glai. Bình Thuận hu pasang iek, taong yaom ba tame pandar dom danak dak pacang caga khuah glai, padam khuah di bilan thu thun 2023. Taphia di nan, bruk pandar công nghệ thaot binguk vệ tinh tame bruk khik ramik, pasang iek kaya glai hu duah mboh saong payua panuac kakei tal 39 labik medil lac ngak jhak tal kaya glai.

Bruk srau kadau chính trị meng thun bloh di Thái Lan daok hu langyah meng bruk tổng tuyển cử harei 14-5 tal. UB bầu cử taneh ia ini khan lac abih tih hu 32.805 cử tri hu tut angan nao bầu aval. Mboh lac, bruk bầu cử thun ini daok hu peih tabiak dalam tuk daok catang tagok bruk chính trị di dom tướng bol lin daok pan quyền. Thủ tướng Prayut lac menuac dang akaok dom bruk đảo chính pajaleih 2 Thủ tướng but pajaih Shinawatra – lac ong Thaksin saong urang adei kumei lac  Yingluck.

Dom urang jakar ngak praong di Mintri ngak nong saong patagok palei pala Philipin brei thau, rajaei daok caga ka bruk jhak abih ngan haong gah pabak brah di taneh ia kayua njauk kan kandah di langik tasik El Nino. Philipin lac darak pasa blei brah praong abih di Việt Nam thun 2022. Thun dahlau, Philipin hu blei tame takik di nyu 3,8 triệu tấn brah. Philipin caong hu brah khik piah takik di abih lac 52 harei. Mayah jabat pandap mbang negar oh ngak hu bruk nan, Philipin njauk blei njauk brah tame rilo jang.

Kuhria meng harei 1/4 tal, umo padeih hưu di dom urang jakar ngak bruk karja di trung ương saong tỉnh ban puk palei di Nhật Bản hu patagok, meng 60 thun yau urak ini tagok 61 thun. Hadei di nan, dalam yaok 2 thun 1 mbang, umo padeih hưu di urang jakar ngak bruk karja hu tagok jang 1 thun mbiah tal umo 65 thun di thun 2031. Bruk tagok umo padeih hưu di urang jakar ngak bruk karja lac 1 binah dalam dom kham merat di rajaei Nhật Bản piah pacang bruk kurang urang ngak kayua menuac sia trun./.